និយាយដល់តន្ត្រី K-Pop មិនអាចខ្វះបានឡើយ តារាចម្រៀងដ៏មានទេពកោសល្យ HyunA ព្រោះតារាស្រីរូបនេះមានប្រវត្តិជូរចត់ខ្លាំងណាស់ ទម្រាំបានចេញមុខក្នុងនាមតារាចម្រៀងក្រុម 4Minute។
រយៈពេលជាង ១០ឆ្នាំ នៅក្នុងសិល្បៈ HyunA ចូលក្នុងក្រុមហ៊ុនចំនួន៣ផ្សេងៗគ្នា ហើយបានចេញបទចម្រៀង ៣ជំនាន់ផ្សេងៗ តាមដឹង តារាចម្រៀងរូបនេះប្រឡូកចូលក្នុងសិល្បៈឆ្លងកាត់ក្រុមហ៊ុនសរុបចំនួន ៨ទម្រាំកសាងកេរ្តិ៍ឈ្មោះបានល្បីល្បាញ។
មនុស្សជាច្រើនអាចនឹងមិនដឹងទេពីប្រវត្តិជូរចត់របស់តារាស្រីទេ ក្នុងការបោះជំហានចូលប្រឡូកចូលក្នុងវិស័យសិល្បៈ។ HyunA ដំបូងឡើយចូលសិល្បៈតាមយៈក្រុមហ៊ុន JYP Entertainment ជាសមាជិកក្នុងក្រុម Wonder Girls មុននឹងប្ដូរទៅកាន់ផលិតកម្មថ្មី CUBE Entertainment។ បន្តមកទៀត HyunA មានឈ្មោះបោះសំឡេងតាមរយៈការឃោសនាជាសមាជិកក្រុម 4Minute និង 4Tomorrow។
សម្រាប់ 4Tomorrow ក្រុមនារីមានសមាជិក ៤រូប គឺជា Project មួយដែលបង្កើតឡើងរវាងក្រុមហ៊ុន Nega Network, Pledis Entertainment, DSP Media និង CUBE Entertainment ក្នុងគោលបំណងយកប្រាក់ដែលរកបានទៅជួយបរិច្ចាគជាជំនួយមនុស្សធម៌។ ក្រុម 4Tomorrow មានសមាជិក៤នាក់៖ Gain, Uee, Seungyeon និង HyunA បង្កើតឡើងនៅឆ្នាំ២០០៩ កំឡុងខែតុលាមានបទចម្រៀងមួយបទគឺបទ «Tomorrow»
បន្តមកទៀត HyunA បានច្រៀងរួមជាមួយនឹង Hyunseung តាមរយៈបទ Troublemaker និង សមាជិក Pentagon គឺ Hui និង EDawn គូស្នេហ៍បច្ចុប្បន្នរបស់ខ្លួន។
មិនត្រឹមតែមានបទចម្រៀងជាក្រុម HyunA ក៏មានចម្រៀងទោលដែរ ដោយស្រីស្រស់រូបនេះធ្លាប់ចេញបទទោលចំនួនពីរដងផងដោយមួយស្ថិតក្នុងផលិតកម្មចាស់ Cube Entertainment និងមួយទៀតនៅ ផលិតកម្មថ្មី P NATION។ បទចម្រៀងទោលល្បី «Red», «Flower Shower» ជាដើម។
បទចម្រៀងថ្មីដែល HyunA ត្រៀមនឹងចេញមកកំដរចំណីអារម្មណ៍របស់មិត្តអ្នកស្ដាប់ គឺអាល់ប៊ុម «1+1» មានបទចម្រៀងច្រៀងជាមួយនឹង Dawn មិត្តប្រុសបច្ចុប្បន្ន ដែលត្រៀមនឹងបញ្ចេញនៅថ្ងៃទី៩ ខែកញ្ញា៕
