ពានរង្វាន់យុវជនអាយុក្រោម ១៦ឆ្នាំ ឆ្នាំ២០២៤ បានបញ្ចប់ការប្រកួតសប្តាហ៍ទី១២ ហើយ ខណៈក្រុមវិសាខា អាយុក្រោម ១៦ឆ្នាំ អាចរក្សាបានកំណត់ត្រាសំខាន់ៗ ក្នុងពានយុវជនអាយុក្រោម១៦ឆ្នាំ ត្រឹមសប្តាហ៍ទី១២។
សារព័ត៌មានត្រយង សូមជម្រាបជូនប្រិយមិត្តពីរឿងសំខាន់ទាំង ៣ដូចតទៅ៖
- ទី១) ក្រុមយុវជនអាយុក្រោម ១៦ឆ្នាំ របស់វិសាខា គឺជាក្រុមតែមួយគត់ដែលរក្សាជ័យជម្នះបានវែងជាងគេ នៃការប្រកួតពានរង្វាន់ជម្រើសជើងឯកយុវជនអាយុក្រោម ១៦ឆ្នាំ U16 Cambodian Youth League 2024 បន្ទាប់ពីយកឈ្នះលើក្រុមម្ចាស់ផ្ទះ U16 អាយ អេស អាយ ដង្កោសែនជ័យ ៣-១ គិតត្រឹមជុំទី២ សប្ដាហ៍ទី១២ កាលពីថ្ងៃទី១៨ ខែសីហា ឆ្នាំ២០២៤។
- ទី២) ក្រុមយុវជនអាយុក្រោម ១៦ឆ្នាំ របស់វិសាខា ជាក្រុមដែលគ្មានពិន័យកាតក្រហមសោះ ត្រឹមសប្តាហ៍ទី១២ នេះ ខណៈកាតដែលលោកអាជ្ញាកណ្តាល បានចាយសរុបកើនដល់ ១៩៩សន្លឹក ក្នុងនោះមានក្រហម ២០សន្លឹក។
- ទី៣) ក្រុមយុវជនអាយុក្រោម ១៦ឆ្នាំ របស់វិសាខា ជាក្រុមដែលរក្សាសំណាញទីបានច្រើនជាងគេចំនួន ៥លើក ដោយក្នុងនោះកីឡាករ មុត រក្សា រក្សាបាន៣លើក និងកីឡាករ វី ផានិត រក្សាបាន២លើក។
បច្ចុប្បន្នក្រុមយុវជនអាយុក្រោម ១៦ឆ្នាំ របស់វិសាខា កំពុងឈរកំពូលតារាង ១២ប្រកួតឈ្នះ ១១ប្រកួត ចាញ់១ ស៊ុតបញ្ចូលទីបាន ៤៥គ្រាប់ របូតវិញ ១២គ្រាប់ មាន ៣៣ពិន្ទុក្នុងដៃ។ ខណ:អង្គរថាយហ្គឺរ នៅបាត តារាង ១២ប្រកួតឈ្នះ ១ ស្មើ១ និងចាញ់១០ប្រកួត ស៊ុតបាន ៦គ្រាប់ របូត ៤៧គ្រាប់ មាន ៤ពិន្ទុ។
សូមជម្រាបថាការប្រកួតពានរង្វាន់យុវជនអាយុក្រោម១៦ឆ្នាំបានចាប់ពីថ្ងៃទី១៥ ខែឧសភា ដល់ថ្ងៃទី៣ខែវិច្ឆិកា ឆ្នាំ២០២៤ ដោយតម្រូវឲ្យក្រុមទាំងអស់ប្រកួតគ្នាចំនួន២ជុំ ហើយក្រុមមានពិន្ទុខ្ពស់ជាងគេចំនួន ៤មានឈ្មោះឡើងទៅប្រកួតវគ្គពាក់កណ្តាលផ្ដាច់ព្រ័ត្រ ៕
