ឧកញ៉ា ខេមរៈ សិរីមន្ត បានចូលរួមបរិច្ចាគធនធានថវិកាចំនួន ២០០លានរៀល ជាមួយរាជរដ្ឋាភិបាលកម្ពុជា បង្ហាញពីការគាំទ្រមូលនិធិដែលផ្ដួចផ្ដើមដោយសម្ដេចបវរធិបតី ហ៊ុន ម៉ាណែត ក្នុងការកសាងហេដ្ឋារចនាសម្ព័ន្ធ តាមបណ្ដោយព្រំដែន ដើម្បីការពារបូរណភាពទឹកដី របស់កម្ពុជា។
តាមការបញ្ជាក់របស់ឧកញ៉ា ខេមរៈ សិរីមន្ត លើបណ្ដាញទំនាក់ទំនងសង្គមហ្វេសប៊ុក នៅថ្ងៃទី២៦ ខែសីហា ឆ្នាំ២០២៤ នេះ ៖ ដើម្បីការពារទឹកដីរបស់យើង ខ្ញុំបាទឧកញ៉ា ខេមរៈ សិរីមន្ត នឹងភរិយាក្នុងនាមប្រជាពលរដ្ឋមួយរូប សូមគាំទ្រ និងបរិច្ចាគធនធានផ្ទាល់ខ្លួន ចំនួន ២០០ លានរៀល ដើម្បីបង្ហាញពីស្មារតីចូលរួមជាមួយរាជរដ្ឋាភិបាលដែលមាន «សម្ដេចមហាបបរធិបតីហ៊ុនម៉ាណែត» ជានាយករដ្ឋមន្ត្រីក្នុងការអភិវឌ្ឍន៍គេហដ្ឋារចនាសម្ព័ន្ធតាមតំបន់ព្រំដែនដែលនឹងរឹតតែបន្ថែមភាពកក់ក្តៅជូនប្រជាពលរដ្ឋកម្ពុជាបន្ថែមទៀត ដោយក្តីគោរព។ សូមអំពាវនាវពុកម៉ែបងប្អូនចូលរួមឱ្យបានគ្រប់គ្នា។ ១០០០ រៀល ២០០០រៀលក្ដី គឺបង្ហាញពីទឹកចិត្តបេះដូង និងឆន្ទៈ នៃការស្រឡាញ់និងការពារទឹកដីរបស់យើង ពិតប្រាកដទាំងអស់គ្នា។
ទឹកប្រាក់២០០លានរៀល នេះបើគិតជាសាច់ប្រាក់ដុល្លារ មានចំនួនប្រមាណជាង៥ម៉ឺនដុល្លារសហរដ្ឋអាមេរិក។
ការចូលរួមរបស់ពលរដ្ឋ ទោះតិចឬច្រើនក្ដី គឺជារឿងមួយល្អ ព្រោះនេះបានបង្ហាញពីចលនានៃការរួបរួមសាមគ្គីភាពគ្នាក្នុងនាមជាប្រជាពលរដ្ឋខ្មែរ ដែលចង់ឃើញប្រទេសជាតិមានការអភិវឌ្ឍ ពិសេសគឺការពារបូរណភាពទឹកដីរបស់កម្ពុជា៕
