សិល្បៈជាតិ៖ កន្លងមក មហាជនអ្នកគាំទ្រវិស័យបវរកញ្ញាបានដឹងខ្លះហើយថា បវរកញ្ញាភេទទី៣ An Jolyden ធ្លាប់បានលាលែងពីតំណែង Miss Queen លំដាប់រងទី ១ ឆ្នាំ ២០២២ បន្ទាប់ពីកញ្ញាមានបញ្ហាផ្ទាល់ខ្លួន និងសម្ពាធផ្លូវចិត្តខ្លាំង។ ស្រាប់តែថ្មីៗនេះ បវរកញ្ញាភេទទី៣ រូបនេះចូលមកប្រកួតនៅក្នុងកម្មវិធី Miss Universe Cambodia 2023 វិញម្ដង។
អាចនិយាយថា ឆ្នាំនេះជាឆ្នាំដែលពិសេសខ្លាំងមែនទែន ដែលស្ត្រីកែភេទកាន់អត្តសញ្ញាណបណ្ណែ និងលិខិតឆ្លងដែនដែលមានបញ្ជាក់ថាភេទស្រី អាចចូលរួមប្រកួតប្រជែងនៅលើវេទិការបស់ Miss Universe។ ជាក់ស្ដែងនៅក្នុងប្រទេសកម្ពុជា Miss Universe Cambodia 2023 ដែលរៀបចំឡើងដោយក្រុមហ៊ុនមហាហង្ស ក៏បានផ្ដល់ឱកាសពិសេសនេះដល់បេក្ខភាពបវរកញ្ញាភេទទី៣ តាមលក្ខខណ្ឌកំណត់ថ្មីនេះដែរ។
យ៉ាងណាមិញ មកទល់ថ្ងៃទី ១២ ខែកក្កដា នេះ បវរកញ្ញាភេទទី៣ An Jolyden ក៏ទទួលបានការប្រកាសជាផ្លូវការថា គឺជាបេក្ខភាពផ្លូវការក្នុងចំណោមបេក្ខភាព ២៣ រូបដែលអាចបន្តចូលរួមប្រកួត Miss Universe Cambodia 2023 ក្រោយពីកញ្ញាបានជាប់ជុំដំបូងនៃការប្រកួតវគ្គរូបថតនៅលើបណ្ដាញសង្គម។ ដោយឡែកបេក្ខភាពស្ត្រីកែភេទនៅក្នុងឆ្នាំនេះ ក៏មិនមែនមានតែកញ្ញា An Jolyden នោះដែរ ពោលគឺមានបេក្ខភាពស្ដ្រីកែភេទដទៃទៀតចូលរួមប្រកួតប្រជែងដូចជាកញ្ញា Sai Fhon ជាដើម។
សូមជម្រាបថា បវរកញ្ញាភេទទី៣ An Jolyden មានវ័យ ២៥ ឆ្នាំ មានកំពស់ 180 សង់ទីម៉ែត្រ ដែលមានជំនាញ Makeup រចនាម៉ូដ និងបង្ហាញម៉ូដ៕
