ជល់មាន់ អាជ្ញាធរខណ្ឌដង្កោ ឆ្មក់បង្ក្រាបកន្លែងជល់មាន់ ដកហូតបានរថយន្តនឹងម៉ូតូ

ភ្នំពេញ ៖  កម្លាំងសមត្ថកិច្ចចម្រុះ នៃគណៈបញ្ជាការឯកភាពខណ្ឌដង្កោ បានឆ្មក់ចុះបង្ក្រាបទីតាំងជល់មាន់មួយកន្លែង ក្នុងភូមិបាគូរ សង្កាត់ដង្កោ ខណ្ឌដង្កោ កាលពីវេលាម៉ោង១រសៀល  ថ្ងៃទី២៤  ខែសីហា  ឆ្នាំ ២០២១ ដោយដកហូតវត្ថុតាងមួយចំនួន  រីឯអ្នកលេងរត់បាត់អស់។

ប្រតិបត្តិការណ៍ខាងលើនេះ  មានការចូលរួមសហការពីកម្លាំងគណៈបញ្ជាការឯកភាពខណ្ឌដង្កោ  កម្លាំងសមត្ថកិច្ចប៉ុស្ដិ៍រដ្ឋបាលដង្កោ  និងមន្ត្រីជំនាញព្រហ្មទណ្ឌខណ្ឌដង្កោ  បានធ្វើការចុះបង្ក្រាបទីតាំងជល់មាន់ខាងលើ  តែក្រុមអ្នកញៀនល្បែងដឹងខ្លួនទាន់នាំគ្នារត់គេចខ្លួនបាត់អស់  ដោយបន្សល់ទុកតែរថយន្តចំនួន២គ្រឿងម៉ាក Ford Ranger ពណ៌ស  ពាក់ស្លាកលេខភ្នំពេញ  2BF-8779 និង Toyota Prius ពណ៌ខៀវ  ពាក់ស្លាកលេខ ភ្នំពេញ  2BD-4775 និងម៉ូតូចំនួន៥គ្រឿង មាន់១ក្បាល  ។

ក្រោយពីបញ្ចប់ប្រតិបត្តិការណ៍នេះរួចរាល់  កម្លាំងគណៈបញ្ជាការឯកភាពខណ្ឌដង្កោ  បានធ្វើការដឹកបញ្ចូនវត្ថុតាងមករក្សាទុកនៅប៉ុស្ដិ៍នគរបាលរដ្ឋបាលដង្កោ  ដើម្បីឲ្យមន្ត្រីយុត្តិធម៌អនុវត្តន៍តាមនីតិវិធី ៕