សិល្បៈជាតិ៖ បទ​ចម្រៀង​ថ្មី​របស់ នេន​ទុំ  «បើក​ទំព័រ​សាស្ត្រា» បានចេញ​មួយរយៈ​មកហើយ ហើយ​បទ​នេះ​ក៏​ទទួលបាន​ការនិយម​ចូលចិត្ត​និង​សរសើរ​ច្រើន​ពី​សំណាក់​អ្នកគាំទ្រ​ផងដែរ។ ប៉ុន្តែ​មាន​អ្នកណា​ទៅ​ដឹងថា​ទម្រាំ​នឹង​បទ​ចម្រៀង​ដ៏​ពីរោះ និង​ប្រកបដោយ​អត្ថន័យ​របស់ នេន​ទុំ មួយ​នេះ អាច​ចេញ​ជា​រូបរាង ត្រូវ​ឆ្លងកាត់​ការ​អស់សង្ឃឹម និង​បាក់​ទឹកចិត្ត​ដល់​កម្រិតណា?

ក្រោយ​ចេញ Audio បទ​ចម្រៀង​ថ្មី​របស់ខ្លួន​នៅលើ​បណ្ដាញ​សង្គម នេន​ទុំ បាន​ខិតខំ​ស្វះ​ស្វែងរក​ស្ព​ន់​សឺ​ដើម្បី​ផលិត​វីដេអូ​បទ​ចម្រៀង​មួយ​នេះ​ឱ្យចេញ​ជា​រូបរាង តែ​គួរឱ្យ​សោកស្ដាយ​ដែល​ក្រុមហ៊ុន​ជាច្រើន​បាន​បដិសេធ​មិន​ផ្ដល់​ការឧបត្ថម្ភ ដោយ​ក្រុមហ៊ុន​ខ្លះ​បាន​បោះសម្ដី​ថា បទ​ចម្រៀង​របស់លោក​មួយ​នេះ​គ្មាន​គុណភាព។ សម្ដី​ចាក់​ដោត​ទាំងអស់នេះ​បានធ្វើឱ្យ​លោក​មាន​អារម្មណ៍​អស់សង្ឃឹម​និង​ធ្លាក់​ទឹកចិត្ត​ជាខ្លាំង ព្រោះ​តាំងពី​លោក​ប្រឡូក​ចូលក្នុង​វិស័យ​សិល្បៈ​មកដល់​បច្ចុប្បន្ន​មាន​រយៈពេល​មិនតិចជាង២០ឆ្នាំ​នោះឡើយ តែ​ស្នាដៃ​របស់លោក​នៅតែ​ត្រូវបាន​គេ​រើសអើង​ដដែល។

យ៉ាងណាមិញ បទ​ចម្រៀង​ដែលជា​កម្លាំង​ញើស​ឈាម លោក​ខំ​ផលិត​នេះ មិន​អសារ​បង់​នោះទេ ព្រោះ​មាន​អ្នកជំនួញ​ចិត្តធម៌ លូកដៃ​ចូលមក​ជួយ។ គេ​អាច​ដឹងបាន​អ្នក​ដែល​បោះដៃ​ជួយ​ឱ្យ​បទ​ចម្រៀង​របស់ នេន​ទុំ លេចចេញ​ជា​រូបរាង​នោះ​គឺជា​ម៉ា​ដាម ដា អ្នកជំនួញ​អន​ឡាញ​ដ៏​មាន​ប្រជាប្រិយ ហើយក៏​ជា​បុគ្គល​ដ៏​មាន​ឥទ្ធិពល​មួយរូប​ក្នុង​បណ្ដាញ​សង្គម តាមរយៈ ការ​ចូលមក​ស៊ែរ Caption របស់ ម៉ា​ដាម ដា ពី​សំណាក់ នេន​ទុំ ដោយ​ម៉ា​ដាម ដា បានសរសេរថា៖ ជោគជ័យ​ជាមួយ​អ្វីដែល​បង​ស្រលាញ់ បងប្រុស​នេន​ទុំ។

ភ្ជាប់​ជាមួយ​ការចែករំលែក​នេះ នេន​ទុំ បានបង្ហាញ​ពី​ក្ដីរំភើប​រីករាយ​របស់ខ្លួន​ថា៖ «កិ​ត្ត​យស​និង​សេចក្តីរំភើប​ខ្លាំងណាស់​សំរាប់​រូប​បង ប្អូនស្រី MADAM DAប្អូន​ជួយ​ជ្រោមជ្រែង ផ្តល់​ក្តី​ស​ម្ឃឹ​ម​ថ្មី ដល់​ការផលិត​បទ ( បើក​ទំព័រ​សា​ស្រា្ត ) ក៏​អរគុណ​បងប្អូន​ទាំងអស់គ្នា​ដែល ស្រឡាញ់ និង លើកទឹកចិត្ត​ដល់​រូបខ្ញុំ ពេលនេះ​បទ​របស់ខ្ញុំ​មានសង្ឃឹម​ហើយ»។

ជាការ​កត់សម្គាល់ នេះ​មិនមែនជា​លើកទីមួយ​ឡើយ ដែល​ស្ត្រី​ជា​អ្នកជំនួញ​អន​ឡាញ​ដ៏​លេចធ្លោ​រូបនេះ បានចេញ​មុខ​ជួយ​ឈឺឆ្អាល និង​ដោះស្រាយ​បញ្ហា​សម្រាប់​អ្នក​ដែល​កំពុង​ជួបប្រទះ​នឹង​ឧបសគ្គផ្សេង។ ម៉ា​ដាម ដា មិនមែន​ជួយ​តែ​មនុស្ស​នៅក្នុង​រង្វង់​សិល្បៈ​ដូចជា នេន​ទុំ នោះឡើយ តែកន្លងៗមក ម៉ា​ដាម បាន​ស្ម័គ្រចិត្ត​ចំណាយធនធាន​ផ្ទាល់ខ្លួន ជួយ​កិច្ចការងារ​សង្គម និង​ការងារ​សប្បុរសធម៌​ដូចជា ជួយ​ដល់​ជន​ទុរគត កុមារកំព្រា និង​មន្ទីរពេទ្យ​ជាដើម ដូចជា​កាលពីពេលថ្មីៗនេះ ម៉ា​ដាម​ដា បាន​ដឹកនាំ​ក្រុមការងារ ចុះ​ផ្ទាល់ ទៅ​ចែក​អំណោយ​ដល់​សិស្សានុសិស្ស និង មន្ទីរពេទ្យបង្អែក​ខេត្តមណ្ឌលគិរី ផងដែរ៕

Share.