សិល្បៈជាតិ៖ នៅក្នុងកម្មវិធីរាត្រីគ្រងមកុដរដូវកាលទី ២ និងការប្រកួតវគ្គផ្ដាច់ព្រ័ត្រនៃកម្មវិធី Miss and Mister Majestic ឆ្នាំ២០២៤ នេះ បានប្រារព្ធឡើងយ៉ាងអស្ចារ្យនារាត្រីថ្ងៃទី ២២ ខែសីហា ឆ្នាំ ២០២៤ នៅផ្សារទំនើបអ៊ីនអនម៉លសែនសុខ ដោយមានការអញ្ជើញចូលរួមពីសំណាក់បវរកញ្ញា បុរសឯក គណៈកម្មការជំនាញជាច្រើនរូប បណ្ដាហ្វេនផេក និងមហាជនអ្នកគាំទ្រជាច្រើននាក់យ៉ាងណែនណាន់ពេញសាលប្រកួតទាំងមូល។
នៅក្នុងរាត្រីដ៏អស្ចារ្យ និងរំភើបញាប់ញ័រនេះ ការប្រកួតវគ្គផ្ដាច់ព្រ័ត្រនៃកម្មវិធី Miss and Mister Majestic ឆ្នាំ ២០២៤ ក៏បានរកឃើញនូវម្ចាស់ជ័យលាភីស័ក្ដសមនឹងតំណែងដូចជា កញ្ញា គង់ សុវិមាន F26 ទទួលបានតំណែងម្ចាស់មកុដ និងពានរង្វាន់ Miss Majestic 2024 ចំណែកម្ចាស់មកុដ និងពានរង្វាន់ Mister Majestic 2024 បានទៅលើលោក លាងពិសី M01 និង ម្ចាស់មកុដ និងពានរង្វាន់ Miss Majestic Tran 2024 បានទៅលើកញ្ញាភេទទី៣ ស្វាយ សុធារ៉ា T14 ដោយម្នាក់ៗទទួលបាននូវមកុដ និងពានរង្វាន់ Miss and Mister Majestic អមជាមួយទឹកប្រាក់រង្វាន់ ២ លានរៀល។
ម្ចាស់មកុដម្នាក់ៗគឺពិតជាស័ក្តិសមជាមួយតំណែង Winner ដែលពួកគេទទួលបាន និងបានក្លាយជាបេក្ខភាពតំណាងឱ្យមុខមាត់ប្រទេសជាតិចេញទៅចូលរួមប្រកួតនៅលើឆាកអន្តរជាតិជាបន្តទៀត។ យ៉ាងណាមិញ កញ្ញា ពេជ្រ គីរ៉ា នារីភេទទី៣កម្ពុជាដំបូងបង្អស់ ដែលឈ្នះមកុដបវរកញ្ញាលើឆាកអន្តរជាតិ និងជា Queen Universe Trans កម្រិតពិភពលោកមុនគេជាប្រវត្តិសាស្ត្រ និងជាគ្រូបង្វឹកផ្ទាល់ក្នុងកម្មវិធី បានផ្ដាំផ្ញើទៅកាន់ប្អូនៗជាម្ចាស់មកុដ និងពាន Miss and Mister Majestic ឆ្នាំ ២០២៤ ថា សំខាន់បំផុតគឺការតាំងចិត្ត បន្ទាប់មកទៀតគឺការៀបចំខ្លួន និងត្រូវបង្ហាញភាពជាខ្លួនឯងដែលល្អបំផុតទៅកាន់គណៈកម្មការអន្តរជាតិ។
សូមជម្រាបថា ការប្រកួតបវរកញ្ញា បុរសឯក និងនារីឯកភេទទី ៣ Miss and Mister Majestic ឆ្នាំ ២០២៤ នេះ ត្រូវបានបង្កើតឡើងដោយកូនខ្មែរលោក យ៉ន់ វុទ្ធី ហៅអេរិច ជាស្ថាបនិក ដោយក្នុងនោះលោកមានទស្សនៈ និងគោលបំណងសំខាន់ៗជាច្រើន ដើម្បីជំរុញឱ្យការប្រកួតមួយនេះក្លាយជាការប្រកួតលំដាប់អន្តរជាតិ។
គួរជម្រាបបន្ដែមថា ក្រៅពីម្ចាស់មកុដទាំង៣រូបហើយនោះ កម្មវិធីក៏បានរកឃើញម្ចាស់តំណែងពិសេសដែលបានទៅលើ M21 លោក ស៊ុន ភារ៉ា ទទួលតំណែងជា Winner of Majestic Foundation Ambassadors និងតំណែងលំដាប់រងទី ១ បានទៅលើ កញ្ញា សន ស្រីនាង F17 ទទួលបានតំណែលំដាប់រងទី ១ Miss Majestic 2024 និងលោក ពឿន រ៉ាពីន M03 ទទួលបានតំណែងលំដាប់រងទី ១ Mister Majestic 2024 និងតំណែងលំដាប់រងទី១ Miss Majestic Tran 2024 បានទៅលើកញ្ញាភេទទី៣ ពេង ផន T05 ដោយម្នាក់ទទួលបាននូវមកុដ និងពានរង្វាន់ Miss and Mister Majestic អមជាមួយទឹកប្រាក់រង្វាន់១លាន៥សែនរៀល៕
