ឧកញ៉ា ព្រាប សុវត្ថិ និងលោកជំទាវ បានចូលរួមថវិការួចហើយជាមួយនឹងរាជរដ្ឋាភិបាលកម្ពុជា ចំនួន២០០លានរៀល នៅក្នុងមូលនិធិកសាងហេដ្ឋារចនាសម្ព័ន្ធ តាមបណ្ដោយព្រំដែន បន្ទាប់ពីសេចក្តីថ្លែងការណ៍ពិសេស ស្តីពីសមិទ្ធផល ១ឆ្នាំ របស់រាជរដ្ឋាភិបាល នីតិកាលទី៧ នៃរដ្ឋសភា នៅយប់ថ្ងៃទី២២ ខែសីហា ឆ្នាំ២០២៤ សម្ដេចធិបតី ហ៊ុន ម៉ាណែត បានថ្លែងថា ការអភិវឌ្ឍហេដ្ឋារចនាសម្ព័ន្ធ និងការតភ្ជាប់ផ្លូវនៅតាមព្រំដែនជាអាទិភាពរបស់រាជរដ្ឋាភិបាល ដើម្បីជំរុញការអភិវឌ្ឍនៅតាមព្រំដែន ដូច្នេះសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានសម្រេចផ្ដួចផ្ដើមបង្កើតមូលនិធិកសាងហេដ្ឋារចនាសម្ព័ន្ធ តាមបណ្ដោយព្រំដែន ដើម្បីការពារបូរណភាពទឹកដី របស់កម្ពុជា នេះឡើយ។
ក្នុងនាមជាកូនខ្មែរស្នេហាជាតិមួយរូប និងជាពលរដ្ឋដែលចូលរួមគ្រប់សកម្មភាព ជួយដល់សង្គម ឧកញ៉ា ព្រាប សុវត្ថិ និងលោកជំទាវជាឧត្តមភរិយា បានបង្ហាញឱ្យឃើញយ៉ាងជាក់ច្បាស់ថាក្រុមគ្រួសាររបស់លោកឧកញ៉ា មិនស្ទាក់ស្ទើរ និងរុញរាឡើយនៅក្នុងការបរិច្ចាគថវិកាផ្ទាល់ខ្លួន ដើម្បីជាដើមទុនមួយផ្នែកនៅក្នុងការកសាងហេដ្ឋារចនាសម្ព័ន្ធតាមបណ្ដោយព្រំដែនកម្ពុជា។
ខាងក្រោមនេះគឺជាការរៀបរាប់របស់ឧកញ៉ា ព្រាប សុវត្ថិ នៅលើបណ្ដាញសង្គម៖ ខ្ញុំបាទសូមគោរព និង គាំទ្រសេចក្ដីប្រកាសរបស់សម្ដេចមហាបវរធិបតីហ៊ុនម៉ាណែតដែលបានបង្កេីតនូវមូលនិធិកសាងហេដ្ឋារចនាសម្ព័ន្ធនានាតាមបណ្ដោយព្រំដែនព្រមទាំងផ្ដល់ឱកាសអោយប្រជាពលរដ្ឋខ្មែរគ្រប់មជ្ឈដ្ឋានក្នងនិង ក្រៅប្រទេសបានចូលរួមចំណែកផ្ទាល់ជាមួយរាជរដ្ឋាភិបាលក្នុងបុព្វហេតុរួមគ្នាកសាងជាតិមាតុភូមិរបស់យេីង។ ជាពេលវេលាល្អបំផុតដែលប្រជាជនខ្មែរទាំងអស់បានបង្ហាញអោយឃេីញនូវកំលាំងមហាសាមគ្គីជាតិខ្មែរគ្រប់ទិសទីរួមគ្នាកសាង ការពារ អភិវឌ្ឍន៍តាមតំបន់ព្រំដែនអោយមានសុខសន្តិភាព អធិបតេយ្យភាព និង បូរណភាពទឹកដីអោយបានរឹងមាំគង់វង្សរហូតគ្រប់ជំនាន់ ។ ក្នុងនាមខ្ញុំបាទប្រជាពលរដ្ឋមួយរូបសូមគាំទ្រ និងបរិច្ចាគធនធានផ្ទាល់ខ្លួនចំនួន 200លានរៀល។ ដើម្បីបង្ហាញពីស្មារតីចូលរួមជាមួយរាជរដ្ឋាភិបាលក្នុងការអភិវឌ្ឍន៍ ហេដ្ឋារចនាសម្ព័ន្ធតាមតំបន់ព្រំដែន។
ខ្ញុំបាទសូមអំពាវនាវពុកម៉ែបងប្អូនចូលរួមឱ្យបានគ្រប់គ្នា 1000រៀល 2000រៀលក្តី គឺបង្ហាញពីទឹកចិត្តបេះដូង និង ឆន្ទៈ នៃការស្រឡាញ់ និង ប្តេជ្ញាចូលរួម ការពារទឹកដី របស់យើងទាំងអស់គ្នា។
សូមជម្រាបជូនថា នេះមិនមែនជាលើកដំបូង ដែលលោកឧកញ៉ា ព្រាប សុវត្ថិ លោកជំទាវ ព្រមទាំងកូនៗ របស់លោក បានចូលរួមគ្រប់សកម្មភាពជួយដល់សង្គម ដែលនេះបានសបង្ហាញឱ្យឃើញពីស្មារតីជួយជាតិស្នេហាជាតិ ក្នុងនាមជាកុលបុត្រខ្មែរមួយរូប គួរយកជាគំរូតាម៕
