សិល្បៈជាតិ៖ បច្ចុប្បន្ននេះសិល្បកររៀមច្បង លោក គួច ខេវិន មិនសូវជាមមាញឹកក្នុងរង្វង់សិល្បៈនោះឡើយ ដោយលោកបានងាកមកចំណាយពេលវេលាផ្ទាល់ខ្លួនលើការជួយការងារសង្គមវិញ។ ទោះជាដកឃ្លាឆ្ងាយពីសិល្បៈបន្តិចក្ដី តែក្នុងនាមជារៀមច្បងក្នុងសង្គមសិល្បៈ លោក គួច ខេវិន បានផ្ដល់ជាកិត្តិយសចូលរួមជាគណៈមេប្រយោគមួយរូបនៃកម្មវិធីប្រកួតលំដាប់អន្តរជាតិថ្មីមួយគឺ Miss Glamour Look Cambodia 2023។
ក្នុងវេលាដ៏មានតម្លៃនោះ សិល្បករជើងចាស់រូបនេះបានបង្ហាញចំណាប់អារម្មណ៍ផ្ទាល់ខ្លួន ចំពោះកម្មវិធីដែលមានចក្ខុវិស័យលើកកម្ពស់ចំពោះស្ត្រីជាពិសេសនេះ ក៏ដូចជាសម្ដែងនូវក្ដីរំភើបដែលវិស័យប្រកួតសម្រស់ក្នុងប្រទេសកម្ពុជាកាន់តែមានភាពខុសប្លែកជាងកាលពីពេលមុន។ ហើយក្នុងនាមជាមេប្រយោគផង និងក្នុងនាមជាអ្នកផលិតកម្មវិធីមានបទពិសោធន៍ច្រើននៅក្នុងវិស័យសិល្បៈផង លោក គួច ខេវិន បានឆ្លៀតផ្ដាំផ្ញើនិងចែករំលែកនូវសារដ៏មានអត្ថន័យទៅដល់បេក្ខនារី Top 10 និងអនាគតម្ចាស់មកុដដែលត្រូវត្រៀមខ្លួនតំណាងប្រទេសជាតិនៃរាត្រីផ្ដាច់ព្រ័ត្រផងដែរ។ ដើម្បីលម្អិតសូមទស្សនាវីដេអូព័ត៌មាននេះ ៖
គួរដឹងថា លោក គួច ខេវិន គឺជាអ្នកផលិតកម្មវិធីកម្សាន្ត ដ៏ជោគជ័យមួយរូបក្នុងរង្វង់សិល្បៈ ទាំងកម្មវិធីបែបបុរាណ និងសម័យ។ លោកជាផលិតករកម្មវិធីដែលមានបទពិសោធន៍ច្រើនជោគជាំ ព្រោះកន្លងមកលោកធ្លាប់ផលិតកម្មវិធីកម្សាន្ត ខនសឺត និងកម្មវិធីផ្សេងៗជាច្រើននៅបណ្ដាស្ថានីយទូរទស្សន៍ធំៗដូចជា អាស៊ីអាគ្នេយ៍ CTN និង PNN ជាដើម៕
