សិល្បៈជាតិ៖ មានអ្នកគាំទ្រច្រើនណាស់បានដាក់ក្ដីរំពឹងខ្ពស់ចំពោះកញ្ញា កូលៀន ម៉ែលហ្វាត ដែលបានត្រឡប់មកដណ្ដើមមកុដ Miss Global Cambodia 2024។ អ្វីគួរឱ្យកត់សម្គាល់ជាពិសេសទៀតនោះគឺ បវរកញ្ញារូបនេះនៅតែបោះចោលក្ដីសង្ឃឹម ហើយបានព្យាយាមប្រឹងតស៊ូប្រកួតដើម្បីលើកកិត្តិនាមបវរកញ្ញាតំណាងខេត្ត ព្រៃវែង។ តើកញ្ញា កូលៀន ម៉ែលហ្វាត ជាអ្នកណា?
នៅក្នុងព័ត៌មាននេះ សារព័ត៌មានត្រយងនឹងបង្ហាញជូននូវសេចក្ដីលម្អិតខ្លះៗអំពីកញ្ញា កូលៀន ម៉ែលហ្វាត ដែលមានឈ្មោះហៅក្រៅថា កល្យាណ មានវ័យ ២២ ឆ្នាំ កំពុងជាបេក្ខភាពបវរកញ្ញាតំណាងឱ្យខេត្តព្រៃវែង ចូលរួមប្រកួតក្នុងកម្មវិធី Miss Global Cambodia 2024។
កញ្ញា កូលៀន ម៉ែលហ្វាត បានឈានជើងចូលរួមប្រកួតក្នុងវិស័យប្រកួតសម្រស់បវរកញ្ញាដំបូងបង្អស់នៅក្នុងកម្មវិធី Miss Supranational Cambodia នៅឆ្នាំ ២០២២។ ពេលនោះហើយដែលអ្នកគាំទ្រ និងអ្នកនិយមតាមដានការប្រកួតបវរកញ្ញាចាប់ផ្ដើមចាប់អារម្មណ៍កញ្ញាដែលមានមុខមាត់ដូចជាកូនកាត់ និងមានសមត្ថភាពអាចនិយាយភាសាអង់គ្លេស-បារាំង បានយ៉ាងស្ទាត់ជំនាញ។ បើទោះបីជាទើបចូលប្រឡូកក្នុងការប្រកួតមិនទទួលបានជោគជ័យជាដំកំភួន ប៉ុន្តែបវរកញ្ញារូបនេះបានទទួលនូវបទពិសោធន៍ជាច្រើនពីកម្មវិធី រហូតធ្វើឱ្យកញ្ញាកាន់តែមានចិត្តពុះពារចង់ចូលរួមប្រកួតម្ដងទៀត។
បានដល់ពាក់កណ្ដាលឆ្នាំ ២០២៣ អំឡុងខែមិថុនា គេស្រាប់តែឃើញកញ្ញា កូលៀន ម៉ែលហ្វាត លេចមុខចូលរួមប្រកួតម្ដងទៀតនៅក្នុងកម្មវិធី Miss Universe Cambodia ឆ្នាំ ២០២៣ ពោលគឺនៅជំនាន់ជាមួយកញ្ញា ចន សុទីម៉ា។ កូលៀន បានចូលរួមប្រកួតក្នុងនាមជាបវកញ្ញាតំណាងឱ្យខេត្តព្រៃវែង ដែលជាខេត្តមួយមានសក្តានុពលលើវិស័យកសិកម្ម និងជាខេត្តនៃច្រករបៀងសេដ្ឋកិច្ចស្រូវអង្ករ និងជលផលដ៏សំខាន់របស់ប្រទេសកម្ពុជា។ ក្រោយបញ្ចប់ការប្រកួតជាស្ថាពរ កញ្ញា កូលៀន ម៉ែលហ្វាត ទទួលបានតំណែងលំដាប់រងទី ៤ពីកម្មវិធី ដែលពិតជារឿងដ៏គួរឱ្យភ្ញាក់ផ្អើលបំផុតទៅកាន់អ្នកគាំទ្រ។
ដោយឡែក នៅថ្ងៃប្រកាសបើកកម្មវិធីនៃការប្រកួត Miss Global Cambodia 2024 និងថ្ងៃបំពាក់ឈៀងដល់បេក្ខនារីគ្រប់រូបជាផ្លូវការ គេស្រាប់តែឃើញកញ្ញា កូលៀន ម៉ែលហ្វាត បង្ហាញមុខចូលមកប្រកួតជាថ្មីម្ដងទៀត ថែមទាំងមានឈ្មោះជាបវកញ្ញាតំណាងឱ្យខេត្តព្រៃវែងជាលើកទី ២ រហូតអ្នកគាំទ្រលាន់មាត់សួរគ្រប់គ្នាថា ហេតុអ្វីបានជាកញ្ញាជ្រើសយកតំណាងខេត្តព្រៃវែងគ្រប់ការប្រកួតបែបនេះ?
