តារាសម្ដែង- តារាចម្រៀងល្បីភេទទី៣របស់ថៃ លោក Aof Phongsak បានសម្រេចចាកចេញពីការសម្ដែងភាពយន្តភាគ Sitcom ដែលកំពុងបញ្ចាំងលើស្ថានីយទូរទស្សន៍ ONEHD ព្រោះសាមីខ្លួនលោកបានចេញមកបង្ហាញគោលជំហរផ្ទុយពីរដ្ឋាភិបាលលោកប្រាយុទ្ធ ចាន់អូចា។ នៅក្នុងនោះលោក AOF ថែមទាំងបាននិយាយទៀតថាភរិយាថ្នាក់ដឹកនាំរបស់ស្ថានីយមួយបាន Unfriend លោកព្រោះតែការយល់ឃើញមិនស្របគ្នាដែរថែមទៀតផង។
ពាក់ព័ន្ធនឹងការ Unfriend មានមតិខ្លះលើកឡើងថារឿងនេះកើតឡើងតាំងពីឆ្នាំមុនហេតុអ្វីទើបតែលើកយកមកនិយាយ? លោកបានឆ្លើយតបថាការពិតលោកបានស្នើសុំដកខ្លួនចេញពីការសម្ដែងតាំងពីឆ្នាំមុនមិនមែនទើបតែសុំដកខ្លួននោះទេ ប៉ុន្តែដោយសារតែមានការអង្វរពីក្រុមការងារ ប៉ុន្តែម្ដងនេះលោកសម្រេចចិត្តដាច់ស្រេចហើយថាចាកចេញ។
នៅក្នុងរឿង តួអង្គរបស់លោកបានចេញមកលា មិត្តភក្ដិរបស់ខ្លួន ដោយហេតុផលថា តួអង្គមួយនេះត្រូវចេញទៅក្រៅប្រទេសដើម្បីមើលថែបេះដូងរបស់គូស្នេហ៍ខ្លួន។
ការចាកចេញរបស់តារារូបនេះបានធ្វើឱ្យអ្នកទស្សនាដែលជាអ្នកគាំទ្របានចេញមករិះគន់យ៉ាងខ្លាំងដែលថ្នាក់ដឹកនាំចែកមិនដាច់រវាងរឿងការងារនិងរឿងផ្ទាល់ខ្លួន ដោយមតិខ្លះបានលើកឡើងថា «ស្រណោះណាស់ តាមដានរឿងនេះតាំងពីដំបូង តួអង្គដែល Aof សម្ដែងគឺជាពន្លឺសម្រាប់រឿង។ មិនគួរឱ្យជឿសោះថា ថ្នាក់ដឹកនាំប៉ុស្តិ៍នេះបែងចែកមិនដាច់មួយណារឿងផ្ទាល់ខ្លួន មួយណាការងារ។ បាត់តួអង្គណាម្នាក់ រឿងនេះលែងល្អមើលតៀតហើយ។» ក្នុងចំណោមខមមិនដ៏ច្រើនលើសលប់ចំពោះការសម្រេចចិត្តដើរចេញរបស់លោក មានខមមិនវិជ្ជមានជាច្រើនបានគោរពចំពោះការសម្រេចចិត្តរបស់លោក ខណៈមួយចំនួនទៀតបាននិយាយថាលាហើយ បើមិនគ្រប់គ្នាក៏មិនមើលរឿងនេះបន្តទៀតដែរ៕
លោក មិនមែនជាតារាទីមួយនោះទេ ដែលបានចេញមកបង្ហាញគោលជំហរប្រឆាំងចំពោះការដឹកនាំរបស់នាយករដ្ឋមន្ត្រី ប្រាយុទ្ធ ចាន់អូចា ពាក់ព័ន្ធនឹងការដោះស្រាយវិបត្តិកូវីដ-១៩ ថ្មីៗនេះតារាចម្រៀង Rapper វ័យក្មេងរបស់ថៃកញ្ញា Milli ធ្លាប់ត្រូវបានផាកពិន័យដោយសារតែចេញមកនិយាយពីបញ្ហាជំងឺកូវីដ-១៩ ប៉ុន្តែសាមីខ្លួនបានចេញមកប្រកាសថាទោះជាត្រូវផាកពិន័យក៏កញ្ញានៅតែមិនខ្លាចហើយនឹងបន្តនិយាយពីបញ្ហានេះជាបន្តទៀត៕
