ការធ្វើបាតុកម្មដោយសន្ដិវិធី គឺអាជ្ញាធរនឹងចាត់វិធានការការពារ ប៉ុន្ដែសកម្មភាពនៃចេតនារបស់មនុស្សមួយក្ដាប់តូចមិនមែនត្រឹមតែធ្វើបាតុកម្មធម្មតានោះទេ តែជាលេសចង់ផ្ដួលរំលំរាជរដ្ឋាភិបាលស្របច្បាប់ដែលសមត្ថកិច្ចត្រូវចាត់វិធានការទប់ស្កាត់ និងបង្ក្រាប។
តាមរយៈសារជាសំឡេងចែកចាយតាមបណ្ដាញសង្គមនៅថ្ងៃទី១៧ ខែសីហា ឆ្នាំ២០២៤នេះ លោកបណ្ឌិត ទូច សុឃៈ (សុខៈ) អ្នកនាំពាក្យរងក្រសួងមហាផ្ទៃ បានលើកឡើងថា នគរបាលក្ដី អាជ្ញាធររដ្ឋបាលដែនដីគ្រប់លំដាប់ថ្នាក់ក្ដី បានចាត់វិធានការទប់ស្កាត់ជនមួយក្ដាប់តូចបង្កឲ្យមានចលាចលនៅក្នុងសង្គមនេះ គឺមិនមែនជាការគាំកំហែងនោះទេ។
«ខ្ញុំសូមបញ្ជាក់ថាប្រសិនបើធ្វើបាតុកម្មដោយសន្ដិវិធី និងស្របច្បាប់នៃព្រះរាជាណាចក្រកម្ពុជា គឺមិនខុសទាស់ទេ គឺអាជ្ញាធរមានសមត្ថកិច្ចមានតែជួយសម្រួល។ អ្វីទៅជាបាតុកម្មដោយសន្ដិវិធី? ពោលគឺបាតុកម្មត្រូវរៀបចំលិខិតស្នាមស្នើសុំច្បាប់មកអាជ្ញាធរដែនដី ដែលយើងចង់ធ្វើបាតុកម្ម ហើយបាតុកម្មគឺជាការប្រមូលផ្ដុំគ្នា ហើយដង្ហែក្បួន ដើម្បីបញ្ចេញមតិ និងបង្ហាញឆន្ទៈដោយសន្ដិវិធី។ ត្រឡប់មកវិញសកម្មភាពជនមួយក្ដាប់តូចនៅក្រៅប្រទេស និងនៅក្នុងស្រុកមួយចំនួន បានត្រៀមរៀបចំផែនការគត់មត់ រៀបចំសម្ភារៈឧបករណ៍បង្កគ្រោះថ្នាក់នានា ហើយនឹងសារញុះញង់ជំរុញឲ្យមានអំពើហិង្សា ដែលការប្រមូលផ្ដុំនោះប៉ះជាមួយសមត្ថកិច្ច។ នេះមិនមែនជាបាតុកម្មនោះទេ គឺជាផែនការកុបកម្ម ឈានទៅបម្លែងទៅជាបដិវត្តពណ៌ ផ្ដួលរំលំរាជរដ្ឋាភិបាល ដោយយកលេសគម្រោង CLV ជាឈ្នាន់នយោបាយ រុញទៅជាបដិវត្តពណ៌ ដើម្បីផ្ដួលរំលំរដ្ឋាភិបាលស្របច្បាប់។ ដូច្នេះនគរបាល អាជ្ញាធររដ្ឋបាលដែនដី ជាពិសេសក្រសួងមហាផ្ទៃ មានតួនាទីភារកិច្ចការពារសន្ដិសុខជារួម ការពារប្រជាពលរដ្ឋ ការពាររាជរដ្ឋាភិបាលស្របច្បាប់ ការពារកម្ពុជាកុំឲ្យក្រឡាប់ចាក់ ដោយសារតែជនឱកាសនិយមនៅក្រៅប្រទេស ដើម្បីបំពេញមហិច្ឆតារបស់ខ្លួន មិនគិតគូអំពីគ្រោះថ្នាក់អ្នកដែលភ័ន្ដច្រលំចូលរួម មិនគិតគូរគ្រោះថ្នាក់ជាតិទាំងមូល ដោយគិតគូរតែអំណាចផ្ទាល់ខ្លួនរបស់ក្រុមខ្លួន»។ នេះជាការលើកឡើងរបស់លោកបណ្ឌិត ទូច សុឃៈ។
