ក្រុមជើងឯកពានរង្វាន់បាល់ទាត់ក្នុងសាលTIGER ឆ្នាំ២០២០ ក្លិបតារាមហាហង្ស (Mohahang All Star FC) ជាក្លិបបាល់ទាត់ហ្វូតសាលទី៣ របស់កម្ពុជា មានឈ្មោះចេញទៅចូលរួមប្រកួតជើងឯកតំបន់អាស៊ាន AFF Futsal Club Championship បន្ទាប់ពីក្រុមកំចាយមារអែហ្វស៊ី និងក្រុមដោនថោនស្ពតអែហ្វស៊ី។
ពានរង្វាន់ AFF Futsal Club Championship នៅខេត្ត Ratchashima ប្រទេសថៃ ពីថ្ងៃទី១២ដល់១៨ ខែកញ្ញា ឆ្នាំ២០២១ នៅប្រទេសថៃ ដោយមានក្រុមចំនួន៦ក្នុងតំបន់ប្រកាសចូលរួម ក្នុងនោះមាន៖
-ក្រុម Port ASM របស់ថៃ
-ក្រុម Sahako FC របស់វៀតណាម
-MIU FC របស់មីយ៉ាន់ម៉ា
-Mohahang All Star FC របស់កម្ពុជា
-Selangor FA របស់ម៉ាឡេស៊ី
-SKN FC Kabumen របស់ឥណ្ឌូណេស៊ី
ពានរង្វាន់ AFF Futsal Club Championship រៀបចំឡើងដំបូងកាលពីឆ្នាំ២០១៥ ហើយក្នុងនោះក្រុមមកពីប្រទេសថៃ ឈ្នះជើងឯកគ្រប់សម័យកាលដោយក្រុម Port ឈ្នះ៣លើក ក្រុម Bangkok BTS FC និងក្រុម Chonburi Bluewave ម្នាក់១លើក។
ចំពោះកម្ពុជា ធ្លាប់បានបញ្ជូនក្រុមទៅចូលរួមប្រកួតចំនួន២លើកមកហើយដោយក្នុងនោះនៅឆ្នាំ២០១៨ ក្រុមកំចាយមារអែហ្វស៊ី បានចូលរួមប្រកួត ដោយស្ថិតនៅបាតតារាងពូល A ក្រោយចាញ់ក្រុម East Coast Heat របស់អូស្រ្តាលី ៨-០ បន្តចាញ់ក្រុម MIC របស់មីយ៉ាន់ម៉ា ៤-២ និងចាញ់ក្រុម Arbisyam របស់ប្រ៊ុយណេ ៧-៦។
ដោយឡែកនៅឆ្នាំ២០១៩ វិញក្រុមដោនថោនអែហ្វស៊ី បានចូលរួមតំណាងឱ្យកម្ពុជា ដោយប្រកួតឈ្នះលើក្រុម Melaka United ដោយលទ្ធផល៥-៤ ហើយបន្តចាញ់ក្រុម MIU របស់មីយ៉ាន់ម៉ា ៩-៣។ ក្រុមនេះឈរចំណាត់ថ្នាក់លេខ២ ក្នុងពូល B ហើយមានឈ្មោះឡើងទៅវគ្គពាក់កណ្ដាលផ្ដាច់ព្រ័ត្រ ដោយប៉ះក្រុម Chonburi Bluewave របស់ថៃ តែចាញ់ ១៧-០ និងបន្តចាញ់ក្រុម MIU ដោយលទ្ធផល៩-៥៕
