ខ្សែការពាររបស់វិសាខា khan Mohammed Faeez «កាន់ ម៉ូ» បានបង្ហាញអារម្មណ៍បន្ទាប់ពីចូលរួមហ្វឹកហាត់ជាមួយក្រុមជម្រើសជាតិឈុតធំកម្ពុជាថា៖ «ពិតជាមានកិត្តិយស ដែលបានមកទីនេះ ជាមួយក្រុមកីឡាករ។ ខ្ញុំពិតជាសប្បាយចិត្ត និងចូលចិត្តសម្រាប់ការហ្វឹកហាត់ដំបូងនេះ និងមានក្ដីរីករាយជាមួយអ្នករាល់គ្នា»។
កាន់ ម៉ូ បន្ថែមថា៖ «សម្រាប់ខ្ញុំគិតថា នឹងជម្រុញខ្លួនឯង កាន់តែខ្លាំងដែលអាច តាមដែលអាចធ្វើទៅបាន ដើម្បីជួយក្រុមជម្រើសជាតិ យកឈ្នះស្រីលង្កា នៅជើងទី១។ ហើយជាការពិតណាស់បួកយើងចង់ឈ្នះការប្រកួតអោយបានច្រើនតាមដែលអាចធ្វើបាន»។
ក្រុមជម្រើសជាតិកម្ពុជា កាលពីព្រឹកថ្ងៃទិ២៧ សីហា ក្រោមការដឹកនាំលោក Félix Dalmás គ្រូបង្វឹកជនជាតិអាហ្សង់ទីន បានកោះហៅ កីឡាករ ចំនួន ២៤នាក់ មកពី៦ក្លិបផ្សេងគ្នា ក្នុងនោះក៏មានវត្តមានកីឡាករចូលសញ្ជាតិ ៣រូបផងដែរ រួមមាន៖ Mohammed Faeez មានឈ្មោះខ្មែរថា «កាន់ ម៉ូ» សមាជិករបស់វិសាខា Yudai Ogawa សមាជិករបស់ភ្នំពេញក្រោន និង Hikaru Mizuno របស់ព្រះខ័នរាជស្វាយរៀង។
រំលឹកថា បន្ទាប់ពីបានរួមចំណែកជាមួយវិស័យបាល់ទាត់កម្ពុជា អស់រយពេលជាច្រើនឆ្នាំរួចមកពេលនេះកីឡាករបរទេស ៤រូបបានទទួលសញ្ជាត់ខ្មែរជាផ្លូវការ គឺទី១ កីឡាករ Yudai Ogawa មានដើមកំណើតជប៉ុន ទី២ កីឡាករ Privat Mbarga មានដើមកំណើតកាមេរូន ទី៣កីឡាករ Hikaru Mizuno ដើមកំណើតជប៉ុន និងទី៤ កីឡាករ Mohammed Faeez មានដើមកំណើតអាហ្វ្រិកខាងត្បូង ។
ដោយលែកសម្រាប់ កីឡាករ Mohammed Faeez កាលពីថ្ងៃទី៦ ខែសីហា ឆ្នាំ២០២៤ កន្លងទៅ ក្លិបបាល់ទាត់វិសាខា បានប្រកាសពីកាទទួលបានសញ្ជាតិខ្មែរ ជាផ្លូវការនិងជាកីឡាករទី៤ នៅកម្ពុជា ដោយមានឈ្មោះជាភាសាខ្មែរថា «កាន់ ម៉ូ»។
Mohammed Faeez បច្ចុប្បនេះមានវ័យ៣១ឆ្នាំ ចូលរួមក្នុងវិស័យបាល់ទាត់នៅកម្ពុជាដំបូងនៅឆ្នាំ២០១៩ កាលនោះរួមគេចូលរួមជាមួយក្លិបបាល់ទាត់ Tiffy Army FC ក្រោយមកនៅឆ្នាំ២០២០ មកផ្ទេមកចូលរួមជាមួយក្រុមវិសាខា មកដល់បច្ចុប្បន្ន៕
