ក្នុងឱកាសរំឭកខួបអនុស្សាវរីយ៍លើកទី ៧៩ នៃការបង្កើតកងកម្លាំងនគរបាលជាតិ ឯកឧត្ដមអភិសន្តិបណ្ឌិត ស សុខា តំណាងដ៏ខ្ពង់ខ្ពស់នៃសម្ដេចមហាបវរធិបតី ហ៊ុន ម៉ាណែត បានថ្លែងកោតសរសើរដល់វីរភាពនៃកម្លាំងនគរបាលជាតិ ដែលបានកសាងស្នាដៃជាប្រវត្តិសាស្ត្រជាច្រើនជូនប្រទេសជាតិ។ ចាប់តាំងពីបង្កើតឡើងដំបូងនៅឆ្នាំ ១៩៤៥ រហូតដល់បច្ចុប្បន្ន ត្រឹមឆ្នាំ ២០២៤ នេះ លើកលែងតែក្នុងរបបខ្មែរក្រហម កងកម្លាំងនគរបាលជាតិ បានដើរតួនាទីជាអ្នករក្សាសណ្ដាប់ធ្នាប់សង្គម រក្សាសន្តិសុខសុវត្ថិភាព ធានាការគោរពសិទ្ធិមនុស្ស អប់រំណែនាំប្រជាជន និងជំរុញឲ្យមានការគោរពច្បាប់ ការពារ និងជួយសង្គ្រោះ បង្ការ និងបង្ក្រាបគ្រប់បទល្មើស ដែលបង្កហានិភ័យដល់សង្គមជាតិ រក្សាស្ថិរភាពនយោបាយ និងភារកិច្ចផ្សេងៗទៀត។ នៅអំឡុងពេលប្រទេសមានសង្គ្រាមផ្ទៃក្នុង បែកបាក់ច្រើនភាគី នគរបាលតែងឈរនៅកៀកជាប់នឹងប្រជាជនចាំជួយការពារ និងសង្គ្រោះ សហការយ៉ាងជិតស្និទ្ធជាមួយកងទ័ពដើម្បីបង្ក្រាបពួកបះបោរ ដែលប៉ុនប៉ងបង្កភ័យព្រួយដល់ប្រទេសជាតិ ចូលរួមយ៉ាងសកម្មក្នុងការបង្រួបបង្រួមជាតិតាមនយោបាយឈ្នះៗរបស់រដ្ឋាភិបាល រហូតទទួលបានឯកភាពជាតិទ្រាំងស្រុង។
ឯកឧត្ដមអភិសន្តិបណ្ឌិតគូសបញ្ជាក់បន្ថែមថា មិនថាប្រទេសជាតិស្ថិតក្នុងសភាពការណ៍បែបណានោះទេ នគរបាលតែដើរតួនាទីយ៉ាងសំខាន់ ហើយមានវីរៈមន្ត្រីនគរបាលជាច្រើនរូប បានពលីក្នុងបុព្វហេតុបំពេញភារកិច្ចរបស់ខ្លួនផងដែរ។ ពួកគាត់សុទ្ធតែជាគំរូនៃវីរភាព អង់អាចក្លាហាន និងស្មោះត្រង់ចំពោះប្រទេសជាតិ។
ខួបអនុស្សាវរីយ៍លើកទី ៧៩ នៃការបង្កើតកងកម្លាំងនគរបាល ត្រូវបានរៀបចំឡើងនៅទីស្ដីការក្រសួងមហាផ្ទៃ នាព្រឹកថ្ងៃទី ១៦ ខែឧសភា ឆ្នាំ២០២៤ ក្រោមអធិបតីភាពឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ តំណាងដ៏ខ្ពង់ខ្ពស់នៃសម្ដេចមហាបវរធិបតី ហ៊ុន ម៉ាណែត។
