លោក ទីវ តារារិទ្ធ នឹងចេញដំណើរពីខេត្តសៀមរាប ទៅកាន់ប្រទេសបារាំងនៅថ្ងៃទី៦ ខែមិថុនានេះ។ លោកមិនជិះយន្តហោះទេ គឺលោកធាក់កង់ទៅ។ ដំណើរជើងនេះមានឈ្មោះថា «ជិះកង់ដើម្បីកុមារកម្ពុជាពីប្រទេសកម្ពុជាទៅទ្វីបអឺរ៉ុប» ដែលមានចម្ងាយជាង២ម៉ឺនគីឡូម៉ែត្រ ក្នុងគោលបំណងរៃអង្គាសថវិកាពីសប្បុរសជន ដើម្បីជួយដល់មន្ទីរពេទ្យកុមារអង្គរ និងមន្ទីរពេទ្យគន្ធបុប្ផា។
ដើម្បីបំផុសឲ្យមហាជនបានដឹង និងបានឱកាសចូលរួមលើកទឹកចិត្ត ក៏ដូចជាបរិច្ចាគជូនមន្ទីរពេទ្យទាំងពីរតាមរយៈបេសកកម្មផ្សងព្រេងរបស់លោក ទីវ តារារិទ្ធិ, ក្រសួងព័ត៌មានដឹកនាំដោយ ឯកឧត្តម នេត្រ ភក្ត្រា បានបើកឲ្យមានសន្និសីទសារព័ត៌មាន នៅថ្ងៃទី ៣ ខែមិថុនា ឆ្នាំ ២០២៤ ដើម្បីធ្វើការផ្សព្វផ្សាយឲ្យបានផុលផុស ទៅក្នុងស្រទាប់មហាជន។ ឯកឧត្ដមរដ្ឋមន្ត្រីក៏បានថ្លែងកោតសរសើរទឹកចិត្តក្លាហាន មោះមុតរបស់ចក្រយានិក ទាវ តារារិទ្ធិ ថា មិនត្រឹមតែរៃអង្គាសថវិកាសប្បុរសធម៌ជួយសង្គ្រោះកុមារកម្ពុជាទេ បេសកម្មលោក នឹងដឹកទាំងទង់ជាតិកម្ពុជា ភាសា កាយវិការ អារ្យធម៌ខ្មែរទៅកាន់ពិភពលោកផងដែរ។
ចំណែកឯតំណាងមន្ទីរពេទ្យ គន្ធបុប្ផា និងកុមារអង្គរ ដែលធ្លាប់ទទួលបានថវិកាសប្បុរសធម៌តាមរយៈបេសកកម្មជិះកង់របស់លោក តារារិទ្ធិ និងសប្បុរសជនផ្សេងទៀត ក៏ថ្លែងនូវអំណរគុណ រួមដោយការកោតសរសើរពីវីរភាពរបស់លោក ដែលតស៊ូដើម្បីបង្កើតសកម្មភាពទាក់ទាញចំណាប់អារម្មណ៍មហាជន ឲ្យចូលរួមបរិច្ចាគថវិកាសម្រាប់ជួយសង្គ្រោះកុមារកម្ពុជា។
នៅក្នុងសន្និសីទសារព័ត៌មាន ដែលដឹកនាំដោយឯកឧត្ដម នេត្រ ភក្ត្រា រដ្ឋមន្ត្រីក្រសួងព័ត៌មាន លោក ទីវ តារារិទ្ធិ បានរៀបរាប់ពីគម្រោងធ្វើដំណើររបស់លោកថា គម្រោងដំណើរធាក់កង់របស់លោកមានរយៈពេលមួយឆ្នាំ ដោយលោកនឹងចាប់ចេញដំណើរនៅព្រឹកម៉ោង ៦ ថ្ងៃទី៦ ខែមិថុនា (ខែ៦) ពីខេត្តសៀមរាប កាត់តាមមន្ទីរពេទ្យគន្ធបុប្ផា និងមន្ទីរពេទ្យកុមារអង្គរ ហើយឆ្លងចូលទៅកាន់ប្រទេសឡាវ ដែលលោកតែងនឹករឭកចង់ឃើញស្នាមញញឹមរបស់ប្រជាជន និងទេសភាពដ៏ស្រស់បំព្រងដូចប្រទេសកម្ពុជាដែរ។ បន្ទាប់មកលោកនឹងឆ្លងចូលភាគខាងជើងប្រទេសថៃ ហើយហោះរំលងប្រទេសមីយ៉ាន់ម៉ា ទៅកាន់ប្រទេសបង់ក្លាដេស ទើបបន្តទៅឧបទ្វីបឥណ្ឌា។ លោក តារារិទ្ធិ បញ្ជាក់ថា មូលហេតុដែលលោកជិះយន្តហោះរំលងប្រទេសមីយ៉ាន់ម៉ា និងប្រទេសខ្លះទៀត ត្បិតស្ថានភាពនៃប្រទេសទាំងនោះ មិនអាចធានាសុវត្ថិភាពដល់ដំណើររបស់លោកបាន។
លោកនឹងធ្វើដំណើរនៅជុំវិញអាស៊ីកណ្ដាល និងអាស៊ីខាងលិច ទើបឆ្លងចូលទៅអឺរ៉ុបតាមប្រទេសទួរគី និងប៊ុលហ្គារី ទើបបន្តដំណើររបស់លោកជុំវិញទ្វីបអឺរ៉ុប ហើយជាចុងក្រោយ លោកនឹងបញ្ចប់ដំណើររបស់លោកនៅប្រទេសបារាំង។
និយាយពីប្រទេសបារាំង លោក តារារិទ្ធិ ថា ស្ថានទូតប្រចាំនៅកម្ពុជា របស់ប្រទេសនេះហើយ ដែលបានជួយសម្របសម្រួលផ្ដល់ទិដ្ឋាការពិសេសជូនលោក គឺទិដ្ឋាការដែលមិនមានកំណត់។ ការណ៍នេះបានជួយឲ្យលោកអស់កង្វល់ក្នុងចិត្ត និងកាន់តែមានទំនុកចិត្តក្នុងការធ្វើដំណើរជុំវិញអឺរ៉ុប។ ជាមួយគ្នានេះលោកក៏បានរំលេចឲ្យឃើញពីបុគ្គលម្នាក់ទៀត ដែលតែងជួយជ្រោមជ្រែង និងគាំទ្រគម្រោងរបស់លោកជានិច្ច គឺលោកស្រីទាវ បណ្ដូល ដែលជាបងស្រីរបស់លោក។
កាលពីឆ្នាំ ២០២៣ លោក ទីវ តារារិទ្ធិ បានឆ្លងកាត់ដោយជោគជ័យ នូវបទពិសោធន៍ធាក់កង់ធ្វើដំណើរជុំវិញប្រទេសក្នុងតំបន់អាស៊ីអាគ្នេយ៍ ក្នុងគោលបំណងរៃអង្គាសថវិកាជួយមន្ទីរពេទ្យទាំង២រួចមកហើយ។ ដំណើរធាក់កង់ទៅទ្វីបអឺរ៉ុបរបស់លោកជើងនេះ អាចជាដំណើរផ្សងព្រេងលើកចុងក្រោយរបស់លោកផងដែរ។ នេះបើតាមការបង្ហើបឲ្យដឹងពីចក្រយានិក ទីវ តារារិទ្ធ។
អត្ថបទ៖ ឈិន ធារ៉ាត់
