ជនល្មើសចំនួន ៦នាក់ជាមួយគ្រឿងញៀន ជិត៤០០គីឡូក្រាម ត្រូវមន្ទីរប្រឆាំងគ្រឿងញៀន ចុះបង្ក្រាបបាននៅ៣ទីតាំងផ្សេងគ្នាក្នុងរង្វង់រាជធានីភ្នំពេញ។ ទីតាំងទី១ ស្ថិតនៅចំណុច បុរីផុងស៊ុយ សង្កាត់កាកាប១ ខណ្ឌពោធិ៍សែនជ័យ, ទីតាំងទី២ ស្ថិតក្នុងផ្ទះមួយ នៅភូមិទួលសំពៅ សង្កាត់ទួលសង្កែ១ ខណ្ឌឫស្សីកែវ និងទីតាំងទី៣ ស្ថិតនៅចំណុច បុរីលឹមឈាងហាក់ ហ្គ្រីនហូម ផ្ទះលេខ១៦D ផ្លូវលេខ២A ភូមិកំរៀង សង្កាត់កន្ទោក ខណ្ឌកំបូល រាជធានីភ្នំពេញ។
ជនប្រព្រឹត្តបទល្មើសគ្រឿងញៀន ទាំង៦នាក់ សុទ្ធតែជាជនជាតិខ្មែរ អាយុចន្លោះពី ២៣ ដល់៥១ឆ្នាំ ក្នុងនោះមានស្ត្រី២នាក់ដែរ។
ចំណែកឯវត្ថុតាងដែលឃាត់បានរួមមាន៖ គ្រឿងញៀនប្រភេទមេតំហ្វេតាមីន (ICE) ២៥៤ ២៩២. ៤០ក្រាម (២៥៤.២៩ គក.), គ្រឿងញៀនប្រភេទកេតតាមីន (Ketamine) ១២៧ ៦០៦.៨០ក្រាម (១២៧.៦០ គ.ក.), គ្រឿងញៀនហេរ៉ូអ៊ីន (Heroine) ៧ ៧០០ក្រាម (៧.៧ គ.ក.)។ សរុបគ្រឿងញៀនទាំង៣ករណីស្មើនឹង ៣៨៩ ៥៩៩.២០ក្រាម (៣៨៩.៦០ គ.ក.)។ ជាមួយគ្នានេះក៏មានរថយន្ត Pruise ១គ្រឿងដែរ។
មុននឹងឈានទៅដល់ការបង្ក្រាបបទល្មើសរក្សាទុក ដឹកជញ្ជូន និងជួញដូរដោយខុសច្បាប់ នូវសារធាតុញៀនទាំង ៣ករណីនេះ កម្លាំងជំនាញនៃមន្ទីរប្រឆាំងបទល្មើសគ្រឿងញៀន សហការជាមួយអាជ្ញាធរមានសមត្ថកិច្ចពាក់ព័ន្ធ បានធ្វើការស៊ើបអង្កេតអស់រយៈជាង៤ ទៅ ៥ ខែ រហូតដល់ថ្ងៃទី ២៤ ខែសីហា ឆ្នាំ ២០២៤ ទើបសម្រេចបើកប្រតិបត្តិការចុះបង្ក្រាបតែម្ដង។
នៅព្រឹកថ្ងៃទី ២៨ ខែសីហា ឆ្នាំ ២០២៤ នេះ ជនល្មើសទាំង ៦នាក់ និងវត្ថុតាង ត្រូវបានបញ្ជូនទៅតុលាការ ដើម្បីបន្តនីតិវិធី។
ពាក់ព័ន្ធនឹងករណីខាងលើនេះ យោងតាមច្បាប់ ស្ដីពី ការត្រួតពិនិត្យគ្រឿងញៀន មាត្រា៤០ អំពីបទល្មើសរក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀន ត្រង់ វាក្យខណ្ឌ៧ បានចែងថា៖
ត្រូវផ្ដន្ទាទោសដាក់ពន្ធនាគារពី ២០ (ម្ភៃ) ឆ្នាំ ទៅ ៣០ (សាមសិប) ឆ្នាំ ឬអស់មួយជីវិត និង ផ្ដន្ទាទោសពិន័យជាប្រាក់ពី ៤០.០០០.០០០ (សែសិបលាន) រៀល ទៅ ១០០.០០០.០០០ (មួយ រយលាន) រៀល ក្នុងករណីដែលការប្រព្រឹត្តបទល្មើស
រក្សាទុក ដឹកជញ្ជូន និងជួញដូរដោយខុសច្បាប់នូវ សារធាតុ ម័រហ្វីន ហេរ៉ូអ៊ីន ឬកូកាអ៊ីនមានបរិមាណសុទ្ធ ចាប់ពី ៨០ (ប៉ែតសិប) ក្រាម ឡើងទៅ និងសារធាតុ អំហ្វេតាមីន មេតំហ្វេតាមីន ឬម៉ិចស្តាស៊ី ដែលមានបរិមាណសុទ្ធ ចាប់ពី ២៤០ (ពីររយ សែសិប) ក្រាម ឡើងទៅ៕
