Jun Ji Hyun តួឯកស្រីដ៏ល្បីដែលអ្នកគាំទ្រកម្ពុជាហៅយ៉ាងស្ទាត់មាត់ថា ឆូ សុងអ៊ី ត្រូវបានគេរំពឹងថាទទួលបានតម្លៃខ្លួនប្រមាណ១៧ពាន់លានវ៉ុន (ប្រហែល១៤,៧លានដុល្លារអាមេរិច) ដែលជាតម្លៃមួយថ្លៃកប់ពពកខ្ពស់លើសអតីតដៃគូសម្ដែង Kim Soo Hyun និងពិធីករថ្វីមាត់ពូកែ Yoo Jae Suk
យោងតាមប្រភព Allkpop ចេញផ្សាយនៅថ្ងៃទី៤ ខែកញ្ញា ដកស្រង់ដំណឹងពីសារព័ត៌មានក្នុងស្រុកដែលផ្សាយកាលពីថ្ងៃទី៣ ខែកញ្ញា ឆ្នាំ២០២១ Jun Ji Hyun ទទួលបានកម្រៃឬថ្លៃខ្លួនប្រមាណ១ពាន់លានវ៉ុនសម្រាប់កុងត្រាជាមួយផ្សាយពាណិជ្ជកម្មប្រចាំឆ្នាំ ដោយឆ្នាំនេះ តារាស្រីរូបនេះចុះកុងត្រាផ្សាយពាណិជ្ជកម្មឱ្យផលិតផលចំនួន១៦ផ្សេងគ្នា ដែលធ្វើឱ្យគេប៉ាន់ប្រមាណបានថាឆ្នាំនេះ នាងទទួលបានកម្រៃសរុបប្រមាណ១៧ពាន់លានវ៉ុន។
ដៃគូសម្ដែងរួមក្នុងរឿង «សង្សារខ្ញុំជាបុរសភពផ្កាយ» Kim Soo Hyun ស្ថិតក្នុងចំណាត់ថ្នាក់លេខ២ មានតម្លៃខ្លួនសរុបប្រមាណ ១៣ពាន់លានវ៉ុន ខណៈពិធីករល្បីលំដាប់លេខ១ របស់កូរ៉េ Yoo Jae Suk ស្ថិតក្នុងលំដាប់លេខ៣ ទទួលបានកម្រៃសរុបប្រមាណ ១០ពាន់លានវ៉ុន។
ចំពោះតារាសម្ដែងញញឹមស្រស់ Song Joong Ki ស្ថិតក្នុងលំដាប់លេខ៤ (៨ពាន់លានវ៉ុន) Lee Seung Ki (ប្រមាណជា៧ពាន់លានវ៉ុន) ពិធីករ Shin Dong Yup (ប្រមាណ៥ពាន់លានវ៉ុន) និងចុងក្រោយអ្នកម៉េមាយសម្បូរទ្រព្យ Song Hye Kyo (ប្រមាណ៤ពាន់លានវ៉ុន)៕