លោកបណ្ឌិតបានបន្ដទៀតថា ក្រសួងមហាផ្ទៃបានដាក់ចេញនូវវិធានការរៀបរយ និងគត់មត់ ដោយបានកំណត់នូវមុខសញ្ញាជាបន្ដបន្ទាប់ ហើយបានបង្ក្រាបចាប់ខ្លួនប្រតិករនៅក្នុងប្រទេសមួយចំនួនបញ្ជូនទៅកាន់តុលាការចាត់វិធានការតាមច្បាប់។
នៅក្នុងផែនការទប់ស្កាត់ចលានារបស់ជនមួយក្ដាប់តូចនោះ លោកបណ្ឌិត ទូច សុឃៈ បានបញ្ជាក់ពីផែនការរបស់ក្រសួងមហាផ្ទៃ មានសេណារីយ៉ូសំខាន់ចំនួន៣ គឺទី១ កងកម្លាំងនគរបាលរាប់ចាប់តាំងពីអគ្គស្នងការដ្ឋានរហូតមកដល់ស្នងការរដ្ឋាន អធិការដ្ឋាន ប៉ុស្ដិ៍នគរបាល ខាងរដ្ឋបាលស៊ីវិលវិញរាប់ចាប់តាំងពីរដ្ឋបាលខេត្ត ក្រុង ស្រុក ខណ្ឌ សង្កាត់ និងឃុំ និងទី៣ អគ្គពន្ធនាគារ គិតចាប់ថ្នាក់ក្រសួងរហូតដល់ពន្ធនាគាររាជធានី ខេត្ត គឺត្រៀមលក្ខណៈទប់ស្កាត់បដិវត្តពណ៌តាមរយៈកុបកម្មបង្កើតឡើងដោយក្រុមឱកាសនិយម ដោយយកគម្រោង CLV ជាលេសធ្វើឲ្យមានការភ័ន្ដច្រលំដល់ប្រជាជនទូទៅ និងយុវជនទូទៅ។
ទាក់ទងនឹងបញ្ហាខាងលើនេះ លោកបណ្ឌិតទូចសុឃៈ បានអំពាវនាវឲ្យក្រុមមេខ្លោងទាំងអស់មេត្តាបញ្ឈប់សកម្មភាពរបស់ខ្លួនជាបន្ទាន់ កុំបន្ដញុះញង់ និងបង្កើតសកម្មភាពចលនាបដិវត្តពណ៌ ដែលយកលំនាំតាមប្រទេសនេះ ឬប្រទេសនោះ ដើម្បីបំពេញមហិច្ឆតារបស់ខ្លួន។ ចំពោះក្រុមប្រតិបត្តិករនៅក្នុងប្រទេស សូមមេត្តាដកខ្លួន ឬចូលខ្លួនមកសារភាព គឺសមត្ថកិច្ចមិនយកទោសអូដំណើរអ្វីនោះទេ។ ទន្ទឹមនឹងនេះសូមប្រជាពលរដ្ឋទាំងអស់កុំចូលរួមសកម្មភាព ហើយចូលរួមសហការជាមួយសមត្ថកិច្ច ដើម្បីផ្ដល់ជាដំណឹងនូវការប្រមូលផ្ដុំណាមួយមកដល់អាជ្ញាធរមានសមត្ថកិច្ចដែនដី ដើម្បីឈានទៅបង្ក្រាបឲ្យទាន់ពេលវេលា ហើយសូមឲ្យប្រជាពលរដ្ឋកុំមានការព្រួយបារម្ភអំពីចលាចលណាមួយកើតឡើង ព្រោះថារាជរដ្ឋាភិបាលមានផែនការការពារយ៉ាងគត់មត់ ហើក្រសួងមហាផ្ទៃ ដែលជាសេនាធិការរបស់រាជរដ្ឋាភិបាលក៏មានផែនការទប់ស្កាត់និងបង្ក្រាបឲ្យទាន់ពេលវេលាដូចគ្នា។ គំរូមានស្រាប់ហើយកាលពីឆ្នាំ ២០១៣-២០១៤ គឺបដិវត្តពណ៌បានកើតឡើង រាជរដ្ឋាភិបាលបានបង្ក្រាបប្រកបដោយប្រសិទ្ធភាព ហើយមិនប៉ះពាល់ធំដុំណាមួយទៅដល់សន្ដិសុខប្រជាពលរដ្ឋ៕
ខាងក្រោម គឺជាបណ្ដុំរូបភាពកងកម្លាំង ត្រៀមការពារសន្ដិសុខ នៅរាជធានី
