សិល្បៈជាតិ៖ ដំណឹងមុននេះ សារព័ត៌មានត្រយងបានទទួលមកឱ្យដឹងថា ព្រះនាងតូច នរោត្តម ចេនណា ទទួលពានរង្វាន់ Best Newcomer Actress ពីមហោស្រពភាពយន្តកម្ពុជា-អាស៊ីលើកទី២ តាមរយៈខ្សែភាពយន្ត «បណ្ដាសានាងរាត្រី» ដែលផលិតឡើងដោយផលិតកម្ម LD ។
តាមការបញ្ជាក់របស់ព្រះនាងតូច នរោត្តម ជេនណា បានបង្ហោះឡើងនៅលើហ្វេសប៊ុកយ៉ាងដូច្នោះ៖
ខ្ញុំពិតជាមានអារម្មណ៍រំភេីបណាស់ដោយបានទទួលបានពាន“ Best Newcomer Actress “ពីមហោស្រពភាពយន្ត កម្ពុជា-អាស៊ីលើកទី២ តាមរយៈខ្សែភាពយន្តខ្នាតធំ រឿង “បណ្ដាសានាងរាត្រី”។
ពានរង្វាន់មួយនេះជាកិត្តិយសដ៏ធំនៃការកសាងស្នាដៃរបស់ខ្ញុំ ក៏ដូចជាអនុស្សាវរីយ៍នៃការបម្រេីវិស័យសិល្បៈខ្មែរ ដែលខ្ញុំស្រឡាញ់ពេញបេះដូងផងដែរ។ យ៉ាងណាមិញ ខ្ញុំមិនភ្លេចទេចំពោះការអរគុណយ៉ាងជ្រាលជ្រៅចំពោះលោកចាងហ្វាងផលិតកម្ម និងថ្នាក់ដឹកនាំផលិតកម្ម LD Entertainment ព្រមទាំងក្រុមការងារទាំងអស់សម្រាប់ការផ្តល់ឱកាសដល់ខ្ញុំបានសម្ដែងក្នុងខ្សែភាពយន្តល្អៗតាំងពីដេីមរៀងមក។
ទន្ទឹមនឹងនេះ ខ្ញុំសូមអរគុណចំពោះពុកម៉ែបងប្អូនក៏ដូចជាហ្វេនៗរបស់ខ្ញុំទាំងអស់ សម្រាប់ការគាំទ្រតាំងពីដើមមក។ ខ្ញុំពិតជារីករាយក្នុងបន្តបោះជំហ៊ានទៅមុខប្រកបដោយក្ដីស្រឡាញ់និងការតាំងចិត្តខ្ពស់។
គួររំលឹកដែរថា ភាពយន្ត «បណ្ដាសានាងរាត្រី» គឺជាភាពយន្តដែលជោគជ័យបំផុតរបស់កម្ពុជាដែលបានចេញទៅបញ្ចាំងនៅតាមរោងភាពយន្តបណ្ដាប្រទេសក្នុងតំបន់អាស៊ី ហើយជាពិសេសភាពយន្តនេះទទួលបានកំណត់ត្រាថ្មីដែលមានចំនួនកើនលើសពី ១ លាននៅក្នុង Box Office របស់តៃវ៉ាន់ និងបានក្លាយជាភាពយន្តខ្មែរដំបូងគេជាប្រវត្តិសាស្ត្រដែលរកចំណូលបានច្រើនជាងគេនៅតៃវ៉ាន់ផងដែរ៕
