សិល្បៈជាតិ៖ មែនទែនទៅ នៅក្នុងសង្គមសិល្បៈខ្មែរ គេសង្កេតឃើញថា តារាសិល្បៈមួយចំនួនបានចាប់ដៃគ្នាសាងគ្រួសារ ដោយស្នេហារបស់ពួកគេផ្ដើមចេញពីចំណុច Friend-zone បានន័យថា ពួកផ្ដើមស្នេហ៍ពីមិត្តភាពរហូតដល់មើលចិត្តថ្លើមគ្នាត្រូវ ហើយក្លាយជាគ្រួសារតែមួយ។
ថ្ងៃនេះសារព័ត៌មានត្រយង សូមលើកយកតារាសិល្បៈចំនួន ១០ គូ ដែលបានចាប់កំណើតស្នេហ៍ក្នុងពិភពសិល្បៈដូចគ្នា ហើយទទួលបានការស្ងើចសរសើរពីមហាជនអ្នកគាំទ្រ។
1-អ្នកនាង គង់ ចាន់ស្រីមុំ និងលោកគីម សីហា
តារាស្រី គង់ ចាន់ស្រីមុំ បានសម្រេចចិត្តរៀបការជាមួយអតីត Freshie Boy ចំណាត់ថ្នាក់លេខ ២ឆ្នាំ ២០០៧ គឺលោក គីម សីហា នៅថ្ងៃទី ១៤ ខែ មីនា ឆ្នាំ ២០១៦ បន្ទាប់ពីអ្នកទាំងពីរបានមើលចិត្តថ្លើមគ្នាអស់រយៈពេល ៩ឆ្នាំ។ មង្គលការអ្នកទាំងពីរនាពេលនោះ ប្រៀបដូចជាគូស្នេហ៍លំដាប់អភិជន ដែលរៀបចំឡើងនៅសណ្ឋាគារសូហ្វីតែល ភ្នំពេញ ភូគីត្រា។ ក្រោយចាប់ដៃគ្នាសាងគ្រួសារ អ្នកទាំងពីរបានរួមគ្នាបោះទុនបើកមុខជំនួញជាច្រើនដូចជាបើកសំលៀកបំពាក់ ហាងលក់ផលិតផលថែរក្សាសម្រស់ នាំចូលទឹកអប់ម៉ាកប្រេនផ្ទាល់ខ្លួន និងបើកដំណើរការភោជនីយដ្ឋានជាដើម។ រហូតមកទល់សព្វថ្ងៃនេះ អ្នកទាំងពីរមានកូនស្រីបណ្ដូលចិត្តម្នាក់ឈ្មោះ ម៉ូម៉ូ មានអាយុទើបតែ ៥ ឆ្នាំ និងមានមុខមាត់គួរឱ្យស្រឡាញ់។
2-អ្នកនាង កុល ដាវីនិងលោក សុខ រក្សា
តារាសម្ដែងស្រី កុល ដាវី បានរៀបការជាមួយអតីតតារាចម្រៀងនៅផលិតកម្មហង្សមាសគឺលោក សុខ រក្សា នៅថ្ងៃទី ៨ ខែមីនា ឆ្នាំ ២០១៩ ក្រោយពីបានឈ្វេងយល់ចិត្តថ្លើមគ្នាជាង ៥ ឆ្នាំ ។ ហើយក្រោយពីរៀបការរួច តារាសម្ដែងស្រីរូបនេះបានផ្លាស់ប្ដូរស្ទាយការស្លៀកពាក់របស់ខ្លួន ដែលធ្លាប់តែមានឈ្មោះជាតារាសិចស៊ី មកជាស្រគត់ស្រគំវិញ។ ក្រៅពីអាជីពសិល្បៈ អ្នកទាំងពីរក៏មានមុខជំនួញផ្ទាល់ខ្លួនជាច្រើន ទាំងការលក់ផលិតផលនៅលើអនឡាញ លក់គ្រឿងអលង្ការ និងមានក្រុមរៀបចំការប្រគំតន្ត្រីថែមទៀតផង។ រៀបការហើយច្រើនឆ្នាំ អ្នកនាង កុល ដាវី និងលោក សុខ រក្សា