ថ្ងៃនេះត្រយងសូមប្រមូលផ្ដុំនូវផ្ទះខ្មោចសណ្ឋិតដ៏ល្បីល្បាញខាងលងបន្លាចប៉ះសក់រហូតត្រូវបាននាំយកទៅផលិតភាពជាភាពយន្តតាមរយៈសាច់រឿងពិត ផ្ទះមួយកន្លែងៗមានរឿងរ៉ាវ រន្ធត់ ព្រឺព្រួច និង រំជួលព្រលឹងខុសៗគ្នា ចង់ដឹងថាផ្ទះខ្មោចលងនិមួយៗសាហាវដល់កម្រិតណា សូមតាមដានទស្សនាខាងក្រោម៖
១. The Amityvill horror ៖ ជាភាពយន្តផ្ទះខ្មោចសណ្ឋិតដែលផលិតចេញតាមឆ្អឹងរឿងពិត ហេតុការណ៍ខ្មោចលងពិតៗដែលគ្រួសារមួយត្រូវប្រឈមក្នុងផ្ទះមួយកន្លែង នាទីក្រុងឡុងដ៍ ចក្រភពអង់គ្លេស។ សមាជិកក្រុមគ្រួសារនោះបានជួបនឹងរឿងរ៉ាវព្រឺព្រួចភ្លាមៗក្រោយពេលដែលផ្លាស់ចូលទៅរស់នៅក្នុងផ្ទះនោះ។ បន្ទាប់ពីជួបហេតុការណ៍ចម្លែកៗ ធ្វើឱ្យចាប់ផ្ដើមតាមស៊ើបសួរ ស៊ើបចុះ ស៊ើបឡើងធ្វើឱ្យពួកបានដឹងថាកាលពីថ្ងៃទី១៣ ខែវិច្ឆិកា ឆ្នាំ១៩៧៤ វេលាម៉ោង៣ និង១៥នាទី (១ឆ្នាំ មុននឹងសមាជិកគ្រួសារពួកគេបានចូលមករស់នៅទីនេះ) កើតមានហេតុការណ៍ឃាតកម្មកើតឡើងនៅក្នុងផ្ទះមួយខ្នងនវដោយ Ronald DeFeo Jr. ដែលជាម្ចាស់ផ្ទះម្នាក់នៃផ្ទះមួយខ្នងនេះបានលួចកាំភ្លើងរបស់ឪពុកខ្លួនមកបាញ់សម្លាញ់សមាជិកក្នុងក្រុមគ្រួសារទាំងអស់៦នាក់បាត់បង់ជីវិត នៅពេលប៉ូលិសសួរចម្លើយគេបានឆ្លើយថាមានសំឡេងបញ្ជាឱ្យធ្វើទង្វើបែបនេះ ទីបំផុតគេត្រូវបានចាប់ឃុំឃាំងនិងជាប់គុកអស់មួយជីិវិត ហើយនេះគឺជាមូលហេតុដែលធ្វើឱ្យផ្ទះមួយខ្នងនេះក្លាយជាផ្ទះខ្មោចសណ្ឋិតដ៏សាហាវតាមលងបន្លាចគ្រួសាររបស់ Lutz ។
២. Winchester ៖ ភាពយន្តដែលសម្ដែងដោយ Helen Mirren គឺជារឿងបរិយាយពីមនុស្សសង់ផ្ទះឱ្យខ្មោចរស់នៅ ស្ដាប់ពីចម្លែកណាស់មែនទេ? ប៉ុន្តែនេះគឺជាការពិតមួយ ព្រោះរឿងនេះផលិតតាមសាច់រឿងពិតរបស់ Sarah Winchester ឬឈ្មោះមុនរៀបការ Sarah Lockwood Pardee នារីម្នាក់ដែលរៀបការជាមួយនឹង William Winchester អ្នកស្នងត្រកូលផលិតកាំភ្លើងគ្មានសំឡេង Rifle យីហោ Winchester តែបែរជាជួបរឿងអកុសលក្នុងជីវិត គួរឱ្យអាណិតជាទីបំផុតព្រោះ កូន ស្វាមី និងឪពុកក្មេក ស្រាប់តែស្លាប់បាត់បង់ជីិវិតយ៉ាងទាន់ហន់ចោលនាងឱ្យរស់នៅជាមួយនឹងមរតកតែម្នាក់ឯង។ Sarah បានសម្រេចចិត្តទិញផ្ទះមួយកន្លែង ដែលក្រោយមកផ្ទះនោះត្រូវបានគេហៅតៗគ្នាថា Winchester Mystery House (ផ្ទះអាថ៌កំបាំងត្រកូល Winchester)។ ផ្ទះដែលបានល្បីតៗគ្នាថាមានខ្មោចលងសាហាវនេះ គឺជាដើមកំណើតនៃភាពយន្តរន្ធត់ព្រឺព្រួច Winchester ។
