អ្នកប្រដាល់គុនខ្មែរ ម៉ឺន មេឃា ត្រូវជាកូនប្រុសរបស់លោក អេ ភូថង បានរងបរាជ័យត្រឹមទឹក៤ ក្នុងការប្រកួតប្រដាល់ទម្ងន់៦៣.៥គីឡូក្រាម នៅកម្មវិធី«កំពូលជើងឯកគុនខ្មែរ» នាល្ងាចថ្ងៃទី២១ ខែកក្កដា ឆ្នាំ២០២៤ ថ្មីៗនេះលើសង្វៀនទូរទស្សន៍ PNN ខណៈហាក់មានចម្រូងចម្រាសក្រោយចប់ការប្រកួត។
បរាជ័យរបស់ ម៉ឺន មេឃា មកពីក្លិបប្រដាល់អេភូថង ក្រោមថ្វីដៃគូប្រជែង ចាន់ ប៊ុនហឿន មកពីក្លិបប្រដាល់គុនខ្មែរអន្តរជាតិ ខណៈអ្នកទាំង២ត្រូវប្រកួតដណ្តើមខ្សែក្រវាត់ ដែលស្ថិតនៅលើចង្កេះរបស់ ម៉ឺន មេឃា។ ការប្រកួតគូពិសេសនេះបានឈានដល់ទឹកទី៤ ហើយ លោកអាជ្ញាកណ្តាល ជ្រា សុភាព បានបញ្ឈប់ការប្រកួតតែម្តង ក្រោយកីឡាករ ម៉ឺន មេឃា ត្រូវ ចាន់ ប៊ុនហឿន ទាត់ចំលើផ្ទៃមុខ។
ក្រោយលោកអាជ្ញាកណ្តាលបញ្ចប់ការប្រកួត មានការផ្ទុះការតវ៉ា ជាខ្លាំងពីភាគីខាង ម៉ឺន មេឃា តែយ៉ាងណាក្តីលោក ម៉ិល កាដូ អនុប្រធានសហព័ន្ធកីឡាប្រដាល់គុនខ្មែរ ក៏បានបញ្ជាក់បន្ថែមពីលើការសម្រេចរបស់លោកអាជ្ញាកណ្តាលទៀត ដោយបន្តអោយលទ្ធផលជ័យជម្នះទៅកីឡាករ ចាន់ ប៊ុនហឿន ដដែល។
រំលងប៉ុន្មានម៉ោងក្រោយការប្រកួត ម៉ឺន មេឃា បានបង្ហោះវីដេអូប្រមាណ ១:២០វិនាទី ជុំវិញការប្រកួតរបស់ខ្លួន ព្រមទាំងសម្រេចថា៖«ប្រាក់រង្វាន់ដែល ម៉ឺន មេឃា ទទួលបានជើងឯករង តម្លៃខ្លួន ប្រាក់រង្វាន់គ្រូឆ្នើម និងប្រាក់ក្លិបសរុប ចំនួន ១៥,១២០០០០ ៛ (ដប់ប្រាំលានមួយសែនពីម៉ឺនរៀល) សូមវេចូលមន្ទីពេទ្យគុន្ធបុប្ផាទាំងអស់ ហើយសូមពឹងពាក់ដល់ស្ថានីយ PNN យកថវិកានេះប្រគល់ជូនមន្ទីរគន្ធបុប្ផាផង ហើយសូមថតបង្ហោះអោយមហាជនបានឃើញផងដើម្បីចូលរួមទាំងអស់គ្នា»។
នៅល្ងាចថ្ងៃទី២១ កក្កដា ២០២១ ដដែល លោក ម៉ា ស៊ីថេត ប្រធានផ្នែកកីឡារបស់ទូរទស្សន៍ PNN បានចេញឆ្លើយតបចំពោះប្រាក់រង្វាន់ថា៖«ប្រាក់រង្វាន់សម្រាប់ការប្រកួតខ្សែក្រវាត់ កំពូលជើងឯកគុនខ្មែរ រវាង ម៉ឺន មេឃា និងចាន់ ប៊ុនហឿន៖
