ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃកត់សម្គាល់នូវវឌ្ឍនភាពនៃកងកម្លាំងនគរបាលជាតិថា មានការកែប្រែរបៀបរបប និងឥរិយាបថធ្វើការរបស់មន្ត្រីនគរបាលគ្រប់រូប ក្នុងការបំពេញតួនាទីបម្រើប្រជាពលរដ្ឋប្រចាំថ្ងៃ លើមូលដ្ឋាននៃការងាររបស់ខ្លួននីមួយៗ តាមរយៈទ្រឹស្ដី «សម្អាតផ្ទះខ្លួនឯងជាមុនសិន» ជាពិសេសពង្រឹងការអនុវត្តន៍ តួនាទី ភារកិច្ច និងការលើកកម្ពស់សមត្ថភាព មន្ត្រីនគរបាលប៉ុស្តិ៍រដ្ឋបាល និងការបង្កើននូវបរិយាកាសកក់ក្ដៅ និងជំនឿទុកចិត្តពីប្រជាពលរដ្ឋក្នុងការសហការចូលរួមអនុវត្តន៍គោលនយោបាយភូមិឃុំ-សង្កាត់មានសុវត្ថិភាព។
លោកឡើងបែបនេះនៅក្នុងឱកាសរំឭកខួបអនុស្សាវរីយ៍លើកទី ៧៩ នៃការបង្កើតកងកម្លាំងនគរបាលជាតិ នាថ្ងៃទី ១៦ ខែឧសភា ឆ្នាំ២០២៤។
លោកក៏រំលេចផងដែរអំពីសភាពការណ៍នយោបាយ និងសេដ្ឋកិច្ចសកល សង្គ្រាមក្នុងតំបន់ និងពិភពលោក ការដណ្ដើមភូមិសាស្ត្រនយោបាយ ដែលកំពុងរីករាលដាលបង្កឲ្យមានភាពស្មុគស្មាញពិបាកនឹងប៉ានស្មាន។ ជាមួយគ្នានេះការកើនឡើងនៃការផលិត និងចែកចាយគ្រឿងញៀន ការជួញដូរអាវុធខុសច្បាប់ ការជួយដូរមនុស្ស សកម្មភាពភេរវកម្ម និងឧក្រិដ្ឋកម្មឆ្លងដែន ជាពិសេសបទល្មើសបច្ចេកវិទ្យា កំពុងតែរីករាលដាល ប្រែក្លាយជាបញ្ហាសកល បង្កអស្ថិរភាពក្នុងសង្គម បង្កើតឲ្យមានវិបត្តិ នយោបាយ សេដ្ឋកិច្ច ស្បៀងអាហារ និងមនុស្សធម៌ ដែលជះឥទ្ធិពលទៅលើប្រទេសក្នុងតំបន់ និងផ្នែកខ្លះនៃសកលលោក ក្នុងនោះក៏មានកម្ពុជាផងដែរ។
នេះជាវិញ្ញាសាដែលកងកម្លាំងនគរបាលជាតិត្រូវដោះស្រាយ ដើម្បីធានាបាននូវសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម ដែលជាលក្ខខណ្ឌចាំបាច់ដំបូងបង្អស់ក្នុងការអភិវឌ្ឍជាតិលើគ្រប់វិស័យ។
ក្នុងឱកាសនេះដែរ ឯកឧត្ដមអភិសន្តិបណ្ឌិតបានផ្ដល់អនុសាសន៍សម្គាល់មួយចំនួនជូនកងកម្លាំងនគរបាលជាតិយ៉ាងដូច្នេះ៖ កងកម្លាំងនគរបាលជាតិ ត្រូវបន្តតម្កល់ឆន្ទៈ មនសិការ ស្នេហាជាតិ ស្រលាញ់វិជ្ជាជីវៈ និងខិតខំបំពេញការងារឲ្យបានសស្រាក់សស្រាំ ដើម្បីសុខដុមរមនា និងវិបុលភាពប្រទេសជាតិ។ ត្រូវបន្តយកចិត្តទុកដាក់ លើកកម្ពស់សមាសភាពធនធានមនុស្ស