នៅលើសំណេរនៃការបកស្រាយរបស់កញ្ញា កូលៀន ម៉ែលហ្វាត បានបញ្ជាក់ឱ្យដឹងថា កញ្ញាគឺជាក្មេងស្រីដែលបានចាប់កំណើតនៅលើទឹកដីខេត្តព្រៃវែង ដែលមានជីជូនជីតា និងម្ដាយជាអ្នកខេត្តព្រៃវែងតែម្ដង។ ចម្រើនវ័យបានធំបន្តិច កញ្ញាក៏បានចេញទៅរស់នៅប្រទេសបារាំងជាមួយម្ដាយ និងបានធំឡើង រួមទាំងបន្តការសិក្សានៅទីនោះ។
នៅក្នុងដួងចិត្តរបស់កញ្ញា កូលៀន ម៉ែលហ្វាត មិនត្រឹមតែចាត់ទុកខេត្ត ព្រៃវែង ជាទឹកដីទីកន្លែងដែលបានផ្ដល់កំណើតឱ្យខ្លួននោះទេ ប៉ុន្តែកញ្ញាបានចាត់ទុកថា ជាដែនដីមួយបណ្ដុះ នូវគំនិតនៃការតស៊ូសម្រាប់កញ្ញា ដូច្នោះហើយទើបកញ្ញាព្យាយាមចូលរួមប្រកួតក្នុងវិស័យបវរកញ្ញាដើម្បីលើកកិត្តិនាមឱ្យនារីក្នុងខេត្ត ព្រៃវែងទាំងមូល ដែលមានតែពាក្យថាតស៊ូឆ្ពោះទៅមុខ គ្មានទេពាក្យថាចុះចាញ់។
ការវិលចូលមកប្រកួតជាលើកទី ៣ នេះ អ្នកគាំទ្របានដាក់ក្ដីរំពឹងយ៉ាងខ្ពស់ណាស់ថា មកុដ Miss Global Cambodia 2024 នឹងបានទៅលើដៃរបស់ Miss Global ព្រៃវែងម្នាក់នេះជាក់ជាមិនខាន ព្រោះថា មកលើកនេះកញ្ញា កូលៀន ម៉ែលហ្វាត បានត្រឡប់មកវិញទាំងព្រមជាកញ្ចប់ត្រូវគ្រប់គ្រឿងតាមលក្ខខន្តិកៈដែលស្ថាប័ន Miss Global ចង់បានតែម្ដង។
សូមជម្រាបបន្ថែមថា កញ្ញា កូលៀន ម៉ែលហ្វាត មានកំពស់ ១៦៥ សង់ទីម៉ែត្រ ទំងន់ខ្លួន ៤៥ គីឡូក្រាម ទំហំទាំង ៣ ៣៤cm-២៥cm-៣៦cm។ ក្រៅពីមានឈ្មោះជាបវកញ្ញាហើយនោះ កញ្ញា កូលៀន ម៉ែលហ្វាត ក៏មានអាជីពជាតារាបង្ហាញម៉ូដ និងធ្លាប់ចូលរួមសម្ដែងនៅក្នុងស្ពតពាណិជ្ជកម្ម និងបទចម្រៀងផងដែរ៕
