ខ្សែប្រយុទ្ធ កែវ សុខផេង អតីតកីឡាកររបស់វិសាខា និងភ្នំពេញក្រោន បានប្រកាសដាក់ដេញថ្លៃស្បែកជើង១គូ ដែលរូបគេពាក់ក្នុងព្រឹត្តិការណ៍ស៊ីហ្គេម លើកទី៣០ ឆ្នាំ២០១៩ នៅប្រទេសហ្វីលីពីន ក្រោយជួយឲ្យក្រុមជម្រើសជាតិកម្ពុជា ឡើងវគ្គពាក់កណ្តាលផ្តាច់ព្រ័ត្រជាលើកដំបូងក្នុងរយ:ពេល៦៩ឆ្នាំ តម្លៃ១លានរៀល ដើម្បីជួយមន្ទីររពេទ្យគន្ធបុប្ផា។
កែវ សុខផេង បានថ្លែងដូច្នេះថា៖«បាទជម្រាបសួរពុកម៉ែបងប្អូនទាំងអស់គ្នា ថ្ងៃនេះខ្ញុំចង់ប្រកាសដាក់ដេញថ្លៃស្បែកជើងមួយគូ។ដែលវាមានតម្លៃសម្រាប់ខ្ញុំខ្លាំងណាស់ព្រោះឆ្នាំ ២០១៩ ខ្ញុំបានទៅលេងវិញ្ញាសាបាល់ទាត់ SEA Games នៅហ្វីលីពីន ហើយក្រុមជម្រើសជាតិកម្ពុជាយើងក៏បានឆ្លងវគ្គ៤ក្រុមចុងក្រោយជាប្រវត្តិសា្រស្តរយះពេល៦៩ឆ្នាំ ដែលយើងមិនបានឆ្លងវគ្គនិង។បន្តាប់មកហើយពេលដែលចប់ SEA Games ភ្លាមខ្ញុំក៏ថែរក្សាស្បែកជើង១គូនេះទុកជាអនុស្សាវរីយ៍រយៈពេល ៦ឆ្នាំមកហើយប៉ុន្តែ បេះដូង និងចិត្តចង់ជួយដល់មន្ទីរពេទ្យគន្ធបុប្ផាខ្ញុំសម្រេចចិត្តដាក់ដេញថ្លៃចំនួន (មួយលានរៀល) ថវិការទាំងអស់ខ្ញុំនឹងយកជូនមន្ទីររពេទ្យគន្ធបុប្ផា»។
គួរដឹងថា កែវ សុខផេង បានប្រកាសចូលនិវត្តន៍ កាលពីថ្ងៃទី៥ ខែមេសា ឆ្នាំ២០២៣ បន្ទាប់ពីចំណាយពេលអស់រយៈពេល ១១ឆ្នាំ ក្រោយផ្ដើមលេងបាល់ទាត់កម្រិតអាជីពក្នុងក្រុមចំការកៅស៊ូបឹងកេត ឆ្នាំ២០១២ ហើយរួមចំណែកបានចំណាត់ថ្នាក់លេខ៣ ពានសម្ដេចតេជោ ហ៊ុន សែន ថ្នាក់ជាតិ ឆ្នាំ២០១៤។
ក្នុងអាជីបាល់ទាត់ កីឡាករមានប្រភពពីខេត្តក្រចេះ រូបនេះបានបង្ហាញសក្ដានុពលខ្លាំងបំផុត គឺអំឡុងឆ្នាំ២០១៥-២០១៨ នៅតំបន់ប្រយុទ្ធ ដោយមានដៃគូសហការពី ចាន់ វឌ្ឍនាកា និងប្រាក់ មុនីឧត្តម នៅក្នុងក្រុមបាល់ទាត់ជម្រើសជាតិកម្ពុជា។
នៅថ្ងៃទី៣០ ខែឧសភា ឆ្នាំ២០១៨ បានចូលរួមជាមួយវិសាខា ហើយនៅឆ្នាំ២០១៩ ប្អូនប្រុសអតីតខ្សែប្រយុទ្ធ កែវ សុខង៉ន បានរួមចំណែកជួយវិសាខាបានលេខ ៣។ ប៉ុន្តែចាប់ពីឆ្នាំ២០២០ដល់២០២២ គេបានរួមចំណែកឈ្នះជើងឯកពានរង្វាន់ សម្ដេចតេជោ ហ៊ុន សែន ថ្នាក់ជាតិ ៣លើកជាប់គ្នានៅវិសាខា ដែលជាកំណត់ត្រាថ្មីមិនធ្លាប់មានពីមុខមក។
ជាមួយគ្នានេះ កែវ សុខផេង ក៏ធ្លាប់បានស្បែកជើងមាសថ្នាក់ជាតិ ក្នុងរដូវកាល២០២១ ផងដែរ ដោយរកបាន៧គ្រាប់។ លើសពីនេះកីឡាកររូបនេះ បានបង្ហាញខ្លួនឲ្យក្រុមជម្រើសជាតិ ដែលរាប់បញ្ចូលការប្រកួតក្រុមជម្រើសជាតិអាយុក្រោម ២២ឆ្នាំផងដែរនោះ បានចំនួន ៥៩លើក និងគ្រាប់បាល់សរុបចំនួន ១៤គ្រាប់។
កីឡាករ កែវ សុខផេង កើតនៅថ្ងៃទី ៣ ខែមិនា ឆ្នាំ១៩៩២ នៅភូមិរការកណ្ដាល សង្កាត់រការកណ្ដាល ក្រុងក្រចេះ ខេត្តក្រចេះ។ បច្ចុប្បន្ន សុខផេង កំពុងលេងអោយក្លឹប វិសាខា ហើយក៏ជាកីឡាករជម្រើសជាតិផងដែរ។ ជាប្អូនប្រុសបង្កើតរបស់កីឡាករ កែវ សុខង៉ន ដែលក៏ជាអតីតកីឡាករជម្រើសជាតិ៕