និងពង្រឹងប្រសិទ្ធភាពការងារឲ្យកាន់តែល្អប្រសើរឡើង ដោយធានាឲ្យបានថា មន្ត្រីនគរបាលម្នាក់ត្រូវមានចំណេះដឹងជាមូលដ្ឋានអំពីច្បាប់ មានក្រមសីលធម៌ វិជ្ជាជីវៈ មានកិត្តិយសសេចក្ដីថ្លៃថ្នូរ ដើម្បីអនុវត្តការងារប្រកបដោយស្មារតីទទួលខុសត្រូវខ្ពស់ ធានាការគោរពសិទ្ធិមនុស្ស និងចូលរួមក្នុងការពង្រឹងនីតិរដ្ឋ។ ត្រូវបន្តពង្រឹង និងលើកម្ពស់ការផ្ដល់សេវារបស់នគរបាលឲ្យកាន់តែមានភាពសាមញ្ញ ឆាប់រហ័ស មានតម្លាភាព គណនីភាព ឆ្លើយតបទៅនឹងសំណូមពរ សេចក្ដីត្រូវការ និងបញ្ហារបស់ប្រជាពលរដ្ឋទាន់ពេលវេលា។ ត្រូវបន្តយកចិត្តទុកដាក់ពង្រឹងការអនុវត្តន៍គោលនយោបាយភូមិឃុំ-សង្កាត់មានសុវត្ថិភាព ប្រកបដោយនិរន្តរភាព និងប្រសិទ្ធភាពខ្ពស់ សំដៅដល់ការលើកកម្ពស់សន្តិសុខ សុវត្ថិភាព សណ្ដាប់ធ្នាប់សាធារណៈនៅតាមមូលដ្ឋាន ដើម្បីផ្ដល់ទំនុកចិត្តជូនដល់ប្រជាពលរដ្ឋ។ បញ្ហាសន្តិសុខ ជាកត្តាតម្រូវចាំបាច់ បញ្ជាការឯកភាពតាមបណ្ដារាជធានី-ខេត្ត ក៏ដូចជាអាជ្ញាធរពាក់ព័ន្ធទាំងអស់ ត្រូវលើកកម្ពស់ស្មារតី និងសហការគាំទ្រដល់សកម្មភាពកងកម្លាំងនគរបាលជាតិ ដើម្បីរក្សាឲ្យបាននូវសន្តិភាព និងស្ថិរភាព នាំឲ្យប្រទេសជាតិសម្រេចបានការអភិវឌ្ឍតាមផែនការគ្រោងទុក។ អង្គភាព និងកងកម្លាំងទាំងអស់ ត្រូវបន្តពង្រឹងភាពជាគំរូល្អដល់សាធារណជន ជាពិសេសត្រូវគោរព និងអនុវត្តច្បាប់ចរាចរណ៍ផ្លូវគោក ព្រមទាំងជៀសឲ្យផុតពីគ្រឿងញៀន។ ត្រូវចាត់វិធានការឲ្យមានប្រសិទ្ធភាពរាល់សកម្មភាពក្មេងទំនើង និងល្បែងស៊ីសងគ្រប់ប្រភេទ ព្រមទាំងសកម្មភាពអសកម្មផ្សេងៗ នៅតាមសហគមន៍ សំដៅធានាឲ្យបានសុវត្ថិភាពជូនប្រជាពលរដ្ឋ។
រដ្ឋមន្ត្រីក្រសួងមហាផ្ទៃគូសបញ្ជាក់បន្ថែមថា នៅនីតិកាលទី៧នេះ ក្រសួងមហាផ្ទៃកំពុងយកចិត្តទុកដាក់ និងប្ដេជ្ញាចិត្តយ៉ាងមុតមាំក្នុងការធ្វើកំណែទម្រង់ប្រព័ន្ធគ្រប់គ្រងកងកម្លាំងនគរបាលជាតិ ឲ្យកាន់តែមានល្អប្រសើរឡើងជាដំណាក់កាលៗ។ ជាមួយគ្នានេះ សមភាពយេនឌ័រក្នុងស្ថាប័ននគរបាលក៏ត្រូវបានយកចិត្តទុកដាក់យ៉ាងខ្លាំងផងដែរ។ នៅឆ្នាំ ២០២៥ លំហយេនឌ័រនៅក្នុងវិស័យកងកម្លាំងនគរបាល នឹងបើកកាន់តែធំទូលាយ ដើម្បីបង្កើនចំនួននគរបាលស្ត្រី។
អត្ថបទ៖ ឈិន ធារ៉ាត់