៣. The Haunting in Connecticut ៖ គឺជាភាពយន្តខ្មោចគួរឱ្យខ្លាចសម្ដែងដោយ Virginia Madsen (វ៉ឺជិនៀ មេតសិន , Martin Donovan (ម៉ាទីន ដូណូវេន) និង Elias Koteas (អ៊ីលៀស គូធៀស)។ រឿងនេះផលិតតាមសាច់រឿងពិតរបស់គ្រួសារ នីដេកឺ (តែនៅក្នុងភាពយន្តប្ដូរដាក់ថា ខែមប៊ែល) ដែលបានផ្លាស់ទៅរស់នៅក្នុងផ្ទះជួលមួយកន្លែងក្បែរមន្ទីរពេទ្យ Connecticut ព្រោះកូនប្រុសម្នាក់មានជំងឺមហារីក។ ក្រោយពីបានផ្លាស់ទៅរស់នៅផ្ទះថ្មីក្រុមគ្រួសារមួយនេះបានជួបនឹងហេតុការណ៍ប្លែកៗជាច្រើន របស់់របរក្នុងផ្ទះអាចផ្លាស់ទីបានដោយខ្លួនឯង ទឹកសក្លាយជាពណ៌ក្រហមឈាមនិងមានក្លិនស្អុយ កូនៗមានអាកប្បកិរិយាប្លែកៗ ហើយក្នុងចំណោមនោះមើលឃើញខ្មោចរហូតសុំរ៉ើចេញពីផ្ទះថែមទៀតផង។ ចុងក្រោយសមាជិកក្នុងគ្រួសារក៏បានរកឃើញឧបករណ៍រៀបចំសពនៅជាន់ក្រោមដី ទើបធ្វើឱ្យដឹងថាផ្ទះនេះពីមុនធ្លាប់ជាកន្លែងរៀបចំបុណ្យសព (ហើយក្រោយមកក៏បានក្លាយជាផ្ទះខ្មោចសណ្ឋិត)។
៤. Poltergeist ៖ ភាពយន្តរំជួលព្រលឹងដែលផលិតដោយលោក Steven Spielberg ជារឿងរ៉ាវដែលបរិយាយពីគ្រួសារមួយត្រូវបិសាចតាមលងបន្លាច គប់បំផ្លាញរបស់របរ និងពង្រង់កូនស្រីយកទៅលាក់ទុក ដែលហេតុការណ៍ទាំងនេះគឺដកស្រង់ចេញពីហេតុការណ៍ដែលបានកើតឡើងពិតទៅលើគ្រួសារលោក Hermann នៅក្នុងផ្ទះមួយកន្លែងក្នុងក្រុង Long Island រដ្ឋ New York សហរដ្ឋអាមេរិក។ ចំណុចលងបន្លាចរបស់រឿង Poltergeist មិនទាន់អស់ត្រឹមតែប៉ុណ្ណេះទេ ព្រោះមានការនិយាយតៗគ្នាថារឿងនេះដូចជាត្រូវបណ្ដាសារ ដោយសារតែមានតារាសម្ដែងជាច្រើនរូបបានស្លាប់បាត់បង់ជីវិតមិនគួរឱ្យជឿ ថែមមានអ្នកខ្លះបានជួបនឹងហេតុការណ៍នឹងស្មានមិនដល់ថែមទៀតផង។
៥. The Conjuring III ៖ ភាពយន្តខ្មោចលងអមតៈដែលរកចំណូលបានច្រើនបំផុត ផលិតឡើងដោយ James Wan គឺជារឿងដែលបរិយាយពីរឿងរ៉ាវខ្មោចលងដ៏សែនព្រឺព្រួចរបស់គ្រួសារ Perron ដែលបានជួបក្រោយទៅរស់នៅក្នុងផ្ទះថ្មីមួយក្នុងក្រុង Harrisville រដ្ឋ Rhode Island ដោយសាច់រឿងនេះយកតាមបទពិសោធពិតរបស់ Ed និង Lorraine Warren គូស្នេហ៍អ្នកបង្ក្រាបខ្មោចដ៏ល្បី ដោយពួកគេបានរៀបរាប់ឱ្យដឹងថា គ្រួសាររបស់ Perron មានឪពុកម្ដាយ និងកូន៥នាក់ បានទៅរស់នៅក្នុងផ្ទះចំការថ្មីមួយដែលស្គាល់ឈ្មោះតាមរយៈរឿងគឺ Old Arnold Estate ហើយបានជួបនឹងហេតុការណ៍ប៉ះសក់ ដោយចាប់ផ្ដើមដំបូងពីតូចៗទៅជាមុនដូចជា បាត់របស់របរ សង្ហារឹមអាចផ្លាស់ទីបាន និងមានសំឡេងចម្លែកៗ រហូតដល់ត្រូវរុញទម្លាក់ដី ធ្វើបាបរាងកាយនិងចូលទៅសណ្ឋិតតែម្ដង។ ក្រោយសិក្សាស្រាវជ្រាវរកព័ត៌មានផ្សេងៗទើបដឹងថាផ្ទះនេះធ្លាប់ជាផ្ទះរបស់ត្រូកូលមួយដែលរស់នៅទីនេះជាយូរអង្វែងរហូតដល់ទៅ៨ជំនាន់៕ Andrea ជាកូនស្រីម្នាក់របស់គ្រួសារដែលត្រូវខ្មោចលងនេះបានថ្លែងសារព័ត៌មាន USA Today ថា «មនុស្សមានសិទ្ធិជឿលើអ្វីដែលចង់ជឿ ប៉ុន្តែខ្ញុំដឹងថាពួកខ្ញុំធ្លាប់មានបទពិសោធជួបនឹងអ្វីខ្លះ»។
ប្រភព៖ mentalfloss , screenrant , yardbarker