ក៏មានកូនដំបូងដូចប្រាថ្នា តែជាអកុសលកូននោះមិននៅជាប់វិញ ដោយសារតែម្ដាយធ្វើការងារហត់នឿយខ្លាំងពេក គ្មានវេលាថែមទាំសុខភាពគ្រប់គ្រាន់។ រាល់ថ្ងៃនេះ ប្ដីប្រពន្ធមួយគូនេះទទួលបានកូនស្រីម្នាក់ទៀតឈ្មោះ កុល វីនីតា ដែលអ្នកទាំងពីរស្រឡាញ់ថ្នាក់ថ្នមដូចជាកែវ។ ម្យ៉ាងទៀតគូស្នេហ៍តារាដូចគ្នា ១ គូនេះចាប់តាំងពីចាប់ដៃគ្នាជាប្ដីប្រពន្ធមក ពួកគេរកស៊ីធូរធារណាស់ ដោយមានផ្ទះដល់ទៅ ២ ល្វែង និងជិះរថយន្ដទំនើបៗ ហើយក៏មានដីធ្លីមួយចំនួនទៀតផង។
3-អ្នកនាង ខាត់ សុឃីមនិងលោកផាណូ
អ្នកនាង ខាត់ សុឃីម និងស្វាមី អ៊ិន សុបញ្ញា ហៅផាណូ បានរៀបមង្គលការនៅថ្ងៃទី ១២ ខែធ្នូ ឆ្នាំ ២០១២។ គិតមកទល់ពេលនេះ ប្ដីប្រពន្ធ១គូនេះរៀបការបាន ១១ ឆ្នាំហើយ អ្នកទាំងពីរមានកូនប្រុសឈ្មោះ បញ្ញា ស្កាយ យសសក្ក័ និងកូនស្រីឈ្មោះ បញ្ញា ហ្វូតូស្អាត។ ជីវិតឯកជនអ្នកនាង ខាត់ សុឃីម ត្រូវបានគ្រប់គ្នាលើកឡើងថា ជាតារាស្រីនៅស្រុកខ្មែរដែលបានសោយលាភលើទ្រនំសិល្បៈស្ទើរតែក្លាយជាសេដ្ឋិនីតាមរយៈសម្អាងការ និងវង់ភ្លេងបុរាណខ្មែរ។ តារាពហុជំនាញមួយដួងនេះ បានសាងកេរ្តិ៍ឈ្មោះឱ្យត្រកូលខាត់មានឈ្មោះល្បីរន្ទឺពេញផ្ទៃប្រទេស រហូតដល់ឯនាយសមុទ្រ។
4-អ្នកនាង គង់ សុជាតិនិងលោក ជា វិបុល
បើនិយាយដល់គ្រួសារពិធីករកំពូលលំដាប់ប្រទេស នោះច្បាស់ជាគ្រប់គ្នានឹកដល់អ្នកនាង គង់ សុជាតិ និងលោក ជា វិបុល ជាក់ជាមិនខាន។ ផ្ដើមចេញពីដៃគូពិធីករនៅក្នុងកម្មវិធីជាច្រើនប្រចាំស្ថានីយទូរទស្សន៍ប៉ុស្តិ៍លេខ ៣ គូស្នេហ៍តារាមួយគូនេះបានវិវត្តមកជាគ្រួសាររួមដំបូលផ្ទះ ដោយបានរៀបការនៅថ្ងៃទី៩ ខែវិច្ឆិកា ២០១៣ នៅសណ្ឋាគារ អ៊ិនធឺកុងទីណង់តាល់ ដែលពេលនោះអ្នកនាង គង់ សុជាតិ មានអាយុ ៣៧ឆ្នាំ ជាអ្នកមេម៉ាយកូនពីរក្នុងបន្ទុក ហើយ ចំណែកឯលោក ជា វិបុល ក៏មានអាយុតិចជាងអ្នកនាង សុជាតិ ៣ឆ្នាំ។ មកទល់ពេលនេះអ្នកទាំងពីរមានកូនស្រីរួមគ្នាម្នាក់ឈ្មោះ ជា សុជាតិ នារីដូរី មានអាយុ ៦ ឆ្នាំហើយ។ អ្នកនាង គង់ សុជាតិ ត្រូវបានមហាជនកត់សម្គាល់ជាងគេទៅលើរឿងឯកទេសថែរក្សាសម្រស់ ដោយអ្នកនាងក៏ទទួលបានជោគជ័យកន្លងមកតាមរយៈហាង សុជាតិ សាឡន និងសាលាបណ្ដុះបណ្ដាល សុជាតិ។ រីឯលោក ជា វិបុល វិញក្រោយចាកចេញពីស្ថានីយទូរទស្សន៍ប៉ុស្តិ៍លេខ ៣ មកហង្សមាស ក៏ទទួលបានឈ្មោះជាកំពូលពិធីករកម្មវិធីលំដាប់ពិភពលោកដូចជា The Voice Cambodia , Cambodian Idol និង Cambodian’s Got Talent ជាដើម។
5-អ្នកនាង ស៊ឹម សូលីកានិងលោក អេង ឫទ្ធី
ប្ដីប្រពន្ធតារាសិល្បៈមួយគូនេះ ក៏ជាគូស្នេហ៍ពិធីករដូចគ្នាដែរ ដោយអ្នកទាំងពីរគឺជាពិធីករពិធីការិនីប្រចាំស្ថានីយទូរទស្សន៍បាយ័ន។ អ្នកនាង ស៊ឹម សូលីកា និងលោក អេង ឫទ្ធី បានជ្រើសរើសថ្ងៃមង្គលសិរីចូលរោងការនៅថ្ងៃទី០៩ ខែកញ្ញា ឆ្នាំ២០១៩ ហើយរៀបអាពាហ៍ពិពាហ៍បាន ១ឆ្នាំកន្លះអ្នកទាំងពីរក៏ទទួលបុត្រដូចបំណង ដែលនឹងត្រៀមសម្រាលនៅដើមឆ្នាំ ២០២៤ ខាងមុខនេះ។ យ៉ាងណាមិញ លោក រិទ្ធី លាលែងពីវិស័យសម្ដែងភាពយន្តហើយ ដោយលោកសព្វថ្ងៃនេះមានតួនាទីជាប្រធានពិធីករនៅប៉ុស្ដិ៍បាយ័ន និងទើបតែទទួលងារជាអភិបាលរងខេត្តស្វាយរៀង។ ចំណែកឯ អ្នកនាង សូលិកា នៅតែបន្តការងារសិល្បៈផ្នែកពិធីការិនីដដែល។ គូស្នេហ៍មួយគូនេះបានធ្វើឱ្យមហាជនយល់ឃើញថា សម័យនេះ អ្នកសិល្បៈឃើញថាអាចមានសមត្ថភាពក្នុងការរួមចំណែក អភិវឌ្ឍន៍សង្គមបានដោយគំនិតចេះដឹង។
6- អ្នកនាង យក់ ឋិតរដ្ឋានិងលោក ឃុំប៉ុណ្ណាដែត
ស្នេហាតារាចម្រៀងមួយគូនេះ កើតឡើងពីការស្អប់ជំពប់លើ ដោយអ្នកនាង យក់ ឋិតរដ្ឋា ធ្លាប់បានលើកឡើងថា ពេលចូលសិល្បៈដំបូង លោក ឃុំ ប៉ុណ្ណាដែត ធ្លាប់បង្ហាញអារម្មណ៍មិនចូលចិត្តអ្នកនាងទេ តែចុងក្រោយបែរជាមកជំពប់លើស្នេហ៍អ្នកនាងវិញ។ អ្នកទាំងពីរបានចូលរោងការបញ្ចប់ភាពនៅលីវ នៅអំឡុងខែ ឧសភា ឆ្នាំ ២០០៦ ដែលកាលនោះ អ្នកទាំងពីរនៅជាតារាចម្រៀងក្រុម EV Band។ គិតមកទល់ពេលនេះ ប្ដីប្រពន្ធតារាមួយគូនេះរៀបការបានរយៈពេល ១៧ ឆ្នាំនេះ អ្នកទាំងពីរមានកូនប្រុស ២ នាក់ និងកូនស្រីម្នាក់។ អ្នកនាង យក់ ឋិតរដ្ឋា នៅតែបន្តអាជីពជាតារាចម្រៀងដដែល