សិល្បៈជាតិ៖ ភាពយន្ត «Mission Impossible: Dead Reckoning – Part I» បានដាក់បញ្ចាំងថ្ងៃដំបូងជាមួយនឹងការដាក់សម្ពោធ Screen X នៅអ៊ីអន៣ ដែលជាអេក្រង់យក្សទំហំ ២៧០ ដឺក្រេ ដឺក្រេក្នុងរោងភាពយន្ត ធ្វើឱ្យអ្នកទស្សនាទទួលបានបទពិសោធន៍ថ្មីនៃការទស្សនាភាពយន្តដែលមានអារម្មណ៍ថាដូចស្ថិតនៅក្នុងហេតុការណ៍ពិតៗ។
ភាពអស្ចារ្យនៃ Screen X លោក ជី សិលា បានប្រាប់អ្នកសារព័ត៌មានថា នេះគឺបច្ចេកវិទ្យាថ្មីចុងក្រោយគេបង្អស់ដែលផ្ដល់នូវការទស្សនាខ្សែភាពយន្តជាប្រភេទ Screen X ដែលជាប្រភេទអេក្រង់ ២៧០ដឺក្រេ មានអេក្រង់បញ្ចាំងរហូតដល់ទៅ៣ ស្ថិតនៅក្នុងរោងតែមួយ រួមជាមួយនឹងម៉ាស៊ីនបញ្ចាំង (projector) រហូតដល់ទៅ៥ ឯណោះ និងមានទាំង ៤៩៩ កៅអី ដែលអាចឱ្យទស្សនិកជនទស្សនាបានពេញភ្នែក ប្រៀបដូចអ្នកអង្គុយទស្សនា ស្ថិតនៅក្នុងឈុតឆាកហេតុការណ៍សាច់រឿងនោះផ្ទាល់តែម្តង ដែលរោងភាពយន្តធម្មតាមិនធ្លាប់មាន។ ហើយនេះក៏ជាបទពិសោធន៍ថ្មីមួយសម្រាប់អ្នកនិយម និងចូលចិត្តមើលភាពយន្តទទួលបាននូវអារម្មណ៍ប្លែក។
សូមជម្រាបថា ភាពយន្ត «Mission Impossible: Dead Reckoning- Part I» ភាគដំបូងនេះ តួអង្គTom Cruise និងក្រុម IMF របស់លោកបានចាប់ផ្តើមបេសកកម្មដ៏គ្រោះថ្នាក់បំផុតរបស់ពួកគេ ដើម្បីតាមរកកូនសោដែលអាចការពារការបំផ្ទុះអាវុធថ្មីដ៏គួរឱ្យភ័យខ្លាច ដែលគំរាមកំហែងដល់មនុស្សជាតិទាំងអស់នៅលើភពផែនដី និងមុនពេលកូនសោនោះធ្លាក់ទៅក្នុងដៃក្រុមមនុស្សអាក្រក់។ ជាមួយនឹងការគ្រប់គ្រងនៃអនាគត និងជោគវាសនារបស់ពិភពលោក កងកម្លាំងពីអតីតកាលរបស់ Tom Cruise បានប្រណាំងប្រជែង និងឈុតឆាកដ៏សាហាវនៅជុំវិញពិភពលោកចាប់ផ្តើម។ ហើយនេះគ្រាន់តែជាសាច់រឿងចាប់ផ្តើមប៉ុណ្ណោះ ប៉ុន្តែវាពិតជាបានធ្វើឱ្យអ្នកទស្សនាប្រហោងពោះគ្រប់គ្នាជាមួយឈុតឆាករន្ធត់ៗព្រលឹងចុងសក់។
យ៉ាងណាមិញ ភាពយន្ត «Mission Impossible: Dead Reckoning- Part I» មានចាក់បញ្ចាំងនៅរោងភាពយន្ត Major Cineplex By Smart ពីថ្ងៃទី 11 ខែ កក្កដា 2023 នេះតទៅ៕
