អតីតតារាសម្ដែងរូបសង្ហា ឈុន វីរៈកោសល្យ គឺជាអតីតបេក្ខជនប្រកួតកម្មវិធី Spy និងធ្លាប់បានតំណាងប្រទេសកម្ពុជាទៅប្រកួតកម្មវិធីកំពូលបុរសសង្ហាថ្នាក់ពិភពលោកកាលពីឆ្នាំ២០១៤ ( Mister International 2014) នៅប្រទេសកូរ៉េ មានប្រទេសចូលរួមរហូតដល់៦០ប្រទេស។
បុរសខ្ពស់ស្រឡះរូបនេះ ក៏ធ្លាប់បានបង្ហាញថ្វីដៃសម្ដែងបទចម្រៀងខារ៉ាអូខេ និងភាពយន្តភាគជាច្រើន មុននឹងបាត់វត្តមានលោកពីកញ្ចក់ទូរទស្សន៍ រហូតធ្វើឱ្យអ្នកគាំទ្រមួយចំនួននឹករលឹក ហើយចង់ដឹងថាតើពេលនេះតារាប្រុសរូបសង្ហាសំណព្វចិត្តរបស់ខ្លួនសុខទុក្ខយ៉ាងណាហើយកំពុងរស់នៅទីណាដែរ?
តាមពិតបុរសសង្ហាដែលមានដើមកំណើតនៅខេត្តកណ្ដាលរូបនេះបានចាកចេញទៅរស់នៅសហរដ្ឋអាមេរិកបន្ទាប់ពីរៀបអាពាហ៍ពិពាហ៍ ហើយមកដល់ពេលនេះលោកទទួលបានចំណងដៃកូនស្រីដ៏ស្រស់ស្អាតមួយរូបផងដែរ។
រំលឹកឡើងវិញបុរសសង្ហាមានកម្ពស់ ១,៨៨ សង់ទីម៉ែត្ររូបនេះធ្លាប់ទទួលបានសមិទ្ធិផលពីបរទេសដោយបានឈ្នះពានរង្វាន់ Best Dress Winner ពីកម្មវិធី ASEAN CELEBRITY EXPLORE QUEST MALAYSIA 2015 នៅឯប្រទេសម៉ាឡេស៊ី តំណាងឲ្យកម្ពុជាផងដែរ៕