ប៉ុន្តែចំពោះស្វាមីវិញ គឺបានបញ្ចប់អាជីពសិល្បៈហើយ និងបានប្រឡូកការរកស៊ីលើវិស័យអចលនៈទ្រព្យ។ គូស្នេហ៍សិល្បៈមួយគូនេះត្រូវបានមហាជនពោលសរសើរមិនដាច់ពីមាត់ពីភាពផ្អែមល្ហែមដាក់គ្នាពីមួយពេលទៅមួយពេលដោយមិនលាក់លៀមភ្នែកមហាជន ហើយក៏ជាគូស្នេហ៍ដែលហ៊ានប្រាប់មហាជនអ្នកគាំទ្រត្រង់ៗពីជីវិតឯកជនរបស់ពួកដោយមិនបារម្ភខ្លាចធ្លាក់ប្រជាប្រិយភាព នៅពេលដែលតារាសិល្បៈផ្សេងៗទៀតមិនក្លាហានបើកចំហពីទំនាក់ទំនងពួកគេនោះឡើយ។
7- អ្នកនាង សួស វីសានិងលោកថមមី
គូស្នេហ៍តារាចម្រៀងមួយគូនេះរៀបមង្គលការនៅចុងខែវិច្ឆិកា ឆ្នាំ ២០១៩ បន្ទាប់ពីអ្នកទាំងពីរបានយល់ចិត្តយល់ថ្លើមគ្នារយៈពេលជាង៤ឆ្នាំ។ បន្ទាប់ពីរៀបការរួច អ្នកទាំងពីរបានដឹកដៃគ្នាទៅក្រេបទឹកឃ្មុំនៅឯក្រៅប្រទេសរហូតដល់ទៅ៨ប្រទេសឯណោះនៅតំបន់អឺរ៉ុបមាន ប្រទេសបារាំង ស្វីស អេស្ប៉ាញ ហុឡង់ដ៍ អ៊ីតាលី អាល្លឺម៉ង់ ប៉ូឡូញ និង ដាណឺម៉ាក រហូតផ្អើលអស់អ្នកគាំទ្រថា អ្នកទាំងពីរពិតជាតារាដែលមានលុយច្រើនលំដាប់អភិជន។ អ្នកនាង សួស វីសា និងលោក ថមមី មានកូនស្រីម្នាក់ឈ្មោះ ថង សាម៉ូលីណា ហៅក្រៅថា ជេននី មានអាយុ ៣ឆ្នាំហើយ និងមាននិស្ស័យសិល្បៈដូចជាលោកប៉ាអ្នកម៉ាក់ផងដែរ។ ក្រៅពីអាជីពសិល្បៈ អ្នកទាំងពីរក៏មានមុខជំនួញលើអនឡាញដូចជា ផលិតផលថែរក្សាសម្រស់ អាហារបំប៉ន និងមានអាជីវកម្មផលិតទឹកកកថែមទៀតផង។
8-អ្នកនាង ទេព បូព្រឹក្ស និងលោកជី ដេវីត
ងាកមកអ្នកនាង ទេព បូព្រឹក្ស និងលោក ជី ដេវីត វិញថ្វីត្បិតមិនទាន់មានដំណឹងរៀបការ ប៉ុន្តែគូស្នេហ៍មួយគូនេះស្រឡាញ់គ្នាចាក់ទឹកមិនលិចឡើយ រហូតអ្នកទាំងពីរមានតំណក់ឈាមរួមគ្នាមួយគឺកូនប្រុសមានឈ្មោះថា ទេព បញ្ចវរាប ហៅក្រៅ Albert ។ គូស្នេហ៍គូចម្រៀងមួយគូនេះ បានផ្ដាច់ខ្លួនចេញផលិតកម្មធំប្រចាំប្រទេស ហើយវិវត្តខ្លួនក្លាយជាតារាចម្រៀងឯករាជ្យដែលបានបង្កើតស្នាដៃថ្មីក្នុងវិស័យសិល្បៈជាច្រើន និងបានក្លាយជាគូស្នេហ៍តារាសិល្បៈដូចគ្នាដែលតែងបង្ហាញទាំងភាពផ្អែមល្ហែម និងភាពឡូយឆាយ។ ជីវិតគូរបស់ពួកគេត្រូវបានមហាជនចាប់អារម្មណ៍ខ្លាំងតាំងពីការតស៊ូក្នុងសិល្បៈដំបូង រហូតឈានដល់ជោគជ័យមានបានដូចសព្វថ្ងៃនេះ។
