សិល្បៈជាតិ៖ ការបាត់មុខ រំដួលលិចទឹក ពីសង្គមសិល្បៈអស់រយៈពេលជាយូរនេះ បានធ្វើឱ្យអ្នកគាំទ្រកើតចិត្តព្រួយបារម្ភខ្លាចអ្នកសិល្បៈច្នៃម៉ូដរូបនេះមានគំនិតគិតខ្លី ស្របពេលដែលសាមីខ្លួនផ្ទាល់រមែងបង្ហោះសារប្លែកៗដែលស្ដែងឱ្យដឹងថាខ្លួនកំពុងជួបរឿងវិបត្តិផ្លូវចិត្តជាខ្លាំង។
ជាក់ស្ដែង ផ្អែកតាមការបង្ហោះរបស់ រំដួលលិចទឹក នាពេលថ្មីៗនេះថា ៖ «ការដែលមិនផុស មិនបង្ហាញ មិនរាយរាប់ ពីទុក្ខលំបាក ភាពវេទនា និងការឈឺចាប់ ហើយបង្ហាញតែរូបភាពសប្បាយៗ និងគ្មានទុក្ខកង្វល់ មិនមែនបង្ហាញថាខ្ញុំ Fake ខ្ញុំសម្តែង ឬ High show ទាំងដែលកំពុងតែលំបាកទេ ព្រោះខ្ញុំដឹងថា បើទោះនិយាយ ឬប្រាប់នរណា ក៏មិនអាចជួយអ្វីបានដែរជួនកាលគេដឹងគេមិនត្រឹមតែមិនអាណិត ឬលើកទឹកចិត្តយើងទេ តែគេមានតែលួចសើចចម្អក រិះគន់ ពេបជ្រាយ មើលបំណាំ ឬមើលងាយយើងទៅវិញទេ ! លំបាកខ្លាំងវាស្ទះ វាណែនហើយ តែក៏មិនដឹងប្រាប់ឬនិយាយមានតែពាក្យថាទ្រាំលាក់ទុកតែម្នាក់ឯង តែអរគុណបងប្អូននិងមិត្តភិក្តដែលផ្តល់កំលាំងចិត្តលើកទឹកចិត្តខ្ញុំរហូតមក!»។
ឃើញការបង្ហោះរបស់ រំដួលលិចទឹក យ៉ាងដូច្នោះហើយ មហាជនអ្នកគាំទ្រ ក៏ដូចជាអ្នកបណ្ដញសង្គមជាច្រើននាក់ បានបង្ហាញអារម្មណ៍ព្រួយបារម្ភចំពោះលោក ហើយបានប្រាប់ឱ្យលោកធ្វើចិត្តឱ្យរឹងមាំ អត់ទ្រាំចំពោះបញ្ហាប្រឈមគ្រប់បែបយ៉ាង។
យ៉ាងណាមិញ ប្រាប់មកកាន់អ្នកសារព័ត៌មានត្រយង រំដួលលិចទឹក បាននិយាយថា មួយរយៈនេះហាក់មិនសូវបានចេញមុខតាមកម្មវិធីសិល្បៈនានានោះទេ នោះក៏ដោយសារតែខ្លួនពិបាកចិត្តផង និងមានសម្ពាធបញ្ហាគ្រួសារ។ រំដួលលិចទឹកបន្តថា សព្វថ្ងៃនេះមានអ្នកសិល្បៈទាក់ទងមកគ្រប់គ្នាឱ្យចូលរួមកម្មវិធីផ្សេងៗ ប៉ុន្តែលោកមិនអាចចូលរួមបានទេ ព្រោះតែមានម្ដាយកំពុងតែឈឺ ជាបន្ទុកសម្រាប់លោកត្រូវមើលថែ។ អ្នកច្នៃម៉ូដរូបនេះឱ្យដឹងទៀតថា ម្ដាយរបស់លោកមានជំងឺច្រើនមុខណាស់ ថែមទាំងមានអាការៈអាល្លែកហ្ស៊ីជាមួយឱសថថែមទៀតផង។ ដូច្នោះហើយ រំដួលលិចទឹក ត្រូវរ៉ាប់រងមើលថែម្ដាយផង និងរ៉ាប់រងចំណាយគ្រប់សព្វបែបយ៉ាងផង។
ដោយឡែក រំដួលលិចទឹក ផ្ទាល់វិញ ក៏មានជំងឺប្រចាំកាយជា ជំងឺមេរោគក្នុងឈាម និងឈាមមានជាតិពុល ដែលជាហេតុធ្វើឱ្យគ្រប់គ្នាឃើញលោកមានស្ថានភាពស្គមស្គាំង ប៉ុន្តែបច្ចុប្បន្នភាពសុខភាពរបស់លោកបានប្រសើរឡើងបន្តិចហើយ។
សូមជម្រាបផងដែរថា រំដួលលិចទឹក មានឈ្មោះពិតថា ម៉ិញ ចាន់វ៉ាន់ដា មិនត្រឹមតែជាអ្នកច្នៃម៉ូដប្លែកៗដែលទទួលបានការកោតសរសើរ និងទទួលស្គាល់ស្នាដៃពីមហាជននោះទេ លោកក៏ជាអ្នកជំនាញឯកទេសលើការផាត់មុខឱ្យតារាល្បីៗ បវរកញ្ញា ថែមទៀតផង។ រំដួលលិចទឹក និយមបង្ហាញពីសកម្មភាពហ្វេសសិនប្លែកៗបែបកំប្លែងៗដែលប្រកបដោយភាពច្នៃប្រឌិតខ្ពស់ និងធ្លាប់ជាអ្នករៀបចំកម្មវិធីប្រកួត Miss Planet Cambodia ឆ្នាំ ២០១៩ ផងដែរ៕
