យោងតាមការផ្សព្វផ្សាយរបស់ក្រុមព្រះសុរិយានៅលើបណ្ដាញសង្គម Facebook ថាក្រុមខ្លួនបានទទួលដំណឹងមរណភាពអតីតតារាភាពយន្តជើងចាស់ ណុប យ៉ាដាកាលពីថ្ងៃទី៦ ខែកញ្ញា ឆ្នាំ២០២១។ តួឯកក្នុងរឿង «រិទ្ធីវង្ស ឬ នរកលោកិយ» បានទទួលមរណភាពតាំងពីថ្ងៃទី២៧ ខែ សីហា ឆ្នាំ២០២១ ក្នុងគេហដ្ឋានរបស់លោកស្រីនារខេត្តមួយក្បែរក្រុងម៉ារ៍សី ប្រទេសបារាំង ក្នុងជន្មាយុ ៨១ ឆ្នាំ ដោយរោគាពាធ។
ដំណឹងដ៏ក្រៀមក្រំនេះបានធ្វើឱ្យសាធារណជនមានការសោកស្ដាយជាពន់ពេក ព្រោះលោកស្រីគឺជាមរតកសិល្បៈវប្បធម៌ដ៏មានតម្លៃមួយរបស់ប្រជាជាតិខ្មែរ ការបាត់បង់លោកស្រីគឺជាការខាតបង់មួយយ៉ាងធំធេងសម្រាប់វិស័យសិល្បៈខ្មែរនាយុគសម័យ។
គួរដឹងថាផងដែថា លោកស្រី ណុប យ៉ាដា ត្រូវបានបងប្អូន មហាទស្សនិកជន ស្គាល់លោកស្រីយ៉ាងច្បាស់តាមរយះខ្សែភាពយន្តខ្មែរជាច្រេីនដូចជា «រឿង កូលាបស្រពោន» «រឿង ពេជ្ឃឃាតក្រមុំ» «រឿង បក្សីចាំក្រុង» «រឿងចៅស្រទបចេក» ពិសេសរឿង «ស្រមោលអតីតកាល» និង «រឿងនរកលោកិយ»។
ក្រុមការងារសារព័ត៌មានត្រយង សូមចូលរួមរំលែកនូវមរណទុក្ខដ៏សែនក្រៀមក្រំជាទីបំផុតជាមួយនឹងក្រុមគ្រួសារនៃសព និងសូមបួងសួងឱ្យដួងវិញ្ញាណក្ខន្ធរបស់លោកស្រីទៅកាន់សុគតិភព៕
