ទីក្រុងតូក្យូ- សមត្ថកិច្ចនគរបាលទីក្រុងតូក្យូបានចាប់បុរសពីបទចោទប្រកាន់ថាបានកាប់ឡានដែលបានដឹកសិល្បករជើងចាស់និងមានឈ្មោះល្បីល្បាញ Takeshi Kitano ប៉ុន្តែក្នុងហេតុការណ៍នោះមិនមាននរណាម្នាក់រងរបួសនោះទេ។
សិល្បករជើងចាស់ដែលជាអ្នកដឹកនាំ តារាសម្ដែងខាងលើនេះខណៈកើតហេតុការណ៍រំជួលព្រលឹងនោះកំពុងស្ថិតក្នុងរថយន្តជាមួយនឹងអ្នកបើកបរ ដោយពេលនោះរថយន្តទើបតែបើកចេញផុតពីស្ថានីយទូរទស្សន៍ TBS បានបន្តិច ព្រោះជារៀងរាល់ថ្ងៃសៅរ៍ពេលយប់លោកមានកម្មវិធី Talk Show ផ្សាយផ្ទាល់លើកញ្ចក់ទូរទស្សន៍។
ជនសង្ស័យបានយកឧបករណ៍ (ត្រសេះ) មកដំកម្ទេចរថយន្ត Kitano ជាច្រើនលើក ទាមទារឱ្យតារាជើងចាស់រូបនេះចុះពីលើរថយន្ត នេះបើយោងតាមការផ្សាយដោយទូរទស្សន៍ TBS។ ក្រោយឃើញហេតុការណ៍នោះសន្តិសុខយាមបានទូរស័ព្ទទៅប្ដឹងសមត្ថកិច្ចឱ្យមកចាប់ជនសង្ស័យនៅកន្លែងហេតុ។
ជនសង្ស័យជាបុរសម្នាក់ស្ថិតក្នុងវ័យជាង៤០ឆ្នាំ មានកាន់កាំបិតដែលមានមុខប្រវែង១០សង់ទីម៉ែត្រនៅក្នុងដៃ នេះបើយោងតាមការរាយការណ៍ពីសារព័ត៌មានក្នុងស្រុកដូចជា Kyodo និង TBS ។
មន្ត្រីប៉ូលិសបានបដិសេធមិនធ្វើការឆ្លើយឆ្លងចំពោះករណីនេះកាលពីថ្ងៃច័ន្ទកន្លងទៅគ្រាន់តែនិយាយថាជនសង្ស័យត្រូវបានចាប់ខ្លួននៅកន្លែងកើតហេតុព្រមជាមួយនឹងអាវុធប៉ុណ្ណោះ។
យោងតាម TBS បុរសជាជនសង្ស័យបានប្រាប់សមត្ថកិច្ចថាខ្លួនមានការខឹងគុំគួនដែលត្រូវបានលោក Kitano បដិសេធមិនខ្វល់អើពើកាលពីខែមិថុនាកន្លងទៅ ខណៈដែលខ្លួនបានលុតជង្គង់នៅពីមុខឡានរបស់តារាជើងចាស់ដ៏ល្បីរូបនេះ សុំឱ្យលោកជួយនាំខ្លួនចូលក្នុងវិស័យសិល្បៈ។ ប៉ូលិសកំពុងបន្តធ្វើការតាមដាននិងស៊ើបអង្កេតជាបន្តទៀតចំពោះករណីនេះ។
តារាជើងចាស់ពហុជំនាញលោក Kitano គឺជាតារាកំប្លែង តារាសម្ដែង ក៏ដូចជាអ្នកនិពន្ធមានកេរ្តិ៍ឈ្មោះល្បីនៅក្នុងប្រទេសជប៉ុន លោកបានឈ្នះពានរង្វាន់ តោមាស (Golden Lion) នាមហោស្រពភាពយន្តទីក្រុង Venice Film Festival តាមរយៈស្នាដៃភាពយន្ត «Hana-Bi» កាលពីឆ្នាំ១៩៩៧ ដោយលោកមានស្នាដៃដឹកនាំភាពយន្តល្បីៗជាច្រើនទៀតដូចជា «Zatoichi» , «Sonatine» និង «Outrage» ជាដើម។
