នៅមុននេះបន្តិចភរិយា អតីតតារាសម្ដែងល្បីលោក ស៊ុក សុភា ហៅខៀវ អ្នកនាង សារីណា បានប្រកាសតាមរយៈបណ្ដាញសង្គមថា អ្នកទាំងពីរបានលែងលះគ្នារួចហើយ។
នៅក្នុងថ្ងៃទី២៦ខែសីហាឆ្នាំ២០២១ វេលាម៉ោង១២ អ្នកនាង សារីណា បានចេញមកបង្ហោះសំណេរខ្លី ដែលមានន័យបញ្ជាក់យ៉ាងច្បាស់ថា រវាងអ្នកនាង និង តួអង្គនេនទុំ បានផ្ដាច់ចំណងអាពាហ៍ពិពាហ៍ជាមួយគ្នារួចរាល់ហើយ ដូច្នេះរវាងអ្នកទាំងពីរមិនមានជាប់ពាក់ព័ន្ធអ្វីនឹងគ្នាទៀតនោះទេ ម្នាក់ៗមានសិទ្ធិរៀងៗខ្លួន។
ថ្វីត្បិតតែអ្នកនាងបានបង្ហោះពីដំណឹងលែងលះឱ្យអ្នកគាំទ្របានដឹងក៏ពិតមែន ប៉ុន្តែអ្នកនាង មិនបានបកស្រាយបញ្ជាក់ឱ្យច្បាស់ពីមូលហេតុនៃការចែកផ្លូវគ្នានោះដែរ ដោយអ្នកនាងគ្រាន់តែបញ្ជាក់ខ្លីៗ ត្រឹមតែពាក្យថា «ឆ្អែត» មួយម៉ាត់ប៉ុណ្ណោះ។
ក្នុងសំណេរដែលបង្ហោះដោយអ្នកនាង សារីណា មានខ្លឹមសារទាំងស្រុងយ៉ាងដូច្នេះ៖
«សុំជូនដំណឹងដល់បងប្អូនទាំងអស់គ្នា អោយបានដឹងថា៖ ខ្ញុំនិង ស៊ុក សុភា លែងលះគ្នាហើយ ដូច្នេះចាប់ពីថ្ងៃនេះទៅ គាត់ធ្វើអ្វីជាសិទ្ធរបស់គាត់ រីឯខ្ញុំក៏ជាសិទ្ធរបស់ខ្ញុំ។មូលហេតុ សុំមិនបកស្រាយ មានតែពាក្យថា ឆ្អែត!»
