ភ្នំពេញ៖​ អ្នកនាំអង្គភាពប្រឆាំងអំពើពុករលួយប្រាប់សារព័ត៌មានត្រយងនៅថ្ងៃទី០៣ ខែមករា ឆ្នាំ២០២៤នេះថា ព័ត៌មានជុំវិញការចាប់ឃាត់ខ្លួនលោក ខេ​ង យ័ន ​អភិបាលក្រុងកែបនិងនាយករដ្ឋបាលសាលាក្រុងកែបមួយរូបទៀត មកទល់ពេលនេះនៅពុំទាន់អាចបញ្ជាក់ព័ត៌មានបានជាផ្លូវការនៅឡើយនោះទេ។

លោក សយ ច័ន្ទ​វិចិត្រ អ្នកនាំពាក្យ​អង្គភាព​ប្រឆាំង​អំពើ​ពុក​រលួយបញ្ជាក់ថា រាល់ការចេញផ្សាយព័ត៌មានទាក់ទងការឃាត់ខ្លួនមន្រ្តីខាងលើនេះ គឺពុំមែនចេញពីអង្គភាពប្រឆាំងអំពើពុករលួយនោះឡើយ ហើយលោកថា បើសិនមានព័ត៌មានច្បាស់ការនោះអង្គភាពនឹងចេញផ្សាយជាសាធារណៈនៅទំព័រហ្វេសប៊ុកផ្លូវការ។

លោក សយ ច័ន្ទ​វិចិត្រ អ្នកនាំពាក្យ​អង្គភាព​ប្រឆាំង​អំពើ​ពុក​រលួយ។រូបភាពពីបណ្តាសារព័ត៌មានក្នុងស្រុក។

សូម​ជម្រាប​កាលពី​ថ្ងៃ​ទី​២ ខែមករា ម្សិលមិញមាន​ផ្សព្វផ្សាយព័ត៌មានយ៉ាងព្រោងព្រាត​ថា មាន​កម្លាំង​ខាង​អង្គភាព​ប្រឆាំង​អំពើ​ពុក​រលួយ បាន​ឃាត់ខ្លួន​លោក ខេ​ង យ័ន អភិបាល​ក្រុងកែប និង​នាយក​រដ្ឋបាល​សាលា​ក្រុងកែប ម្នាក់​ទៀត ។ ការ​ឃាត់ខ្លួន​នេះ នៅ​ទីតាំងសាលា​ក្រុងកែបតែម្តង បន្ទាប់ពី​ចប់​កិច្ចប្រជុំ​នៅ​វេលា​ម៉ោងជាង​១១​ព្រឹក ថ្ងៃ​ទី​២ ខែមករា ឆ្នាំ​២០២៤។

លោក ខេ​ង យ័ន អភិបាល​ក្រុងកែប ។

សារព័ត៌មានត្រយងបានព្យាយាមសុំការឆ្លើយតបបន្ថែមពីអ្នកនាំពាក្យសាលាខេត្តកែប តែលោកថាជាប់ប្រជុំនៅព្រឹកថ្ងៃទី០៣ ខែមករា នេះ។

តែយ៉ាងប្រភព​ក្រៅផ្លូវការដែលស្និតជាមួយអ្នកទាំងពីរប្រាប់ថា ពិតជាមានការ​ឃាត់ខ្លួន ដោយកម្លាំង​ខាង​អង្គភាព​ប្រឆាំង​អំពើ​ពុក​រលួយ បាន​នាំ​ខ្លួន​អភិបាល​ក្រុងកែប និង​នាយក​រដ្ឋបាល​សាលា​ក្រុងកែប មក​ស្តាប់​ចម្លើយ​នៅ​អង្គភាព​ប្រឆាំង​អំពើ​ពុក​រលួយ នៅ​រាជធានី​ភ្នំពេញ ថែមទៀតផង។​ តែយ៉ាងរឿងនេះ លោក សយ ច័ន្ទ​វិចិត្រ អ្នកនាំពាក្យ​អង្គភាព​ប្រឆាំង​អំពើ​ពុក​រលួយ នៅតែអះអាងដដែលថា ជាដំណឹងមិនផ្លូវការ៕

Share.