គោលបំណងសំខាន់នៃការប្រារព្ធខួបអនុស្សាវរីយ៍នៃការបង្កើតកងកម្លាំងនគរបាល គឺ ទី១ ដើម្បីផ្សព្វផ្សាយដល់មតិជាតិ អន្តរជាតិ និងកងកម្លាំងនគរបាលជាតិទូទាំងប្រទេសឲ្យបានដឹងអំពីថ្ងៃបង្កើតកើតឡើងរបស់នគរបាលជាតិ។ ទី២ ដើម្បីស្រាវជ្រាវយកមកផ្សព្វផ្សាយនូវប្រវត្តិសកម្មភាព សមិទ្ធផល ស្នាដៃរបស់កងកម្លាំងនគរបាលជាតិដែលបានបង្កើតឡើងតាមដំណាក់កាលនីមួយៗ ដើម្បីបុព្វហេតុជាតិ សន្តិសុខជាតិ សណ្ដាប់ធ្នាប់សាធារណៈ និងសុវត្ថិភាពសង្គម។ ទី៣ បំផុសឲ្យមានមនសិការជាតិ បង្ហាញអំពីគំរូវីរភាពអង់អាចក្លាហានរបស់រៀមច្បងជំនាន់មុន ដែលមានភាពស្មោះត្រង់ និងស្មារតីមោះមុតក្នុងជួរកងកម្លាំងនគរបាលជាតិ ដើម្បីឲ្យនគរបាលជំនាន់ក្រោយយកគំរូតាមផងដែរ និងក្នុងគោលដៅលើកកម្ពស់ប្រសិទ្ធភាពការងារផង រួមចំណែកយ៉ាងសកម្មក្នុងការកសាងប្រទេសជាតិផង។
ក្នុងឱកាសនេះដែរ ឯកឧត្ដមនាយឧត្ដមសេនីយ៍ ស ថេត អគ្គស្នងការនគរបាលជាតិ បានថ្លែងជម្រាបទៅកាន់គណៈអធិបតី និងមន្ត្រីនគរបាលតំណាងឲ្យអង្គភាពគ្រប់ជំនាញ និងគ្រប់ជាន់ថ្នាក់ អំពីវឌ្ឍនភាពនៃនគរបាលជាតិ ដែលមានការលូតលាស់យ៉ាងល្អប្រសើរ ទាំងសមត្ថភាពរបស់មន្ត្រីនគរបាលតាមជំនាញនីមួយៗ ទាំងមធ្យោបាយ អាវុធ និងសម្ភារៈបច្ចេកទេស ដើម្បីបម្រើក្នុងប្រតិបត្តិការ។
មន្ត្រីនគរបាលដែលបានបណ្ដុះបណ្ដាល ហ្វឹកហ្វឺន និងចេញបំពេញភារកិច្ចពីមួយជំនាន់ទៅមួយជំនាន់ គឺសក្ដិសមជាមន្ត្រីនគរបាលមានជំនាញ វិជ្ជាជីវៈ និងប្រកាន់ខ្ជាប់នូវវិន័យយ៉ាងម៉ឺងម៉ាត់។ សមិទ្ធផលនគរបាលទាំងអស់នេះ បានមកដោយសារការយកចិត្តទុកដាក់របស់រាជរដ្ឋាភិបាល និងជំនឿទុកចិត្តនៃប្រជាពលរដ្ឋកម្ពុជា។
តាងនាមឲ្យនគរបាលជាតិ ឯកឧត្ដមនាយឧត្ដមសេនីយ៍ បានប្ដេជ្ញាចិត្តក្នុងការបំពេញតួនាទីភារកិច្ចឲ្យអស់លទ្ធភាព ដើម្បីប្រទេសជាតិ ដោយយកគំរូតាមវីរភាពនៃរៀមច្បងនគរបាលដែលមានស្នាដៃកន្លងមក។
អត្ថបទ៖ ឈិន ធារ៉ាត់