*ចំពោះម៉ឺន មេឃា
– បើឈ្នះទទួលបាន ១៦លានរៀល
– បើចាញ់ទទួលបាន ៨លានរៀល
*ចំពោះ ចាន់ ប៊ុនហឿន
– បើឈ្នះទទួលបាន ១២លានរៀល
- បើចាញ់ទទួលបាន ៤លានរៀល
យោងតាមការសម្រេចរបស់សហព័ន្ធប្រដាល់គុនខ្មែរ ដោយបានផ្ដល់ជ័យជំនះដល់ ចាន់ ប៊ុនហឿន ដូចនេះប្រាក់រង្វាន់គឺ៖
*ម្ចាស់ខ្សែក្រវាត់ ចាន់ ប៊ុនហឿន ទទួលបាន១២លានរៀល
*ជើងឯករង ម៉ឺន មេឃា ទទួលបាន ៨លានរៀល
លោកបន្តថា ថវិកាទាំងអស់របស់មេឃា (៨លានរៀល + ថវិការក្លិប ២០ម៉ឺនរៀល) និងថវិការឧបត្ថម្ភលោក អេ ភូថង (១លានរៀល) គឺនៅរក្សាដដែល។ ដូចនេះបើសិនជា ម៉ឺន មេឃា ចង់ឧបត្ថម្ភទៅមន្ទីរពេទ្យគន្ធបុប្ផា អាចអញ្ជើញមកបើកថវិកាដោយផ្ទាល់នៅស្ថានីយ PNN និងយកទៅមន្ទីរពេទ្យគន្ធបុប្ផាដោយខ្លួនឯង ដោយហេតុថាពេលចប់កម្មវិធីភ្លាមៗខាងប្អូនបានបដិសេធមិនទទួល»។
ជាមួយគ្នានេះដែរអ្នកស្រី ស សុម៉ាលី ម្តាយរបស់ ម៉ឺន មេឃា បានបង្ហោះសារនៅព្រឹកថ្ងៃទី២២ កក្កដា ឆ្នាំ២០២៤ ក្រោយបញ្ចប់ការប្រកួត១យប់ ថា៖«រឿងអ្វីៗដែលកើតឡើងម្សិលម៉ិញនាងខ្ញុំសុំទោសបងប្អូនជនរួមជាតិទាំងអស់ផងដែលខ្ញុំនិងក្រុមគ្រួសារបានប្រើពាក្យខ្លះមិនល្អដោយកំហឹង ហើយរឿងម្សិលម៉ិញខ្ញុំនឹងក្រុមគ្រួសារចិត្តត្រជាក់នឹងលែងខឹងអស់ហើយហើយខ្ញុំសូមចប់ត្រឹមនឹង..ហើយបងប្អូនមួយចំនួនបានណែនាំក្រុមគ្រួសារអោយទៅបើកប្រាក់ឧបត្ថមនឹងយកមកទិញសំភារះជូនដល់ក្លឹបគុនខ្មែរតូចហើយអត់ៗ.ចឹងហើយខ្ញុំនឹងធ្វើតាមបងប្អូន។ ចុងក្រោយសូមជូនពរបងប្អូនហ្វែនទាំងអស់សុខភាពល្អនឹងសំណាងល្អ»។
យ៉ាងណាក្តី ក្រោយចប់ការប្រកួតកីឡាករ ចាន់ ប៊ុនហឿន បានប្រាប់អ្នកសារព័ត៌មានថា ខ្លួនសុំទោសទៅកាន់ ម៉ឺន មេឃា ហើយអាចប្រកួតដណ្តើមឡើងវិញបានទៀត ក្រោយរយៈពេល៣ខែ តាមការលក្ខន្តិកៈរបស់សហព័ន្ធប្រដាល់គុនខ្មែរ៕
