សិល្បៈអន្តរជាតិ៖ ផលិតកម្មយក្សរបស់កូរ៉េខាងត្បូង SM Entertainment បានចេញសេចក្ដីប្រកាសជាផ្លូវការមួយថា Moon Taeil សមាជិកក្រុមចម្រៀង NCT បានចេញក្រុមហើយ ក្រោយរកឃើញថាតារារូបនេះមានជាប់ពាក់ព័ន្ធនឹងរឿងក្ដីរំលោភផ្លូវភេទ ខណៈដែលពេលនេះ Taeil កំពុងស្ថិតក្នុងដំណាក់កាលស៊ើបអង្កេត និងសាកសួរ។
យោងតាមសេចក្ដីថ្លែងការរបស់ផលិតកម្ម SM ៖ កាលពីពេលថ្មីៗនេះ ពួកយើងបានបញ្ជាក់រួចហើយថា Taeil ត្រូវបានប្ដឹងនៅក្នុងរឿងក្ដីព្រហ្មទណ្ឌមួយដែលមានពាក់ព័ន្ធនឹងករណីល្មើសផ្លូវភេទ ពួកយើងជ្រាបច្បាស់ណាស់ថា បញ្ហាដែលកើតឡើងនេះវាមានសភាពធ្ងន់ធ្ងរបំផុត ស្របពេលជាមួយគ្នានេះដែរ រឿងនេះក៏កំពុងស្ថិតនៅក្នុងដំណាក់កាលស្វែងរកការពិតផងដែរ ដូច្នោះហើយ ទើបខាងផលិតកម្មសម្រេចចិត្តថា Taeil មិនអាចចូលរួមនៅក្នុងសកម្មភាពផ្សេងៗជាមួយនឹងក្រុម NCT បានទៀតនោះឡើយ។
បន្ទាប់ពីពិភាក្សាគ្នាជាមួយនឹង Taeil ដើម្បីរកច្រកចេញ ទីបំផុតពួកយើងបានសម្រេចចិត្តឱ្យគេចេញពីក្រុម ខណៈដែលសាមីខ្លី Taeil បានបើកដៃចូលរួមសហការជាមួយនឹងសមត្ថកិច្ចពេញទំហឹង ប្រសិនបើការស៊ើបអង្កេតករណីនេះមានអ្វីថ្មីឬប្រែប្រួលត្រង់ណាខាងផលិតកម្មនឹងជូនជាដំណឹងបន្ថែម ជាចុងក្រោយខាងផលិតកម្ម SM ក៏បានសូមទោសទៅកាន់អ្នកគាំទ្រខ្លួនជាពិសេសក្រុមចម្រៀង NCT ថា សូមអភ័យទោសចំពោះបញ្ហាចម្រូងចម្រាសដែលកើតមានដោយសារតែសិល្បករយើងខ្ញុំផង។
សូមជម្រាបជូនថា Moo Taeil ត្រូវបានអ្នកគាំទ្រទាំងក្នុងនិងក្រៅប្រទេស ស្គាល់ឈ្មោះគេថា Taeil សមាជិកម្នាក់នៃក្រុម NCT127 ដែលស្ថិតនៅក្នុងក្រុម NCT ក្រុមចម្រៀងបុរសនាំមុខគេមួយរបស់តន្ត្រី K-Pop ដោយបានប្រឡូកចូលសិល្បៈកាលពីឆ្នាំ២០១៦ Taeil មានឈ្មោះល្បីល្បាញដោយសារតែមានសមត្ថភាពច្រៀងបានល្អ និងមានតួនាទីជាអ្នកចម្រៀងគោលរបស់ក្រុម ដោយគេក៏ជាសមាជិកម្នាក់ដែលមានអាយុច្រើនជាងគេក្នុងក្រុមផងដែរ។
មុននឹងមានបញ្ហាចម្រូងចម្រាសនិងរឿងក្ដីជាប់ខ្លួន Taeil ក៏ធ្លាប់ជួបឧប្បត្តិហេតុគ្រោះថ្នាក់ម៉ូតូ ពេលធ្វើដំណើរត្រលប់ទៅផ្ទះវិញក្រោយបំពេញការងារចប់ ដែលធ្វើឱ្យគេខកខានមិនបានចូលរួមក្នុងការប្រគំន្ត្រី NCT Nation: To The World និង ការប្រគំតន្ត្រី NCT127 2ND Tour Neo City: Bangkok នាប្រទេសថៃផងដែរ៕
