សិល្បៈអន្តរជាតិ៖ តារាសម្ដែងល្បីថៃនាង Poklook បានចែករំលែកវីដេអូពីកាមេរ៉ាសុវត្ថិភាព បង្ហាញឱ្យឃើញថានាងប៊ិះនឹងអស់ជីវិតដោយសារតែផឹកថ្នាំ បើសិនមិនបានគូស្នេហ៍ជួយទាន់ប្រហែលជាគ្មានសំណាងបានរស់ទេ។
ហេតុការណ៍គ្រោះថ្នាក់ដែលបណ្ដាលឱ្យតារាស្រីនេះ ប៊ិះនឹងអស់ជីវិត កើតឡើងនៅពេលដែលកញ្ញា Poklook កំពុងផឹកវីតាមីន តែស្រាប់តែថ្នាំនោះឆ្លាក់ជាប់ក្នុងបំពង់ខ្យល់ ដោយខណៈនោះកំលោះ Mike តាំងស្មារតីបាន ចូលទៅជួយទាន់ពេលវេលា។ ក្រោយរួចគ្រោះថ្នាក់ តារាស្រីល្បីរូបនេះបានបង្ហោះ Clip Video ចេញពីកាមេរ៉ាសុវត្ថិភាពភ្ជាប់ជាមួយនឹង Caption ថា៖ «ធ្លាប់ឃើញមនុស្សស្លាប់នៅចំពោះមុខចំពោះមាត់ ដោយសារតែញ៉ាំអាហារហើយឆ្លាក់ជាប់ក… ថ្ងៃនេះវេទនាណាស់ មិនធ្លាប់គិតសោះ ថាសេចក្ដីស្លាប់វាងាយស្រួលបែបនេះ អរគុណដែលបងនៅត្រង់នេះស្រាប់…អរគុណណាស់ បើមិននៅទេ មិនដឹងថាទៅជាបែបណាទេ.. អរគុណបងម៉ៃ អរគុណព្រះជាម្ចាស់»
ចំពោះហេតុការណ៍នោះត្រូវបាន Poklook រៀបរាប់ថា នាងបានផឹកថ្នាំវីតាមីន តែស្រាប់តែឆ្លាក់ជាប់បំពង់ខ្យល់ បណ្ដាលឱ្យមានអារម្មណ៍ថានឹងស្លាប់ តែអ្វីដែលបានដឹងគឺបងម៉ៃបានព្យាយាមជួយគ្រប់យ៉ាង ឱ្យខ្ញុំបានរួចរស់ជីវិតលើកនេះ ទីបំផុតខ្ញុំក៏រួចជីវិត ដោយសារតែការជួយរបស់គាត់ពិតមែន» ក្រោយជួយសង្គ្រោះជីវិតរួច អ្នកទាំងពីរក៏បានមកនិយាយប្រាប់ថា ដំបូងគិតថាទៅមន្ទីរពេទ្យ តែបើទៅពេទ្យច្បាស់ជាស្លាប់កណ្ដាលផ្លូវ មិនខាន។
ក្រោយបង្ហោះឃ្លីបវីដេអូនាទីមរណៈ របស់ខ្លួន លើបណ្ដាញទំនាក់ទំនងសង្គម មិត្តភក្ដិ ទាំងក្នុងសិល្បៈក្ដី ទាំងមិត្តក្រៅរង្វង់សិល្បៈក្ដី បានចូលមកបង្ហាញមតិចូលរួមត្រេកអរ ព្រមទាំងសរសើរកម្លោះ ម៉ៃ ដែលមានស្មារីតរឹងប៉ឺង រហូតអាចជួយសង្គ្រោះសង្សារបណ្ដូលចិត្តឱ្យរួចជីវិតនៅក្នុងហេតុការណ៍គ្រោះថ្នាក់ខាងលើនេះ៕
