សិល្បៈអន្តរជាតិ៖ មិនមានអ្វីគួរឱ្យសង្ស័យនោះឡើយសម្រាប់ការច្រៀង និង សម្ដែងនៅលើឆាកបើនិយាយដល់សមត្ថភាពរបស់ Jungkook សមាជិកក្រុមចម្រៀង BTS ព្រោះគេជាតារាមួយដួងដែលមានទេពកោសល្យខ្ពស់បំផុតក្នុងរង្វង់សិល្បៈ K-Pop។ ក្រៅពីទទួលបានការសរសើរពីក្រុមអ្នកគាំទ្រ ARM ហើយនោះ លោកក៏ទទួលបានការសរសើរពីសំណាក់សាធារណជនចំពោះការសម្ដែងដ៏ល្អឥតខ្ចោះរបស់លោកនៅលើឆាកផងដែរ។
អ្នកវិភាគនិងរិះគន់តន្ត្រីដ៏ល្បីរបស់កូរ៉េ Kim Young Dae បានសរសេរអត្ថបទវិភាគនៅលើកាសែត Rolling Stones របស់កូរ៉េ លើកឡើងអំពីបទចម្រៀង «Butter» ដោយក្នុងអត្ថបទលោកបានសរសើរ Jungkook ចំៗចំពោះសកម្មភាពសម្ដែងនៅលើឆាក ហើយប្រៀបធៀបសមត្ថភាពសម្ដែងរបស់យុវជនរូបនេះទៅនឹងអតីតស្ដេចចម្រៀងប៉ុប Michael Jackson និងតារាចម្រៀង «The Lazy Song» លោក Bruno Mars ផងដែរ។
ខាងក្រោមនេះគឺជាការលើកឡើងរបស់ Kim Young Dae ៖ «Joongkook គឺជាតារាចម្រៀងលេចធ្លោទៅលើការបង្កើតរសជាតិតន្ត្រីតាមរយៈចង្វាក់និង groove ឆ្លងកាត់ ទាំងចង្វាក់និងសំឡេងលាយបញ្ចូលគ្នា ដែលធ្វើឱ្យខ្ញុំស្រមៃដល់ Michael Jackson និង Bruno Mars។
នេះមិនមែនជាលើកដំបូងឡើយដែលតារាចម្រៀងរូបនេះត្រូវបានគេយកទៅប្រៀបប្រដូចនឹងកំពូលតារាចម្រៀងកម្រិតគ្រូ ព្រោះកន្លងៗមក អ្នកបង្កើតមាតិកា Youtube អ្នកសរសេរព័ត៌មានសិល្បៈពី Rolling Stones អ្នកវិភាគនិងរិះគន់តូរ្យតន្ត្រី តែងតែយក Jungkook ទៅប្រៀបជាមួយនឹង Michael Jackson ជានិច្ចក្រោយបានទស្សនាបទចម្រៀងជាច្រើនបទរបស់ក្រុម BTS រួច។
ជាថ្មីម្ដងទៀត អ្នកវិភាគនិងអ្នករិះគន់បានហៅ Jungkook ថា «តារាចម្រៀង Michael Jackson របស់ប្រទេសកូរ៉េខាងត្បូង» ព្រោះលោកមិនត្រឹមតែមានសមត្ថភាពសម្ដែងនិងច្រៀងបានយ៉ាងល្អនៅលើឆាកនោះទេ លោកថែមទាំងអាចអង្រួនឆាកទាំងមូលផងដែរ។
ថ្វីត្បិតអ្នកគាំទ្រជាច្រើនជឿថា Jungkook មានមនុស្សមានសមត្ថភាពអស្ចារ្យម្នាក់ ប៉ុន្តែការដែលតារាដែលខ្លួនស្រលាញ់គាំទ្រអាចប្រៀបប្រដូចជាមួយនឹងអតីតស្ដេចចម្រៀងប៉ុបដ៏មានឥទ្ធិពល Michael Jackson គឺជារឿងមួយដែលគួរឱ្យរីករាយបំផុត។ គួរដឹងដែរថា សមាជិកក្រុមចម្រៀង BTS សុទ្ធតែមានសមត្ថភាពនិងទេពកោសល្យពហុជំនាញរៀងៗខ្លួន ដូច្នេះហើយទើបក្រុមនេះអាចឆក់បាននូវប្រជាប្រិយភាពនិងសន្ទុះគាំទ្រពី ARMY ទូទាំងពិភពលោក៕
ប្រភព៖ Koreaboo