9-ប៉ាចគីមមួយ និង ស៊យ រតនៈ
តារាចម្រៀង ប៉ាច គីមមួយ បានសម្រេចភ្ជាប់ពាក្យជាមួយនឹងតារាចម្រៀង ស៊យ រតនៈ នៅថ្ងៃទី ១ ខែកក្កដា ឆ្នាំ ២០២២ ហើយពួកគេមានគម្រោងរៀបការនាពេលខាងមុខនេះទៅតាមពេលាដែលដេញបានល្អ។ អ្នកទាំងពីរបានសារភាពថា បានមើលចិត្តគ្នាអស់រយៈពេលជាង ៨ ឆ្នាំមកហើយ បន្ទាប់ពីបញ្ចប់ការប្រឡងចម្រៀងលំដាប់ពិភពលោក The Voice Cambodia រដូវកាលទី ១ នៅឆ្នាំ ២០១៤។ មកទល់រាល់ថ្ងៃនេះ កញ្ញា ប៉ាច គីមមួយ និងលោក ស៊យ រតនៈ កាន់តែសម្ញែងភាពផ្អែមល្ហែមមិនដាច់ទេនៅលើបណ្ដាញសង្គមហ្វេសប៊ុក ហើយបើតាមអ្នកសិល្បៈបានប្រាប់វិញថា រាល់ពេលមានកម្មវិធីម្ដងៗ អ្នកទាំងពីរតែងតែបណ្ដើរគ្នាត្រសង រហូតធ្វើឱ្យអ្នកជិតខាងខ្លួនច្រណែនភាពផ្អែមល្ហែមអ្នកទាំងពីរថែមទៀត។
10-ពេជ្រសោភា និងឆឹម សក្កដា
មួយគូនេះវិញ ពិតជាភ្ញាក់ផ្អើលបន្តិចហើយ ក្រោយប្រកាសមានទំនាក់ទំនងមើលចិត្តគ្នាអស់ជិត ១០ ឆ្នាំ ស្រាប់តែនៅព្រឹកថ្ងៃទី ១១ ខែវិច្ឆិកា ឆ្នាំ ២០២២ អ្នកនាង ពេជ្រ សោភា ទម្លាយរូបភាពជាច្រើនសន្លឹកបង្ហាញថា អ្នកនាងពិតជាបានភ្ជាប់ពាក្យជាមួយលោក ឆឹម សកក្កដា ហើយ។ បើទោះភ្ជាប់ពាក្យ ប៉ុន្តែអ្វីដែលមហាជននៅតែមន្ទិលក្នុងចិត្តនោះ បារម្ភខ្លាចនឹងទាំងពីរនៅតែបន្លំភ្នែកមហាជនបន្តទៀត លុះត្រាតែអ្នកទាំងពីរដឹកដៃគ្នាចូលរោងការតែម្ដងទើបអស់ចម្ងល់។ យ៉ាងណាមិញ លោក ឆឹម សក្កដា ធ្លាប់ប្រាប់ត្រយងថា លោកមានគម្រោងរៀបចំរៀបការនៅឆ្នាំ ២០២៣ នោះក៏ត្រូវបានលុបចោលវិញ ព្រោះដោយសារលោក និងអ្នកនាង សោភា រវល់រៀងខ្លួនពេក។ ដំណឹងល្អនេះ អាចលើកទៅឆ្នាំក្រោយវិញ អ្នកទាំងពីរគ្រោងរៀបការបែបសមញ្ញៗ ដែលអ្នកចូលរួមតែអ្នកសិល្បៈជិតដិត និងក្រុមគ្រួសារសាច់ញាតិតែប៉ុណ្ណោះ។
យ៉ាងណាដែរប្រិយមិត្ត បន្ទាប់ពីបានដឹងរឿងរ៉ាវស្នេហារបស់តារាប្រុសស្រីទាំង ១០ គូនេះហើយ? កុំភ្លេច Comment ប្រាប់ Admin ផងណា៕
