នៅល្ងាចថ្ងៃទី២៣ ខែសីហា ឆ្នាំ២០២៤ ចៅក្រមស៊ើបសួរ នៃសាលាដំបូងរាជធានីភ្នំពេញ បានសម្រេចឃុំខ្លួនស្ត្រីម្នាក់ ដែលមានឈ្មោះលើ Facebook ថា Yubee Ly (យូប៊ី លី) ក្នុងពន្ធនាគារជាបណ្ដោះអាសន្ន ពាក់ព័ន្ធនឹងបទល្មើស «ប្រើប្រាស់អាវុធដោយគ្មានការអនុញ្ញាត» ។ ប្រសិនបើតុលាការរកឃើញថា មានបទល្មើស ជនជាប់ចោទ នឹងប្រឈមជាប់ពន្ធនាគារពី៦ ខែទៅ២ឆ្នាំ។
យោងតាមសេចក្ដីប្រកាសព័ត៌មានរបស់នាយកដ្ឋាននគរបាលព្រហ្មទណ្ឌ បានបញ្ជាក់អំពីចំណាត់ការតាមផ្លូវច្បាប់លើស្ត្រីម្នាក់ ដែលបានប្រើប្រាស់គណនី Facebook ឈ្មោះ Yubee Ly ដែលបង្ហោះវីដេអូ បង្ហាញពីសកម្មភាពប្រើប្រាស់អាវុធ ដោយខុសច្បាប់ភ្ជាប់ជាមួយខ្លឹមសារ «អូនកាចចឹងធ្វើប្រពន្ធបងបាននៅ»។
ក្រោយឃើញការបង្ហោះបែបនេះ កម្លាំងនគរបាល នៃការិយាល័យព្រហ្មទណ្ឌកម្រិតស្រាល បានធ្វើការស្រាវជ្រាវជាបន្ទាន់ ដោយមានការសម្របសម្រួលពីតំណាងអយ្យកាអមសាលាដំបូងរាជធានីភ្នំពេញ រហូតឈានដល់ការឃាត់ខ្លួនជនសង្ស័យ នៅប្រមាណជាមួយម៉ោងក្រោយការបង្ហោះវីដេអូបាញ់បោះ។
នាយកដ្ឋាននគរបាលព្រហ្មទណ្ឌបញ្ជាក់ថា ស្ត្រីដែលជាជនសង្ស័យ ក្នុងករណីប្រើប្រាស់អាវុធដោយគ្មានការអនុញ្ញាតមានឈ្មោះ ម៉េង លីហ័រ អាយុ២៤ ឆ្នាំ ត្រូវបានឃាត់ខ្លួន និងបញ្ជូនទៅធ្វើការសួរនាំទាំងយប់ ថ្ងៃទី ២០ ខែសីហា ឆ្នាំ២០២៤ នៅនាយកដ្ឋាននគរបាលព្រហ្មទណ្ឌ។ រហូតមកដល់ព្រឹកថ្ងៃទី២១ ខែសីហា ឆ្នាំ២០២៤ កម្លាំងជំនាញការិយាល័យព្រហ្មទណ្ឌកម្រិតស្រាល បានបន្តធ្វើការសួរនាំស្ត្រីខាងលើ ដើម្បីចាត់ការបន្តតាមនីតិវិធី។
ផ្អែកតាមការសាកសួរជំហានដំបូងស្ត្រីឈ្មោះ ម៉េង លីហ័រ បានសារភាពថា វីដេអូបាញ់ឡើងលើមួយគ្រាប់នេះ ជាសកម្មភាពតាំងពីឆ្នាំ ២០២២ មកម្ល៉េះ ប៉ុន្តែរូបគេទើបយកមកបង្ហោះឡើងវិញ នៅក្នុងគណនីក្លែងក្លាយ ដែលប្រើប្រាស់ឈ្មោះ Yubee Ly ។
ក្រោយពីធ្វើការសាកសួរលើជនសង្ស័យ ដំណាងអយ្យកាអមសាលាដំបូងរាជធានីភ្នំពេញ បានសម្រេចចោទប្រកាន់ជនសង្ស័យឈ្មោះ ម៉េង លីហ័រ ពីបទ ប្រើប្រាស់អាវុធដោយគ្មានការអនុញ្ញាត និងបញ្ជូនខ្លួនទៅតុលាការ ដើម្បីបន្តនីតិវិធី។
យោងតាមច្បាប់ស្ដីពីការគ្រប់គ្រងអាវុធ គ្រឿងផ្ទុះ និងគ្រាប់រំសេវ មាត្រា២០ ការប្រើប្រាស់អាវុធដោយគ្មានការអនុញ្ញាត ត្រូវផ្ដន្ទាទោសដាក់ពន្ធនាគារពី ៦ ខែ ទៅ២ឆ្នាំ និងពិន័យជាប្រាក់ពី ៥០ម៉ឺន ទៅ២លានរៀល ដោយមិនទាន់គិតពីបទល្មើសព្រហ្មទណ្ឌផ្សេងទៀត៕
អត្ថបទ៖ ចតុមុខ
