យោងតាមគណនីហ្វេសប៊ុកលោក លោក ម៉ែន និមលរ័ត្ន ជានាយកប្រតិបត្តិក្រុមហ៊ុនបង្ហាញម៉ូដ CIM បានបង្ហោះកាលពីថ្ងៃទី ២៨ ខែកក្កដា ឆ្នាំ ២០២១ បានឱ្យដឹងថាខណៈនេះលោកកំពុងតែត្រៀមបង្វឹកស្រីស្អាតមួយរូប និងប្រុសស្អាតពីររូបដើម្បីចេញទៅប្រកួតនៅបរទេស។
នាយកប្រតិបត្តិក្រុមហ៊ុនបង្ហាញម៉ូដ CIM បានឱ្យដឹងថាលោកបានត្រៀមប្រុសស្អាតពីររូបគឺលោក Raymond និងលោក Sophearith រួមទាំងកញ្ញា Pich បង្វឹកយ៉ាងម៉ត់ចត់ត្រៀមចេញទៅប្រកួតនៅក្រៅប្រទេសលើវេទិកាប្រកួតខុសៗគ្នាចំនួន៣ ក្នុងនោះ លោក Raymond ដែលបានចូលរួមជាគ្រួសារតែមួយជាមួយនឹង CIM Stars កាលពីខែវិច្ឆិកាឆ្នាំ២០២២ នឹងត្រៀមចូលរួមក្នុងកម្មវិធី Mister Ocean 2021 នៅប្រទេសចិន ដោយការប្រកួតមានប្រទេសចូលរួមជិត៥០ប្រទេស បច្ចុប្បន្ននេះមានប្រទេសចំនួន៣៣ហើយបានបញ្ជាក់សមាសភាពចូលរួម។ លោក Raymond គឺជាបុរសម្នាក់មានរូបរាងស្អាត និងមានចំណេះដឹងជ្រៅជ្រះ អាចនិយាយភាសាអង់គ្លេស និងចិនបានយ៉ាងស្ទាត់ជំនាញ មិនតែប៉ុណ្ណោះលោកមានបទពិសោធន៍ធ្វើការកម្រិតជាអ្នកគ្រប់គ្រងផងដែរ។
ចំណែកលោក Sophearith និងកញ្ញាដ៏ស្រស់សោភា Pich ដែលជាម្ចាស់ជ័យលាភី CIM Stars Photo Contest នឹងចូលរួមតំណាងប្រទេសកម្ពុជាក្នុងកម្មវិធី Miss & Mister Petite Global 2021/2022 នៅក្រុង Kuchin ប្រទេសម៉ាឡេស៊ី ប្រព្រឹត្តិឡើងចាប់ពីថ្ងៃទី២១-២៦ ខែកុម្ភៈ ឆ្នាំ២០២២។
បច្ចុប្បន្នប្រុសសង្ហា និងកញ្ញា ស្រស់សោភា ទាំង ៣រូប កំពុងតែសម្ងំហ្វឹកហាត់យ៉ាងខ្ជាប់ខ្ជួនក្រោមការគ្រប់គ្រងរបស់ក្រុមហ៊ុន CIM ដើម្បីចេញទៅប្រកួតព្រឹត្តិការណ៍ធំៗទាំងពីរដូចការរៀបរាប់ខាងលើនេះ៕
