សិល្បៈជាតិ៖ ល្ខោនតន្ត្រី រាជនីសំឡេងមាស ឬក៏ The Golden Voice Live Musical គឺជាផ្ទាំងទស្សនីយភាព ល្ខោនតន្ត្រីជាលើកដំបូងនៅកម្ពុជា ដែលបានដកស្រង់ចេញពីខ្សែជីវិតរបស់លោកស្រី រស់ សេរីសុទ្ធា ដែលជានិមិត្តរូបនៃក្តីសង្ឃឹម ជំនះនូវរាល់ឧបសគ្គក្នុងអាជីពសិល្ប: ក្នុងសង្គមខ្មែរក្នុងទស្សវត្សន៍ 1970។

ព្រឹត្តិការណ៍ដ៏ធំប្រចាំឆ្នាំមួយនេះ ទើបតែតំឡើងឱ្យសម្ដែងជូនទស្សនាជាលើកដំបូងនៅក្នុងព្រះរាជាណាចក្រកម្ពុជា តាមរយៈអង្គការសកម្មភាពសិល្ប:ខ្មែរ និងគូសហការទាំងអស់។ ថ្មីៗនេះ អង្គការសកម្មភាពសិល្ប:ខ្មែរ ក៏បានប្រកាសជ្រើសរើសតួធំ ចំនួន៨រូប ចូលរួមសម្ដែង ហើយសម្រាប់អ្នកស្នេហាសិល្ប:មានបំណងសម្ដែងជាតួអង្គក្នុងសាច់រឿងដែលឆ្លុះបញ្ចាំងពីខ្សែជីវិតរបស់ រាជនីសំឡេងមាស លោកស្រី រស់ សេរីសុទ្ធា ក៏អាចដាក់ពាក្យមកបានផងដែរ។
ក្នុងនោះគឺមានការជ្រើសរើសតួសំដែងទាំង ៨ រួមមាន៖ ១)លោកស្រី រស់ សេរីសុទ្ធា ២)លោកស្រី ណាត់ សាមៀន ៣)លោក រស់ សុគន្ធា ៤)លោក ស៊ីន ស៊ីសាមុត ៥)លោក សេង យុត ៦)លោក សុសម៉ាត់ ៧)លោក ហ៊ុយ ស៊ីផាន់ ៨)លោក អ៊ឹម សុងសឹម។


គួររំលឹកដែរថា លោកស្រី រស់ សេរីសុទ្ធា កើតនៅថ្ងៃទី ៦ ខែវិច្ឆិកា ឆ្នាំ១៩៤៦ មានស្រុកកំណើតភូមិដំណាក់ហ្លួង ឃុំវត្តគរ ស្រុកបាត់ដំបង ខេត្តបាត់ដំបង លោកស្រីមានឪពុកឈ្មោះ រស់ ប៊ុន ជាលោកគ្រូភ្លេងខ្មែរផង និងជាគ្រូស្តោះផ្លុំផង និងម្តាយឈ្មោះ ណាត់ សាមៀន ហើយលោកស្រីមានបងប្អូនចំនួន ៥ នាក់ (ស្រី ០៤ នាក់) ហើយលោកស្រីជាកូនទី ៤ ។ លោកស្រីចូលរៀននៅសាលាបឋមសិក្សា ទក្ខិណសាលា រួចបានប្រឡងជាប់ចូលរៀននៅអនុវិទ្យាល័យនារី នេតយ៉ង់ នៅឆ្នាំ ១៩៦២ រួចឈប់រៀន ដើម្បីចាប់អាជីពជាអ្នកចម្រៀង។ ក្រោយមកលោកស្រីបានបាត់បង់ជីវិតនៅក្នុងសម័យខ្មែរក្រហម ដោយអង្គការបានហៅលោកស្រី ទៅកសាងអប់រំ ។ ចាប់តាំងពីថ្ងៃនោះមក គ្មាននរណាម្នាក់បានដឹងដំណឹងពីអ្នកស្រីទៀតឡើយ៕

