សិល្បៈជាតិ៖ បទចម្រៀង «ទេវរាជ» របស់អ្នកនាង ទេព បូព្រឹក្ស បានបញ្ចេញឱ្យអ្នកគាំទ្របានស្ដាប់កាលពីថ្ងៃទី៧ ខែកក្កដា ឆ្នាំ២០២៣ ត្រូវនឹងខួបការដាក់បញ្ចូលប្រាសាទព្រះវិហារជាសម្បត្តិបេតិកភណ្ឌពិភពលោករបស់អង្គការ UNESCO លើកទី១៥ (៧ កក្កដា ២០០៨-៧ កក្កដា ២០២៣)។
បទចម្រៀងដែលមានអត្ថន័យរៀបរាប់ពីប្រវត្តិសាស្ត្ររបស់ខ្មែរមួយនេះទទួលបានការសាទរនិងពេញចិត្តពេញថ្លើមខ្លាំងពីសំណាក់អ្នកគាំទ្រខ្មែរ ប៉ុន្តែក៏មានជនជាតិថៃមួយភាគតូចបានចេញមកឡាំប៉ាមិនពេញចិត្តព្រមទាំងចោទប្រកាន់ថាបទចម្រៀងនេះតារាចម្រៀងល្បីរបស់ខ្មែរចង់សំដៅដល់ជនជាតិថៃ។
យ៉ាងណាមិញការលើកឡើងរបស់ថៃនេះ មិនមានអ្វីដែលគួរឱ្យចាប់អារម្មណ៍នោះឡើយ ព្រោះជារឿយៗជនជាតិថៃតែងតែនិយមរើសដាក់ខ្លួន ម្យ៉ាងវាគឺជាការយល់ឃើញរបស់ជនជាតិគេ ប៉ុន្តែអ្វីដែលធ្វើឱ្យមានការហួសចិត្តខ្លាំងនោះគឺនៅពេលដែលមានកូនខ្មែរម្នាក់បែរជាចេញមកបង្ហាញទស្សនៈដែលហាក់ដូចជាចូលដៃជាមួយសាសន៍គេទៅវិញនោះទេ ដែលបង្កើតឱ្យមានការប្រតិកម្មពីសំណាក់អ្នកគាំទ្រអ្នកនាងទេព បូព្រឹក្ស និងលោក ជី ដេវីត។
«ដោយសារតែភាពច្រណែន…ធ្វើឱ្យ២នាក់ប្ដីប្រពន្ធ និងធ្វើអ្វីដោយការមិនបានគិត។ ដោយសារ… ល្បីនៅថៃ មានទីផ្សារច្រៀងនៅថៃ មានតារាថៃសហការច្រើន នរណាដឹងដែរថាថៃនិងខ្មែរមានទំនាស់រឿងហ្នឹងច្រើនលើកច្រើនសារ តែនៅតែធ្វើ គួរតែសាងមិត្តប្រសើរជាងសត្រូវ។…ហត់ពេកហើយ….ធ្វើផ្លូវ តែ២នាក់ប្ដីប្រពន្ធនឹងយកឧបសគ្គមកបាំងផ្លូវ សំខាន់ប្ដីផុសចង់ហូបបបរសាច់…»
ការលើកឡើងនេះត្រូវបានផេកអ្នកគាំទ្រលោក ជីដេវីត ដែលមានឈ្មោះថា «Ditways Forever» Capture យកបង្ហោះចែកចាយ ព្រមជាមួយនឹងសំណេរ ប្រតិកម្មចំពោះការលើកនេះយ៉ាងដូច្នេះថា៖ «គាំទ្រអ្នកណាជាសិទ្ធរបស់អ្នក តែកុំហួសហេតុបែបនេះ បើអ្នកយល់ត្រូវថាខុស វាជាសិទ្ធ វាជាគំនិតដ៏អគតិរបស់អ្នក តែអ្នកមិនមានសិទ្ធប្រមាថមើលងាយគេនោះទេ ខ្ញុំសូមផ្តាំ! អ្នកឯងក៏មិនរួចខ្លួនដែរ។ ពួកខ្ញុំមានមោទនភាពណាស់ដែល Idol របស់ខ្ញុំមានស្នាដៃល្អៗ សរសេររៀបរាប់លើកពីប្រវត្តិសាស្ត្រ មិនមែនសរសេរលើកតែពីខ្លួនឯងទេ! ហើយពួកខ្ញុំប្រហែលជាមានសំណាងជាងពួកឯង ដែលបងដេវីត មាន Channel Telegram របស់គាត់ តែងតែនិយាយលេងជាមួយអ្នកគាំទ្រគាត់ ពេលខ្លះក៏ជួយណែនាំដល់អ្នកគាំទ្រគាត់ អ្វីដែលគួរធ្វើ និងអ្វីដែលមិនគួរធ្វើ Channel Telegram មានដូចគ្នា អ្នកឯង ឬក្រុមការងារអ្នកឯង គួរតែណែនាំអ្នកគាំទ្រផង! ការទប់ស្កាត់វាមិនបានលុបបំបាត់ទាំងស្រុងនោះទេ តែវាក៏អាចជួយកាត់បន្ថយបានខ្លះដែរ។ អ្នកធ្វើ FanPage ទាំងឡាយ មិនថា Facebook ឬ TikTok អ្នកគួរតែអាណិត Idol របស់អ្នកផង។ សម្រាប់ Idol របស់ពួកខ្ញុំ ពួកខ្ញុំចេះមើលថែរហើយ!»
បន្ទាប់ពីបញ្ចេញសារនេះរួចគេមើលឃើញថាមានការចូលមកគាំទ្រជាច្រើន ដោយម្នាក់ៗបានបង្ហាញការមិនគាំទ្រនិងពេញចិត្តចំពោះការលើកឡើងនោះឡើយ ហើយភាគច្រើនគេបានយកពាក្យកំពុងពេញនិយមមកប្រៀបថាឱ្យហ្វេនម្នាក់នោះថា «ហ្វេនបែបថៃ»
មែនទែនទៅ! នៅក្នុងអត្ថន័យរបស់តារាចម្រៀង ទេព បូព្រឹក្ស មិនបាននិយាយចំៗដោយចំហរថាជាសត្រូវជាប្រទេសណា ឬជាមនុស្សណាម្នាក់នោះឡើយ ដោយគ្រាន់តែលើកយកអត្ថន័យប្រៀបធៀបនឹងលើកយកមករៀបរាប់ពីប្រវត្តិសាស្ត្រ ខ្មែរ បញ្ចូលក្នុងអត្ថន័យនៃបទចម្រៀងនេះតែប៉ុណ្ណោះ ហើយបទនេះដែរ ក៏មិនខុសពីបទមុនរបស់តារាចម្រៀងនោះដែរ គឺបទចម្រៀងដែលមិនត្រឹមតែផ្ដល់នូវការកម្សាន្តសម្រាប់ អ្នកនិយមចូលចិត្តស្ដាប់ចម្រៀងនោះឡើយ តែមានបង្កប់និងបញ្ចូលសារលើកពីប្រវត្តិសាស្ត្រឱ្យកូនខ្មែរបានស្ដាប់ហើយ អាចយកទៅសិក្សាបន្ថែមបាន៕
