សិល្បៈជាតិ៖ ម្ចាស់មកុដតំណាងប្រទេសកម្ពុជា ភឹម ស្រីនោ រមែងរងនូវមតិរិះគន់មួយចំនួនរហូតចុងក្រោយនេះអ្នកគាំទ្រក្ដី សិល្បកររៀមច្បងក្ដីបានចេញមកអំពាវនាវឱ្យនាំគ្នាផ្អាករិះគន់ទោះក្នុងន័យស្ថាបនា ដោយក្នុងចំណោមនោះក៏មានលោកជំទាវ ចន ច័ន្ទលក្ខិណា មួយរូបដែរដែលបានចេញមកសុំអង្វរឱ្យមានការផ្អាករិះគន់នេះ។
កាលពីថ្ងៃទី៨ ខែតុលា ឆ្នាំ២០២៣ លោកជំទាវបាន ចន ច័ន្ទលក្ខិណា បានសរសេររៀបរាប់ថា៖ «ក្នុងដំណាក់កាលនេះ មិនថាប្អូនស្រីធ្វើបានល្អ ឬ មិនសូវបានល្អ ទោះក្នុងចំណុចណា ឬ កាលៈទេសៈណា ក្នុងនាមយើងជាប្រជាជនខ្មែរ ត្រូវតែលើកទឹកចិត្តគាត់ ផ្តល់កំលាំងចិត្តគាត់ដើម្បីឱ្យគាត់មានថាមពលក្នុងការតស៊ូប្រឹងប្រែងក្នុងការលេងហ្គេមអន្តរជាតិនេះអោយបានទទួលភាពជោគជ័យ ឬ កិត្តិយសដ៏អស្ចារ្យសម្រាប់ប្រទេសយើង សូមមេត្តាកុំរិះគន់គាត់ទោះក្នុងន័យស្ថាបនាក៏ដោយក៏មិនមែនជាពេលនេះដែរ ព្រោះក្នុងស្ថានភាពបច្ចុប្បន្នគឺគាត់មិនមានពេលមើលការខមមិនស្ថាបនារបស់យើងនោះទេ គឺ ជាពេលដែលគាត់ត្រូវផ្ដោតអារម្មណ៍ប្រឹងប្រែងត្រងត្រាប់មើលគ្រប់សកម្មភាពរបស់ការប្រកួតមួយនេះ។ ពួកយើងត្រូវជឿជាក់លើគាត់ ក្នុងសមរភូមិត្រជាក់មួយនេះគាត់ដឹងច្បាស់ជាងយើងទៅទៀត ព្រោះគាត់ជាអ្នកឈរផ្ទាល់នៅចំណុចសមរភូមិមុខ ឯយើងនៅចំណុចសមរភូមិក្រោយ បើយកគាត់មកដាក់ក្នុងខ្លួនយើងគឺគាត់ចង់ឈ្នះការប្រកួតនេះជាងយើងទៅទៀត។ ហើយកុំភ្លេចថាការខមមិនទាំងឡាយគឺសុទ្ធតែជាពិន្ទុសម្រាប់គាត់ ហើយចំពោះអ្នកដែលមិនមែនជាហ្វេនរបស់គាត់សូមគិតថាពេលនេះគឺយើងគាំទ្រគាត់ដើម្បីកិត្តិយសប្រទេសយើង 
ស៊ូស៊ូប្អូនស្រី ពួកយើងជឿជាក់លើប្អូន បងជឿជាក់ថាប្អូនពិតជាធ្វើបានល្អគ្រប់សកម្មភាព និង គ្រប់វិញ្ញាសា។»
គួរដឹងថា លោកជំទាវ ចនច័ន្ទលក្ខិណា ដែលធ្លាប់ទទួលពានរង្វាន់តារាសម្ដែងឆ្នើមក្នុងរឿង ចៅពស់កេងកង នៅក្នុងមហោស្រពភាពយន្តជាតិឆ្នាំ ២០០៥ និងកំពុងសម្ដែងភាពយន្តខ្នាតធំ អប្សរាមហាអង្គររបស់អ្នកដឹកនាំនិងនិពន្ធឆ្នើម ហ្វៃ សំអាង តែងតែចូលរួមលើកទឹកចិត្ត និងចែករំលែកPost ក័ដូចជាជួយផ្សព្វផ្សាយពីបេក្ខភាពតំណាងប្រទេសកម្ពុជា Miss Grand Camboida កញ្ញា ភឹម ស្រីនោ ជានិច្ច៕
