សហព័ន្ធកីឡាជឺជីតស៊ូកម្ពុជា នាថ្ងៃទី១ កក្កដា បានប្រកាសពីការបញ្ជូនគណៈប្រតិភូទៅកាន់កោះបាលី ប្រទេស ឥណ្ឌូនេស៊ី ដើម្បីចូលរួមការប្រកួតជើងឯកប្រចាំតំបន់ JJAU អាស៊ីអាគ្នេយ៍ ដែលមានការចូលរួមប្រកួតសរុបចំនួន៤១២ និងអត្តពលិក២៥៨នាក់ មកពីបណ្តាប្រទេសចំនួន ៦ចូលរួម។
ក្នុងដំណើរឆ្ពោះទៅកាន់កោះបាលី ប្រទេសឥណ្ឌូនេស៊ី អត្តពលិកដែលមានទេពកោសល្យចំនួន ១២រូបនឹងតំណាងឱ្យប្រទេសកម្ពុជា ដើម្បីចូលរួមការប្រកួតជើងឯកប្រចាំតំបន់ JJAU អាស៊ីអាគ្នេយ៍ ដែលនឹងប្រព្រឹត្តិទៅចាប់ពីថ្ងៃទី ៦ ដល់ថ្ងៃទី៧ ខែកក្កដា ឆ្នាំ២០២៤។
មុនចាក់ចេញទៅ អត្តពលិកកម្ពុជា បានហ្វឹកហាត់យ៉ាងស្វិតស្វាញអស់ជាច្រើនខែ ហើយត្រៀមខ្លួនរួចជាស្រេចដើម្បីបញ្ចេញសមត្ថភាពរបស់ពួកគេនៅលើឆាកអន្តរជាតិនេះ។
ឯកឧត្តម ថោង បញ្ញាធន អនុប្រធានសហព័ន្ធ បានបញ្ជាក់ថា៖ “យើងមានក្តីរំភើបឥតឧបមាចំពោះការចូលរួមរបស់យើងក្នុងការប្រកួតនេះ។ ក្រុមការងារ ក៏ដូចជាអត្តពលិករបស់យើងបានសិក្សា រៀបចំ និងត្រៀមខ្លួនសម្រាប់ការប្រកួតនេះជាច្រើនខែ ហើយយើងមានទំនុកចិត្តខ្ពស់លើសមត្ថភាពរបស់អត្តពលិកយើងក្នុងការឡើងឆាកប្រយុទ្ធ ដណ្តើមជ័យជំនះនិងមេដាយមាសជូនជាតិកម្ពុជា។
ឯកឧត្តម បន្ថែមថា យើងសូមថ្លែងអំណរគុណយ៉ាងជ្រាលជ្រៅចំពោះ CamEd Business School និង សមាគមកីឡាជឺជីតស៊ូ មជ្ឈមណ្ឌលជាតិកំចាត់មីនកម្ពុជា ដែលបានផ្តល់ការគាំទ្រក្នុងការបញ្ជូនអត្តពលិករបស់ពួកគេមកចូលរួមក្នុងព្រឹត្តិការណ៍នេះ ក៏ដូចជាអ្នកឧបត្ថម្ភធំរបស់យើងរួមមាន Naga Balm, Dai Ek, Alpha Fitness និង Kiri Jiu Jitsu សម្រាប់ការរួមចំណែកក្នុងការឱ្យដំណើរមួយនេះអាចប្រព្រឹត្តិទៅបាន៕
