ក្រុម​កីឡាបាល់ទះជម្រើសជាតិ​អាយុ​ក្រោម ២០ឆ្នាំ​ (U-20) កម្ពុជា នឹង​ធ្វើ​ការប្រកួត​មិត្តភាព​ជាមួយ​​ក្លិបកីឡាបាល់ទះស្នងការដ្ឋាននគរបាលរាជធានីភ្នំពេញ ដែល​ជា​ការបង្ហាញ​ខ្លួន​ជាផ្លូវ​ការ​លើកដំបូង ក្រោយ​ធ្វើ​ការប្រមូល​ផ្ដុំបាន​ជាងមួយខែរួច​មក មុនចេញទៅប្រកួតនៅថៃ។

ក្រោម​ការ​ដឹង​នាំត្រួត​ពិន្យ​របស់​លោក Li Jun គ្រូបង្វឹកក្រុមជម្រើសជាតិបាល់ទះកម្ពុជា ក្រុមកីឡាករ​បាល់ទះជម្រើសជាតិ​អាយុ​ក្រោម ២០ឆ្នាំ ត្រូវ​បានធ្វើ តេស្ត ជ្រើស​រើស ​ពី​តាម​បណ្ដាល​ក្លិប​ធំៗ​ចំនួន ដូច​ជា ក្រុមយុវជន​ក្លិប​បាល់ទះវិសាខា ក្រុមយុវជនសមាគម​បាល់ទះក្រសួងមហាផ្ទៃ និងក្រុម​យុវជន របស់​ក្រុម​បាល់​ទះស្នង​ការដ្ឋាន​នគរបាលរាជធានីភ្នំពេញ។

ងាក​មក​ការប្រកួត​មិត្តភាពនាពេលខាងមុខនេះ​ដែល ក្រុម​កីឡាករ​បាល់ទះជម្រើសជាតិ​អាយុ​ក្រោម ២០ឆ្នាំ​ (U-20) របស់​កម្ពុជា នឹង​ត្រៀម​បញ្ចេញ​ស្មាដៃនៅ​ថ្ងៃសុក្រ ទី២៤ ខែឧសភា ឆ្នាំ២០២៤ ដោយ​ត្រូវ​ប៉ះ​​ក្លិបកីឡាបាល់ទះស្នងការដ្ឋាននគរបាលរាជធានីភ្នំពេញ ក្នុងជំនួបមិត្តភាព។

នៅ​ថ្ងៃជាមួយ​គ្នានេះ​ដែរ ក្លិបកីឡាបាល់ទះវិសាខា នឹង​ត្រូវ​ទទួលក្លិបកីឡាបាល់ទះ Lavie Long An  ក្នុង​ជំនួន​មិត្តភាពដូច​គ្នា  ការប្រកួត​និងចាប់​ផ្ដើមពី​ម៉ោង ៣:០០នាទីរសៀម​តទៅ  នៅ​ពហុកីឡ​ដ្ឋាន​ជាតិ (ស្តាតអូឡាំពិក) ។ ការប្រកួត​ នឹង​បើកអោយ​អ្នកគាំទ្រ​ចូលរួមទស្សនាដោយសេរី។

ការប្រមូលផ្ដុំហ្វឹកហាត់​របស់​ក្រុម U-20 កម្ពុជា រួម​ជាមួយ​ការប្រកួត​មិត្តភាព​នាពេល​ខាងមុខ នេះ​ដែរ គឺ​ដើម្បី​ត្រៀមខ្លួន​ចូលរួម​ប្រកួតក្នុង​វគ្គ​ជម្រុះ ក្នុង​ព្រឹត្តិការណ៍ Asian Men’s U20 Championship លើកទី 22 ជាមួយ​វៀតណាម ​នៅ​ទឹក​ដី​ថៃ។ ដែលគ្រោង​ នឹង​ធ្វើឡើង​ចាប់ពីថ្ងៃទី២៣ ដល់ថ្ងៃទី៣០ ខែកក្កដា ឆ្នាំ២០២៤។

គួរបញ្ជាក់ថា ក្រុម​បាល់ទះជម្រើសជាតិ​អាយុ​ក្រោម ២០ឆ្នាំ​ (U-20) ​កម្ពុជា ប្រកួតជា​មួយ​វៀតណាម​នេះ ក្រុម​ដែល​ឈ្នះ នឹង​ទទួល​បាន​កៅអី​ទៅ​ចូល​រួម​ប្រកួត វគ្គ​ផ្ដាច់​ព្រ័ត្រ ​នៅក្នុងព្រឹត្តិការណ៍ Asian Men’s U20 Championship លើកទី 22  និង​ធ្វើ​ឡើង​នៅទីក្រុង Surabaya ប្រទេស​ឥណ្ឌូ​នេស៊ី៕

Share.