រាជរដ្ឋាភិបាល បានចំណាយថវិកាជាតិសរុបចំនួន ៥ ៤៣៨ ៤៨៦ ៤១៩ ០០០ រៀល ឬស្មើនឹង ១ ៣៥៩,៦២ លានដុល្លារអាមេរិក សម្រាប់ កម្មវិធីឧបត្ថម្ភសាច់ប្រាក់ជូនដល់គ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវិដ–១៩ ប្រមាណ ៧សែនគ្រួសារ ស្មើនឹង ២,៨ លាននាក់ រយៈពេល ៤៣ ខែ និងការអនុវត្តយុទ្ធសាស្ត្រចាកចេញពីកម្មវិធីមានរយៈពេល ៣ ខែ។ នេះបើយកតាមសេចក្ដីប្រកាសព័ត៌មានរបស់ក្រុមប្រឹក្សាជាតិគាំពារសង្គមកាលពី ថ្ងៃទី ៣០ ខែកក្កដា ឆ្នាំ ២០២៤។
កន្លងមក ក្នុងគោលបំណងលើកកម្ពស់ប្រសិទ្ធភាព និងប្រតិតុល្យការនៃការអនុវត្តកម្មវិធី ក្រុមប្រឹក្សាជាតិគាំពារសង្គម បានរៀបចំការវាយតម្លៃជាប្រចាំសម្រាប់ កម្មវិធីឧបត្ថម្ភសាច់ប្រាក់នេះ រួមមានទាំងការវាយតម្លៃកម្មវិបាករបស់កម្មវិធីលើសង្គម-សេដ្ឋកិច្ច និងជីវភាពរស់នៅរបស់ប្រជាជន និងការវាយតម្លៃលើដំណើរការនៃការអនុវត្តកម្មវិធីផងដែរ។
ក្រោយពីបានបិទបញ្ចប់ការអនុវត្ត កម្មវិធីឧបត្ថម្ភសាច់ប្រាក់នេះ រាជរដ្ឋាភិបាល ក៏បានសម្រេចដាក់ឱ្យអនុវត្ត កម្មវិធីជាតិជំនួយសង្គមក្នុងកញ្ចប់គ្រួសារ តាមរយៈការធ្វើស្ថាប័នូបនីយកម្ម និងសមាហរណកម្មកម្មវិធីជាតិជំនួយសង្គមទាំងអស់ ដើម្បីពង្រីកការគ្របដណ្ដប់ បង្កើនប្រសិទ្ធភាព និងការវិនិយោគហិរញ្ញវត្ថុ ជាមួយនឹងវឌ្ឍនភាពនៃការអនុវត្តកម្មវិធីនេះ។
គិតត្រឹមដំណាច់ ខែមិថុនា ឆ្នាំ ២០២៤នេះ ក្នុងចំណោមគ្រួសារគោលដៅដែលមានបណ្ណសមធម៌ចំនួន ៧០ ម៉ឺនគ្រួសារ ឬស្មើនឹង ២,៨ លាននាក់ មានគ្រួសារចំនួន ៥៧ ម៉ឺនគ្រួសារ ស្មើនឹងប្រមាណ ៨៤ % បានចុះឈ្មោះចូលកម្មវិធីរួចរាល់ និងទទួលផលពីកម្មវិធី ដោយរាជរដ្ឋាភិបាលបាន ចំណាយថវិកាសរុប ប្រមាណ ៧២,៥ ប៊ីលានរៀល ស្មើនឹងប្រមាណ ១៨ លានដុល្លារអាម៉េរិក។
ដោយឡែក សម្រាប់ក្រុមគោលដៅនៅសេសសស់ចំនួនប្រមាណ ១៦% ក្រុមការងារអន្តរ ក្រសួងពាក់ព័ន្ធ ដោយមានការសម្របសម្រួលពី អគ្គលេខាធិការដ្ឋានក្រុមប្រឹក្សាជាតិគាំពារសង្គម បាន និងកំពុងរៀបចំយុទ្ធនាការដើម្បីជំរុញការចុះបញ្ជីឱ្យបានទាន់ពេល ស្របតាមគោលនយោបាយរបស់ រាជរដ្ឋាភិបាលនីតិកាលទី ៧ នៃរដ្ឋសភា៕
ឈិន ធារ៉ាត់
