ព្រះខ័នរាជស្វាយរៀង តំណាងកម្ពុជា បានចាកចេញពីមាតុប្រទេសដើម្បីទៅចូលរួមពានរង្វាន់អន្តរជាតិ ASEAN Club Championship Shopee Cup នៅប្រទេសម៉ាឡេស៊ី ដោយនឹងត្រូវប៉ះក្រុម Terengganu FC នៅថ្ងៃពុធ ទី២១ ខែសីហា ឆ្នាំ២០២៤ ម៉ោង ៨:០០ ល្ងាច កីឡដ្ឋាន SULTAN MIZAN ZAINAL ABIDIN ។
ខាងក្រោមនេះជាប្រវត្ត៥ប្រកួតចុងក្រោយ របស់ក្រុមព្រះខ័នរាជស្វាយរៀង
មុនមានឈ្មោះឡើងមកកាន់ពូល A ក្រុមតំណាងកម្ពុជា ព្រះខ័នរាជស្វាយរៀង បានយកឈ្នះលើក្រុម Young Elephants FC របស់ឡាវ ដោយលទ្ធផលសរុបពីរជើង ៨ទល់នឹង៣ ដោយកាលពីជើងទី១ ព្រះខ័នរាជស្វាយរៀង បានយកឈ្នះដោយលទ្ធផល ៣-២ នៅទឹកដីឡាវ និងជើងទី២ បន្តយកឈ្នះ ដោយលទ្ធផល ៥-១ នៅលើទឹកដីកម្ពុជា។
ប្រកួតទី៣របស់ក្រុមព្រះខ័នរាជស្វាយរៀង គឺបានយកឈ្នះលើក្រុមភ្នំពេញក្រោន ដោយលទ្ធផល ២-១ កាលពីថ្ងៃទីទី០៤ ខែសីហា ឆ្នាំ២០២៤ គ្រងជើងឯកពានរង្វាន់ គ្រុឌខេមបូឌានស៊ូបភើខាប់ ឆ្នាំ២០២៤
(Krud Cambodian Super Cup 2024) នៅពហុកីឡដ្ឋានជាតិ និងជាពានមុនបើករដូវកាលលីគកំពូលកម្ពុជា។
ដោយលែក២ប្រកួតក្នុងលីគកំពូលកម្ពុជា វិញឃើញថា ក្រុមដែលមានមូលដ្ឋាននៅខេត្តស្វាយរៀង ដណ្តើមបាន៦ពិន្ទុ ក្រោយឈ្នះក្រុមកងយោធពលខេមរភូមិន្ទ ដោយលទ្ធផល ៧-០ កាលពីថ្ងៃទី១១ ខែសីហា ឆ្នាំ២០២៤ នៅសប្តាហ៍ទី១ និងប្រកួតទី២ បានបន្តឈ្នះលើក្រុមអាយ អេស អាយ ដង្កោសែនជ័យ ដោយលទ្ធផល ៤-១ កាលពីថ្ងៃទី១៦ ខែសីហា ឆ្នាំ២០២៤ នៅសប្តាហ៍ទី២។
រីឯ៥ប្រកួតចុងក្រោយ របស់ក្រុម Terengganu FC វិញឃើញថា៖
- ថ្ងៃទី២៦ ខែមិថុនា ឆ្នាំ២០២៤ Johor Darul Ta’zim F.C. ៤-០Terengganu FCលីគកំពូលម៉ាឡេស៊ី
- ថ្ងៃទី៣០ ខែមិថុនា ឆ្នាំ២០២៤ Terengganu FC ៣-២Negeri Sembilan លីគកំពូលម៉ាឡេស៊ី
- ថ្ងៃទី៣ ខែសីហា ឆ្នាំ២០២៤ Selangor ៤-០ Terengganu FC
- ថ្ងៃទី៨ ខែសីហា ឆ្នាំ២០២៤ Kuala Lumpur City ០-២ Terengganu FC លីគកំពូលម៉ាឡេស៊ី
- ថ្ងៃទី១៦ ខែសីហា ឆ្នាំ២០២៤ Terengganu FC ១-១ Sri Pahang លីគកំពូលម៉ាឡេស៊ី
កាលវិភាគប្រកួតរបស់ក្រុមព្រះខ័នរាជស្វាយរៀង
ពានរង្វាន់ជើងឯកតំបន់អាស៊ាន នេះធ្លាប់រៀបចំឡើង២លើកមក ដោយក្នុងឆ្នាំ២០០៣ ជើងឯកបានទៅក្រុម East Bengal របស់ឥណ្ឌា ក្រោយយកឈ្នះក្រុម BEC Tero Sasana របស់ថៃ នៅវគ្គផ្ដាច់ព្រ័ត្រ ក្នុងទីក្រុងហ្សាកាតា ប្រទេសឥណ្ឌូណេស៊ី ហើយឆ្នាំ២០០៥ ជើងឯកបានទៅក្រុម Tampines Rovers របស់សិង្ហបុរី ក្រោយយកឈ្នះលើក្រុម Pahang FA របស់ម៉ាឡេស៊ី ដោយលទ្ធផល ៤-២ នៅទីក្រុងបានដារសេរីបេហ្គាវ៉ាន់ ប្រទេសប្រ៊ុយណេ។
ចំណែកក្រុមដំណាងឱ្យកម្ពុជា ចូលរួមក្នុងពានរង្វាន់នេះគឺ នៅឆ្នាំ២០០៣ ក្រុម Samart United (បច្ចុប្បន្នភ្នំពេញក្រោន) ហើយនៅឆ្នាំ២០០៥ ក្រុមណាហ្គាខប បានចូលរួម (បច្ចុប្បន្ន ណាហ្គាវើល)៕
