តារាចម្រៀង Original លោក «អូន» កាលពីថ្ងៃព្រហស្បតិ៍ ទី២ ខែសីហា ម្សិលមិញ បានបង្ហោះសំណេរខ្លីនៅផេករបស់លោក ប៉ុន្តែបង្កប់ដោយខ្លឹមសារនិងអត្ថន័យជ្រាលជ្រៅ ហាក់ដាស់ស្មារតីទៅកាន់អ្នកនិពន្ធនិងផលិតបទចម្រៀងកុំឱ្យគិតផ្ដោតតែលើចំនួន View ហើយភ្លេចពីតម្លៃអប់រំក្នុងផ្លូវវិជ្ជមានឱ្យសោះ។
ម្ចាស់បទ «ស្រោម» ច្រៀងជាមួយនឹង Vannda និង Tempo រូបនេះបានចេញមកបង្ហាញការយល់ឃើញរបស់ខ្លួន ដោយសារតែលោកមានការទើសចិត្តព្រោះតែបច្ចុប្បន្ន មានអ្នកនិពន្ធយុវវ័យថ្មីៗមួយចំនួន បានផ្សព្វផ្សាយតន្ត្រី ពិសេសបទចម្រៀង Rap បែប Gang តែងតែប្រើពាក្យឬភាសាមិនសមគួរ ឬភាសាឈ្លើយ ដែលជារឿងមួយអាចធ្វើឱ្យហ្វេន ឬអ្នកស្ដាប់ ដែលនៅក្មេង ឬអ្នកស្ដាប់មិនបានពិចារណា ជ្រួតជ្រាប រួចយកមកប្រើប្រាស់ នោះនឹងធ្វើឱ្យប៉ះពាល់យ៉ាងខ្លាំងសម្រាប់សង្គមនិងជាតិ។
តារាចម្រៀង Mr. Oun បានសរសេរលើផេករបស់លោកដែលមានចំនួន Followers ចំនួនជាង ២៦៦K យ៉ាងដូច្នេះ៖ «ប្រើប្រាស់តន្រ្តីដើម្បីផ្សព្វផ្សាយអ្វីដែលវិជ្ចមាន ព្រោះប្រទេសយើងតូច ប្រជាជនយើងតិច ចំណេះដឹងនៅមានកំរិត»។
ការលើកឡើងរបស់លោកត្រូវបានបងប្អូនអ្នកលេងបណ្ដាញសង្គម និង អ្នកគាំទ្រកោតសរសើរយ៉ាងខ្លាំង តាមរយៈការបញ្ចេញនូវទស្សនៈគាំទ្រការលើកឡើងរបស់លោក ព្រមទាំងលើកឡើងដែរថា «តន្ត្រីល្អ ហើយក៏អាក្រក់ដែរ ទៅតាមអ្នកនិពន្ធទំនុកច្រៀង» អ្នកខ្លះទៀតបានសរសេរថា «គាំទ្រ ព្រោះតន្រ្តីជះឥទ្ធិពលខ្លាំងណាស់ដល់យុវជន» និង «បងជួយនិពន្ឋទំនុកច្រៀងបែបអប់រំយុវជនព្រោះឥលូវមានរឿងអវិជ្ជមានជាច្រើន កំពុងបំពុលយុវជនភ្លើតភ្លើន»។ល។
ចំពោះមិត្តអ្នកអានវិញ តើយល់យ៉ាងណាដែរចំពោះការលើកឡើងរបស់តារាចម្រៀង Original ខាងលើនេះ?
