សិល្បៈជាតិ៖ កាលពីថ្ងៃទី១៣ ខែកក្កដា ឆ្នាំ២០២៣ តារាចម្រៀងដែលមិនទាន់រកទ្រនំឃើញ យឿន សូតអនុស្សាវរីយ៍ បានចេញមកបង្ហោះរូបថតតារាចម្រៀងស្រករក្រោយគឺ លោក នាង ដាវីន ភ្ជាប់ជាមួយសំណេរខ្លី ប៉ុន្តែបែរជាធ្វើឱ្យមានការចាប់អារម្មណ៍និងយល់ច្រឡំថាលោក អាចនឹងកំពុងមានបញ្ហាជាមួយនឹងតារាចម្រៀងប្រចាំផលិតកម្មហង្សមាសខាងលើ។ ប៉ុន្តែៗភ្លាមនោះសាមីខ្លួន លោកអនុស្សាវរីយ៍ បានប្រញាប់ចេញមកបកស្រាយ ស្រាយមន្ទិល និងចម្ងល់អ្នកគាំទ្រភ្លាមៗវិញផងដែរ។
សំណេរដែលធ្វើឱ្យមានការយល់ច្រឡំនោះដោយសារតែម្ចាស់បទ «មួយកំប៉ុងពីរកំប៉ុង» បានសរសេររៀបរាប់ថាដូច្នេះ៖ «អរគុណអាប្អូនប្រុស Mrr Vin មានតែប្អូនទេដែលធ្វើបែបនេះដាក់បង នៅ ធ្វើឲ្យបងចាំមិនភ្លេច»។
ការដែលលោកបញ្ចេញសំណេរខ្លី ភ្ជាប់រូបថតលោក នាង ដាវីន ធ្វើឱ្យអ្នកលេងបណ្ដាញសង្គមកាត់ន័យថាប្រហែលជាតារាចម្រៀងរូបនេះមានបញ្ហាអាក់អន់ស្រពន់ចំពោះគ្នាដោយសារបញ្ហាណាមួយហើយក៏ដឹង។ ខណៈដែលអ្នកខ្លះទៀតបែរជាយល់ថាអ្នកទាំងពីរកំពុងមានទំនាក់ទំនងគ្នាហើយប្រហែលជាកំពុងឈ្លោះគ្នាទើបអនុស្សាវរីយ៍ចេញមកទម្លាយបែបនេះ។
បន្ទាប់ពីធ្វើឱ្យអ្នកគាំទ្រមានការងឿងឆ្ងល់ និងទស្សន៍ទាយផ្សេងៗគ្នា អនុស្សាវរីយ៍បានចេញមកបញ្ជាក់តបចំពោះចម្ងល់នោះដោយខ្លីថា តាមពិតលោកអត់មានបញ្ហាអីជាមួយគ្នាទេ ហើយការដែលលោកផុសបែបនេះ គឺលោកចង់សរសើរចំពោះលោក នាង ដាវីន តែប៉ុណ្ណោះ ដោយលោកបញ្ជាក់ខ្លីថា៖ «ខ្ញុំសរសើរប្អូនគាត់មានទឹកចិត្តល្អហ្នឹងណា និង អត់មានអីទេ ប្អូនគាត់ល្អជាមួយខ្ញុំតើស»
