នៅថ្ងៃទី២៧ ខែកក្កដា ឆ្នាំ ២០២១ នេះ តារាចម្រៀងល្បីរបស់ផលិតកម្មហង្សមាស លោក វង្ស តារារតនា បានផុសសំណេរអមដោយរូបថតជាច្រើនសន្លឹកបង្ហាញថាលោកត្រូវបុគ្គលមួយរូបតាមជេរប្រមាថថោកទាបនិងជាប់គុក ងាកមកក្រុមហ៊ុនហ្វេសប៊ុកវិញហាក់អយុត្តិធម៌ចំពោះលោកណាស់។
នៅក្នុងសំណេរនោះលោក វង្ស តារារតនាម្ចាស់បទចម្រៀងល្បី «ស៊ូឃ្លាត» បានបង្ហោះសំណេរលក្ខណៈហួសចិត្តមួយដែលរូបលោកនៅសុខៗសោះបែរជាត្រូវបានគេចូលមកជេរប្រមាថលោក មិនថាជាស៊ែរទៅជេរ ឬចូលមកជេរខាងក្រោមផុសដែលលោកបង្ហោះនោះទេ។
ពាក្យសម្ដីជេរប្រមាថដែលធ្វើឱ្យតារាចម្រៀងពុកមាត់ស្រម៉ូមរូបនេះរាងឆេះឆួលក្នុងអារម្មណ៍នោះគឺ លោកត្រូវបានអ្នកចូលមកខមមិនជេរថា៖ «យកពួកអាអ្នកជាប់គុកមកធ្វើតារាចម្រៀង អ៊ីចឹងបានបំផ្លាញសង្គម ចាក់សាក់បង្ហាញឱ្យក្មេងៗធ្វើតាមអាពួកថោកទាប»។
លោក វង្ស តារារតនា មិនបានតបតខ្លាំងទៅលើពាក្យជេរប្រមាថខាងលើនោះទេ លោកគ្រាន់តែផុសជារបៀបលេងសើចវិញថា «គេជេរហើយ ផុសមិនកើតទៀត បងFBហ្អើយបង…? អយុត្តិធម៌ណាស់…! ត្រង់ពេលគេជេរខ្ញុំ ម៉េចក៏ផុសកើត…?…ហ៎ាបង FB»
ក្រោយតារាចម្រៀងរូបនេះបង្ហោះសំណេរខាងលើបណ្ដាញសង្គមក៏មានមិត្តសិល្បករ ក៏ដូចជាសាធារណជនបានចូលមកហាមឃាត់កុំឱ្យគាត់ធ្វើការតបតព្រោះបារម្ភខ្លាចមានការព្រួតគ្នាមកវាយប្រហារលោកបន្ថែមទៀត ខណៈសាមីខ្លួនលោក វង្ស តារារតនាក៏បានយល់ស្របចំពោះយោបល់ណែនាំឱ្យលោកនៅស្ងៀមមិនតបតបផងដែរ៕
