ប្រមុខរាជរដ្ឋាភិបាលកម្ពុជា សម្ដេចមហាបវរធិបតី ហ៊ុន ម៉ាណែត បានប្រកាសបង្កើត “មូលនិធិកសាងហេដ្ឋារចនាសម្ព័ន្ធតាមព្រំដែន” នាថ្ងៃទី ២៦ ខែសីហា ឆ្នាំ២០២៤ នេះ។
យោងតាមសេចក្ដីជូនដំណឹងរបស់ខុទ្ទកាល័យ សម្ដេចនាយករដ្ឋមន្ត្រី មូលនិធិនេះ បង្កើតឡើងក្នុងគោលបំណងដើម្បីកៀរគរថវិកាបន្ថែមសម្រាប់ កសាងហេដ្ឋារចនាសម្ព័ន្ធនានានៅតាមបណ្ដោយព្រំដែន ព្រមទាំងបានផ្ដល់ឱកាសឱ្យ ប្រជាពលរដ្ឋខ្មែរគ្រប់មជ្ឈដ្ឋាន ទាំងក្នុង និងក្រៅប្រទេស បានចូលរួមចំណែកដោយផ្ទាល់ជាមួយ រាជរដ្ឋាភិបាលនៅក្នុងបុព្វហេតុការពារ និងអភិវឌ្ឍជាតិ ក្នុងស្មារតីមហាសាមគ្គីជាតិខ្មែរ ដើម្បីថែរក្សា សុខសន្តិភាព អធិបតេយ្យ និងបូរណភាពទឹកដី ក៏ដូចជាការជំរុញការអភិវឌ្ឍ នៅតាមតំបន់ព្រំដែនឱ្យបានកាន់តែរឹងមាំ និងប្រកបដោយចិរភាព។
ជាមួយគ្នានេះ សម្ដេចធិបតី នាយករដ្ឋមន្ត្រី ក៏បានអំពាវនាវដល់បងប្អូនប្រជាពលរដ្ឋខ្មែរទាំងក្នុង និងក្រៅប្រទេស ឲ្យចូលរួមបរិច្ចាគវិភាគទានឱ្យបានផុលផុសតាមការស្ម័គ្រចិត្តក្នុង “មូលនិធិកសាងហេដ្ឋារចនា សម្ព័ន្ធតាមព្រំដែន” សំដៅរួមគ្នាក្នុងធ្លុងមហាសាមគ្គីជាតិខ្មែរ។
មិនទាន់បាន១ថ្ងៃផង បន្ទាប់ពីខុទ្ទកាល័យ សម្ដេចធិបតីចេញសេចក្ដីជូនដំណឹង អំពីការបង្កើតមូលនិធិនេះ ចលនាគាំទ្រ និងការបរិច្ចាគក៏ផុលផុសឡើងគួរឲ្យចាប់អារម្មណ៍ពីគ្រប់មជ្ឈដ្ឋាន។ ក្នុងនោះគេសង្កេតឃើញបណ្ដាថ្នាក់ដឹកនាំកំពូលៗ របស់ប្រទេស មន្ត្រីរាជការ ឧកញ៉ា អ្នកឧកញ៉ា លោកអ្នកឧកញ៉ា ពាណិជ្ជករ សិល្បករសិល្បការិនីល្បីៗ ជួរមុខ និងក្រុមហ៊ុនគ្រាក់ៗ បាននាំអាទិក្នុងការរួមចំណែកបរិច្ចាគ ដើម្បីជាគំរូ និងទំនុកចិត្តដល់បណ្ដាប្រជាពលរដ្ឋទូទាំងប្រទេស។
ការណ៍នេះ ឆ្លុះបញ្ចាំងឲ្យឃើញពីស្មារតីសាមគ្គីជាតិ របស់ប្រជាពលរដ្ឋខ្មែរគ្រប់មជ្ឈដ្ឋាន ក្នុងការជំរុញការអភិវឌ្ឍ នៅតាមតំបន់ព្រំដែនឱ្យបានកាន់តែរឹងមាំ និងប្រកបដោយចិរភាព៕
អត្ថបទ៖ ឈិន ធារ៉ាត់
