លោក ខេមរៈ ភារុណ បងប្រុសតារាចម្រៀងដ៏ល្បី លោក ខេមរៈ សិរីមន្ត មិនថាទៅដល់ទីណាតែងតែឈឺឆ្អាលពីអភិបាលកិច្ចល្អ សោភ័ណ្ឌភាព អនាម័យបរិស្ថាន ហើយលោកតែងតែទន្ទេញជាប់មាត់ថាប្រសិនបើលោកបានធ្វើជាអភិបាលខេត្តលោកនឹងកែប្រែចំណុចមួយចំនួន។
យោងតាមគណនីរបស់លោក ខេមរៈ ភារុណ ដែលមានឈ្មោះជាភាសាអង់គ្លេស Chau Sopanha បានលើកឡើងជាច្រើនលើកច្រើនសារពីគោលបំណងចង់ធ្វើជាអភិបាលខេត្តរបស់លោក ដូចជាកាលពីថ្ងៃទី៣០ ខែឧសភា កន្លងទៅ លោក ខេមរៈ ភារុណ ធ្លាប់បានលើកឡើងនៅលើបណ្ដាញសង្គមហ្វេសប៊ុកពីគោលបំណងចង់ក្លាយជាអភិបាលខេត្តរបស់ខ្លួន ប្រសិនបើសម្ដេចតេជោផ្ដល់នូវសេចក្ដីទុកចិត្តចំពោះលោក។
សូមចុចអាន បងប្រុសតារាចម្រៀង ខេមរ: សិរីមន្ត មានមហិច្ឆិតាចង់ក្លាយជាអភិបាលរាជធានី-ខេត្ត!
លោក ខេមរៈ ភារុណ គ្រប់ដង្ហើមចេញចូលចិញ្ចឹមចិត្តចង់ធ្វើជាអភិបាលខេត្ត មិនថាទៅដល់ទីណានោះទេ លោក តែងតែសង្កេតនិងលើកឡើងពីបញ្ហាសេវាសាធារណៈ ការរៀបចំ ការគ្រប់គ្រងសណ្ដាប់ធ្នាប់នានានៅមិនទាន់បានល្អ មិនទាន់ត្រូវស្ដង់ដារ មិនទាន់មាន ដែលធ្វើឱ្យពេលខ្លះប្រជាពលរដ្ឋមានការត្អូញត្អែរជាអន្លើៗ។
យ៉ាងណាមិញអ្នកនិពន្ធទំនុកច្រៀងដ៏ល្បីរូបនេះ ជារឿុយៗរមែងលើកឡើងថាប្រសិនបើលោកមានឱកាសបានក្លាយជាអភិបាលខេត្ត លោកច្បាស់ជារៀបចំចាត់ចែងផ្លាស់ប្ដូរចំណុចអសកម្មមួយចំនួន កែប្រែឱ្យបានល្អ និងមានរបៀបរៀបរយដូចជា កាលពីពេលថ្មីៗនេះនៅពេលលោកមានឱកាសធ្វើដំណើរកម្សាន្តនៅរមណីដ្ឋានគិរីរម្យជាមួយនឹងឧត្តមភរិយា និង កូនស្រី ក៏នៅតែលើកឡើងពីក្ដីស្រមៃចង់ធ្វើជាអភិបាលរបស់លោក ព្រមទាំងបង្ហើបថាបើសិនលោកបានសម្រេចក្ដីស្រមៃលោកច្បាស់ជាប្រញាប់រៀបចំចាត់ចែងទៅតាមគម្រោងនិងផែនការដើម្បីកែប្រែមុខមាត់តំបន់។
ជាការកត់សម្គាល់លោក ខេមរៈ ភារុណ បច្ចុប្បន្នគឺជាយោធិនមួយរូបនៅក្នុងក្របខ័ណ្ឌក្រសួងការពារជាតិមានមុខងារជាឧត្តមសេនីយ៍ត្រី ខណៈដែលតំណែងអភិបាលខេត្ត ទាល់តែជាមន្ត្រីស្ថិតក្រោមក្របខ័ណ្ឌក្រសួងមហាផ្ទៃ ដូច្នេះទៅតាមនីតិវិធីត្រូវតែផ្ទេរពីក្រសួងការពារជាតិមកក្រសួងមហាផ្ទៃ ទើបអាចចាត់នីតិវិធីតែងតាំងជាអភិបាលបាន។ ប៉ុន្តែរឿងសំខាន់មួយទៀតនោះគឺកាលពីឆ្នាំមុន សម្ដេចនាយករដ្ឋមន្ត្រីតេជោ ហ៊ុន សែន បានចារប៊ិចក្រហម មិនអនុញ្ញាតឱ្យមានការផ្ទេរមន្ត្រីពីក្រសួងការពារជាតិទៅកាន់ក្រសួងមហាផ្ទៃជាបន្តទៀតឡើយ។
តើក្ដីសុបិនចង់ក្លាយជាអភិបាលរបស់លោក ខេមរៈ ភារុណ នាពេលអនាគត អាចនឹងសម្រេចបានជោគជ័យដែរទេ?
