កីឡាករ ឈុន ប៊ុនថន បានបង្ហោះសានៅលើកហ្វេសបុកបន្ទាប់ពីបញ្ចប់ការប្រកួតក្នុងការប្រកួតកីឡាអត្តពលកម្មកម្រិតទ្វីបអាស៊ី 2023 Asian Athletics Championships ដែលកំពុងរៀបចំនៅប្រទេសថៃ ថា៖«គ្រោះថ្នាក់ពេលប្រកួត។ សុំទោសបងប្អូនខ្ញុំព្យាយាមអស់ហើយបានត្រឹមបំបែកកំណត់ត្រាប្រទេសជាតិ ខ្ញុំសន្យាថាខ្ញុំនឹងប្រឹងហ្វឹកហាត់ឱ្យខ្លាំងជាងមុនទៀតដើម្បីកេត្តិយសកម្ពុជាក្នុងវិស័យកីឡារត់ប្រណាំង»។
ដោយការប្រកួតនៅថ្ងៃនេះ កីឡាករ ឈុន ប៊ុនថន ប្រកួតវិញ្ញាសា ៨០០ម៉ែត្របុរស អស់ឱកាសឡើងទៅកាន់វគ្គបន្តហើយ ក្រោយបញ្ចប់ត្រឹមចំណាត់ថ្នាក់លេខ១១ ដោយប្រើថេរវេលា ១:៥០:០៩នាទី។
សហព័ន្ធកីឡាអត្តពលកម្មកម្ពុជា បានបញ្ជូនប្រតិភូគ្រូបង្វឹក និងអត្តពលិកចំនួន ៥រូបចូលរួមប្រកួតកីឡាអត្តពលកម្មជ្រើសរើសជើងឯកអាស៊ី ឆ្នាំ២០២៣ (2023 Asian Athletics Championship) នៅទីក្រុងបាងកក ប្រទេសថៃ ដែលការប្រកួតប្រព្រឹត្តទៅ។ ក្នុងនោះអត្តពលិកចំនួន៣រូបទៅប្រកួតប្រជែង ដោយក្នុងនោះមាន៖
-កីឡាករ ឈុន ប៊ុនថន ប្រកួតវិញ្ញាសា ៨០០ម៉ែត្របុរស, ១៥០០ម៉ែត្របុរស
-កីឡាករ ណឹប ចាន់យូរ៉ុង ប្រកួតវិញ្ញាសា ១០០ម៉ែត្របុរស, ២០០ម៉ែត្របុរស
-កីឡាការិនី ពក ពិសី ប្រកួតវិញ្ញាសាលោតចម្ងាយនារី
គិតត្រឹមម៉ោង៥:៣០នាទីល្ងាច ថ្ងៃទី១៥ កក្កដា នេះ ប្រទេសជប៉ុន ដណ្ដើមបានមេដាយមាសច្រើនជាងគេ ចិនលេខ២ ឥណ្ឌា លេខ៣ ស្របពេលប្រទេសអាស៊ាន ៤ហើយដែលបានឈ្នះមេដាយមានម្ចាស់ផ្ទះថៃ សរុប ៥គ្រឿង(មាស១,ប្រាក់១,សំរឹទ្ធ៣) វៀតណាម សំរឹទ្ធ១គ្រឿង ហ្វីលីពីន មាស១គ្រឿង និងសិង្ហបុរី មាស ១គ្រឿង ក្នុងព្រឹត្តិការណ៍នេះ។
សម្រាប់ការប្រកួត 2023 Asian Athletics Championships លើកទី២៥ ធ្វើឡើងពីថ្ងៃទី១២ ដល់១៦ ខែកក្កដា ឆ្នាំ២០២៣ នឹងបានដាក់វិញ្ញាសាចំនួន៤៣ ឲ្យប្រកួតប្រជែង នៅពហុកីឡដ្ឋាន Supachalasai National Stadium រាជធានីបាងកក ប្រទេសថៃ ខណៈការប្រកួតលើកទី២៤ កន្លងទៅនៅ Hangzhou ប្រទេសចិន ប៉ុន្តែ ត្រូវរំសាយវិញ ដោយសារការរាតត្បាតនៃជំងឺកូវីដ-១៩៕
