«សូមចូលរួមសម្ដែងនូវមរណទុក្ខដ៏សែនក្រៀមក្រំ និងសោកសង្រេងបំផុត ជូនដល់ក្រុមគ្រួសារនៃសពអាកាសយានិក ស៊ុន ផល្លា និងអាកាសយានិក ខេង ឆៃយុទ្ធ ចំពោះការបាត់បង់នូវកូនប្រុស ស្វាមី ឪពុកល្អ ជាទីស្រឡាញ់រកទីបំផុតគ្មាន និងជាការបាត់បង់ដ៏ធំធេងសម្រាប់ជាតិ នៃកងយោធពលខេមរភូមិន្ទទាំងមូលនូវនាយទាហានមានដែលឆន្ទៈ សមត្ថភាព និងទឹកចិត្តស្នេហាជាតិ គួរជាទីសោកស្ដាយស្រណោះអាឡោះអាល័យជាពន់ពេក។»
ខ្លឹមសារខាងលើ គឺជាសាររំលែកទុក្ខរបស់សម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ផ្ញើជូនក្រុមគ្រួសារ និងសាច់ញាតិអាកាសយានិកដែលបានពលីជីវិត ក្នុងហេតុការណ៍ធ្លាក់ឧទ្ធម្ភាគចក្រនៅស្រុកវាលវែង ខេត្តពោធិ៍សាត់។ ខ្លឹមសារនៃសាររំលែកទុកនេះត្រូវបាន បង្ហោះលើទំព័រហ្វេប៊ុកផ្លូវការរបស់សម្ដេច នៅប៉ុន្មានម៉ោងក្រោយ សពអាកាសយានិកទាំង២ ត្រូវបានកងកម្លាំងរុករករកឃើញជាបន្តបន្ទាប់នៅថ្ងៃទី២៩-៣០ ខែកក្កដា ឆ្នាំ២០២៤។
សូមរំឭកថា ឧទ្ធម្ភាគចក្រយោធាដែលធ្លាក់ បានបាត់ពីប្រព័ន្ធទំនាក់ទំនង កាលពីថ្ងៃទី ១២ ខែកក្កដា ឆ្នាំ ២០២៤ ហើយត្រូវបានរកឃើញនៅចំណុចលើខ្នងភ្នំយ៉ាវយ៉ៃ ស្ថិតនៅក្នុងឃុំថ្មដា ស្រុកវាលវែង ខេត្តពោធិ៍សាត់ ក្រោយចំណាយពេលរុករកអស់រយៈពេល១៧ថ្ងៃ។ សពអាកាសយានិកម្នាក់ គឺលោក ខេង ឆៃយុទ្ធ រកឃើញថាស្លាប់នៅនឹងកៅអីឧទ្ធម្ភាគចក្រ ចំណែកសពលោក ស៊ុន ផល្លា រកឃើញនៅភ្នំចម្ងាយជាង២០០ ម៉ែត្រពីទីតាំងយន្តហោះធ្លាក់។
មកទល់ពេលនេះក្រសួងការពារជាតិ នៅមិនទាន់បញ្ជាក់ពីមូលហេតុជាក់លាក់ដែលបណ្ដាលឲ្យឧទ្ធម្ភាគចក្រធ្លាក់នោះទេ។ បើតាម នាយឧត្ដមសេនីយ៍ ឥត សារ៉ាត់ អគ្គមេបញ្ជាការរង នៃកងយោធពលខេមរភូមិន្ទ ដែលដឹកនាំប្រតិបត្តិការរុករកដោយផ្ទាល់ ប្រាប់ថា បំណែកយន្តហោះដែលធ្លាក់មិនទាន់អាចយកចេញបានទេ។ ជាបណ្ដោះអាសន្ន គឺប្រមូលយកតែបំណែក និងគ្រឿងសំខាន់ មានប្រអប់ខ្មៅជាដើម ដើម្បីដឹងពីមូលហេតុនៃការធ្លាក់របស់ឧទ្ធម្ភាគចក្រ។
អត្ថបទ៖ ឈិន ធារ៉ាត់
